ຄະນະຜູ້ແທນ ພະແນກສາທາລະນະສຸກແຂວງກວາງບິ່ງ ສສ ຫວຽດນາມ ໄດ້ເດີນທາງມາຢ້ຽມຢາມ ແລະ ເຮັດວຽກ ຮ່ວມກັບ ພະແນກສາທາລະນະສຸກແຂວງຄໍາມ່ວນ ສປປ ລາວ ໃນລະຫວ່າງວັນທີ 14 ຫາ 16 ພະຈິກ 2024.

ໃນໄລຍະຢູ່ຢ້ຽມຢາມແຂວງຄໍາມ່ວນ, ຄະນະຜູ້ແທນພະແນກສາທາລະນະສຸກ ສອງແຂວງ ໄດ້ດຳເນີນກອງປະຊຸມພົບປະແລກປ່ຽນບົດຮຽນ. ເຂົ້າຮ່ວມກອງປະຊຸມຝ່າຍແຂວງຄໍາມ່ວນນໍາໂດຍທ່ານ ສົມຈິດ ອໍ່າພິລາວົງ ຮອງຫົວໜ້າພະແນກສາທາລະນະສຸກແຂວງ, ຝ່າຍແຂວງກວາງບິ່ງນໍາໂດຍທ່ານ ດິ່ງ ຫວ້ຽນ ແອັງ ຮອງຫົວໜ້າພະແນກສາທາລະນະສຸກ ແຂວງກວາງບິ່ງ.

ການພົບປະຄັ້ງນີ້, ສອງຝ່າຍໄດ້ລາຍງານໃຫ້ກັນຊາບກ່ຽວກັບວຽກງານສາທາລະນະສຸກ, ຜົນສຳເລັດຂອງການຮ່ວມມືບາງຂົງເຂດ ໃນໄລຍະຜ່ານມາ ແລະ ການຕົກລົງບັນດາເນື້ອໃນການຮ່ວມມື ໂດຍສະເພາະການຮ່ວມມືໃນຊຸມຕໍ່ໜ້າ ຊຶ່ງປະກອບມີຢູ່ 5 ຂົງເຂດຄື: ຂົງເຂດກັນ ແລະ ຄວບຄຸມພະຍາດຕິດຕໍ່, ຂົງເຂດປິ່ນປົວພະຍາດ, ວຽກງານພັດທະນາ ແລະ ກໍ່ສ້າງຊັບພະຍາກອນມະນຸດ, ຂົງເຂດອາຫານ - ຢາ ແລະ ຂົງເຂດອື່ນໆ.

ສອງຝ່າຍເຫັນດີເປັນເອກະພາບ 2 ປີໃດຜັດປ່ຽນກັນຈັດຕັ້ງຄະນະຜູ້ແທນຂອງຕົນ ໄປຢ້ຽມຢາມ ແລະ ເຮັດວຽກແນໃສ່ແລກປ່ຽນບົດຮຽນ ແລະ ເຊັນບົດບັນທຶກການຮ່ວມມືນໍາກັນ. ນອກຈາກນັ້ນຈະໄດ້ຜັດປ່ຽນການແລກປ່ຽນບົດຮຽນດ້ານວິຊາການຮ່ວມ 1 ປີຕໍ່ຄັ້ງ.

(ຂ່າວ-ພາບ: ແດງສະຫວັດ ແສນພານິດ)