ສຳນັກ​ຂ່າວສານ​ຫວຽດນາມ ປະຈຳນະຄອນຫຼວງ​ຈາ​ກາ​ຕາ ລາຍງານໃນທ້າຍອາທິດຜ່ານມາວ່າ:ອິນ​ໂດ​ເນ​ເຊຍ ສືບ​ຕໍ່​ໄດ້​ຮັບ​ກຽດ​ເປັນ “ປະ​ເທດ​ທີ່ມີນ້ຳໃຈ​ທີ່​ສຸດ​ໃນ​ໂລກ”ນັບ​ແຕ່​ປີ2017 ແລະ ​ບັນລຸ​​ຄະ​ແນນ​ສູງສຸດໃນ​ຫຼາຍ​ຕົວ​ຊີ້​ວັດ, ​ໃນ​ນັ້ນ​ມີ​ການ​ເຄື່ອນ​ໄຫວ​ບໍລິຈາກ​ເງິນ, ຊ່ວຍ​ເຫຼືອ​ຊາວ​ຕ່າງປະ​ເທດ ​ແລະ ອາສາ​ສະໝັກ.

​ຂ່າວລະບຸວ່າ: ​​ສະ​ເລ່ຍແລ້ວຊາວ​ອິນ​ໂດ​ເນ​ເຊຍ 9 ຄົນ​ໃນ 10 ຄົນ ຈະ​ບໍລິຈາກ​ເງິນ​ໃຫ້​ແກ່ການ​ກຸສົນ, ​ໃນ​ຂະນະ​ທີ່ 10 ຄົນ ​ຈະມີ6 ຄົນ​ ສະຫຼະ​ເວລາເພື່ອ​ຊ່ວຍ​ເຫຼືອ​ຜູ້​ອື່ນ.ນີ້ແມ່ນຂໍ້ມູນໃນບົດລາຍງານປະຈໍາປີ World Giving Index 2024 (WGI) ຂອງ Charities Aid Foundation (CAF) - ອົງການການກຸສົນທີ່ຈົດທະບຽນຢູ່ໃນຣາຊະອານາຈັກອັງກິດ ແລະການາດາ.

ບົດສະຫຼຸບຂ້າງເທິງນີ້ແມ່ນໄດ້ຮັບຮອງໂດຍຜ່ານການສໍາຫຼວດທີ່ດໍາເນີນໂດຍ CAF ຊຶ່ງມີຜູ້ຕອບແບບສອບຖາມຫຼາຍກວ່າ 145,000 ຄົນ ໃນ 142 ປະເທດ.

ໃນ​ບົດ​ລາຍ​ງານ​ປີ 2024, ອິນ​ໂດ​ເນ​ເຊຍ​ບັນ​ລຸ​74 ຄະແນນຈາກລະດັບ 0-100. ອັນ​ດັບ​ທີ 2 ແລະ​ທີ 3 ແມ່ນ​ເຄັນ​ຢາ (63 ຄະ​ແນນ) ແລະ ສິງ​ກະ​ໂປ (61 ຄະ​ແນນ).