ເມືອງລະມາມ ແຂວງເຊກອງ ຈັດພິທີສະເຫຼີມສະຫຼອງວັນສາກົນຜູ້ອາຍຸສູງ ຄົບຮອບ 42 ປີ (1 ຕຸລາ 1982-1 ຕຸລາ 2024) ຂຶ້ນວັນທີ 19 ພະຈິກ ນີ້, ໂດຍມີທ່ານ ເຫລັກໄຫລ ສີວິໄລ ເຈົ້າແຂວງເຊກອງ, ທ່ານ ຕຸລາວັນ ວົງໄຊ ເຈົ້າເມືອງລະມາມ, ມີບັນດາທ່ານການນໍາ-ອາດີດການນໍາ ຂອງແຂວງ, ເມືອງ, ພະນັກງານອາວຸໂສບຳນານ ແລະ ພະນັກງານ-ລັດຖະກອນ ພາຍໃນເມືອງເຂົ້າຮ່ວມ.

ໃນໂອກາດນີ້, ທ່ານ ຕຸລາວັນ ວົງໄຊ ໄດ້ກ່າວວ່າ: ການຈັດງານສະເຫຼີມສະຫຼອງຄັ້ງນີ້ ແມ່ນເປັນການລະນຶກເຖິງຜົນງານຄຸນງາມຄວາມດີ ແລະ ເພື່ອເປັນການໂຄສະນາ, ປູກຈິດສໍານຶກໃຫ້ທຸກພາກສ່ວນໃນທົ່ວສັງຄົມ ກໍຄືເຍົາວະຊົນ-ຄົນຫຸ່ນຫຼັງເຫັນໄດ້ເຖີງຄຸນຄ່າຂອງຜູ້ອາຍຸສູງ; ຊຶ່ງຕະຫຼອດໄລຍະຜ່ານມາ ຜູ້ອາຍຸສູງໄດ້ປະກອບສ່ວນອັນສໍາຄັນໃນການສ້າງສາພັດທະນາປະເທດຊາດ ນັບແຕ່ອາດີດຈົນຮອດປັດຈຸບັນ. ພ້ອມນີ້, ລັດຖະບານກໍຍັງໄດ້ສຸມໃສ່ໃຫ້ການຊ່ວຍເຫຼືອ ແລະ ພັດທະນາທາງດ້ານເສດຖະກິດ, ຄອບຄົວ, ຊີວິດການເປັນຢູ່ຂອງຜູ້ອາຍຸສູງໃຫ້ໄດ້ຮັບການປັບປຸງທີ່ດີຂຶ້ນ ແລະ ມີສ່ວນຮ່ວມໃນການພັດທະນາເສດຖະກິດ-ສັງຄົມ ກໍຄືປະເທດຊາດ.

ຕາມສະຖິຕິອົງການສະຫະປະຊາຊາດ ໃຫ້ຮູ້ວ່າ: ປັດຈຸບັນ, ຜູ້ອາຍຸສູງນັບແຕ່ 60 ປີຂຶ້ນໄປ ໃນທົ່ວໂລກມີຈຳນວນເພີ່ມຂຶ້ນໃນແຕ່ລະປີ ຊຶ່ງສາຍເຫດອັນເນື່ອງມາຈາກການພັດທະນາການທາງດ້ານການແພດທີ່ມີຄວາມກ້າວໜ້າ ແລະ ທັນສະໄໝ ຄວບຄູ່ກັບຄວາມຮັບຜິດຊອບ ຂອງລັດຖະບານທີ່ມີນະໂຍບາຍ, ມີສະຫວັດດີການຕໍ່ຜູ້ສູງອາຍຸນັບມື້ນັບຍົກສູງຂຶ້ນ ບວກກັບຄວາມເປັນເຈົ້າການຂອງຜູ້ສູງອາຍຸ ກໍມີການພັດທະນາດີຂຶ້ນເລື້ອຍໆ.

ໂອກາດນີ້, ທ່ານ ເຫລັກໄຫລ ສີວິໄລ ໄດ້ກ່າວສະແດງຄວາມຮູ້ບຸນຄຸນ ມາຍັງພະນັກງານ-ອາດີດການຳຂອງແຂວງ-ເມືອງ ກໍຄືພະນັກງານອາວຸໂສບໍານານ ທີ່ໄດ້ປະກອບສ່ວນຢ່າງຕັ້ງໜ້າໃນການປົກປັກຮັກສາ ແລະ ພັດທະນາປະເທດຊາດ ກໍຄືແຂວງເຊກອງ ໃນໄລຍະຜ່ານ ແລະ ຈະສືບຕໍ່ສ້າງສາພັດທະນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກຂອງປະຊາຊົນ ໃຫ້ມີຊີວິດການເປັນຢູ່ດີຂຶ້ນ.

ການສະເຫຼີມສະຫຼອງຄັ້ງນີ້, ໄດ້ມີກິດຈະກຳ ກວດສຸຂະພາບບໍ່ເສຍຄ່າ ແລະ ຍ່າງເພື່ອສຸຂະພາບ ລວມໄລຍະທາງ ປະມານ 1 ກິໂລແມັດ.

(ຂ່າວ: ດາວສະຫວັນ)