ກອງປະຊຸມໃຫຍ່ ຄັ້ງທີ VII ຜູ້ແທນແມ່ຍິງເມືອງແກ່ນທ້າວ ແຂວງໄຊຍະບູລີ ໄດ້ອັດລົງດ້ວຍຜົນສໍາເລັດຢ່າງຈົບງາມໃນວັນທີ 19 ພະຈິກຜ່ານມາ, ຢູ່ທີ່ສະໂມສອນຫ້ອງວ່າການເມືອງ. ໂດຍການເປັນ ຂອງສະຫາຍ ນາງ ຄຳຜິວ ພັນທະວົງ ກໍາມະການພັກແຂວງ ຄະນະບໍລິຫານງານສູນກາງສະຫະພັນແມ່ຍິງລາວ ປະທານຄະນະບໍລິຫານງານສະຫະພັນແມ່ຍິງແຂວງ, ສະຫາຍ ຄໍາປຸ່ນ ນວນສະບັບ ວ່າການເລຂາຄະນະບໍລິຫານງານພັກເມືອງ ວ່າການເຈົ້າເມືອງແກ່ນທ້າວ, ສະຫາຍ ນາງ ມະນີວັນ ກັນດີ ກໍາມະການພັກເມືອງ ປະທານສະຫະພັນແມ່ຍິງເມືອງ, ມີແຂກຖືກເຊີນເຂົ້າຮ່ວມ.

ກອງປະຊຸມໄດ້ຮັບຟັງການຜ່ານຮ່າງລາຍງານການເມືອງທັງ 2 ພາກໂດຍໄດ້ຍົກໃຫ້ເຫັນວ່າ: ຄະນະສະຫະພັນແມ່ຍິງ ໄດ້ເອົາໃຈໃສ່ນໍາພາສະຫະພັນແມ່ຍິງແຕ່ລະຂັ້ນພາຍໃນເມືອງ, ກະກຽມ ແລະ ດໍາເນີນກອງປະຊຸມໃຫຍ່ຂອງໜ່ວຍ ແລະ ຮາກຖານທີ່ຂຶ້ນກັບ ຊຶ່ງມີ​ຜູ້​ເຂົ້າຮ່ວມ 4,000 ກວ່າສະຫາຍ, ​​ຍິງ3,950 ກວ່າສະຫາຍ ກວມ 97,29% ຂອງສະມາຊິກສະຫະພັນແມ່ຍິງທັງໝົດ. ປັດຈຸບັນມີສະມາຊິກສະຫະພັນແມ່ຍິງທັງໝົດ 4,200 ກວ່າສະຫາຍ ກວມ 35,53% ຂອງແມ່ຍິງທັງໝົດ, ມີພະນັກງານ-ລັດຖະກອນເພດຍິງ 260 ກວ່າສະຫາຍ ກວມ 39,85%, ເປັນສະມາຊິກພັກ 260 ກວ່າສະຫາຍ ກວມ 42,50%. ມີໜ່ວຍ, ຮາກຖານສະຫະພັນແມ່ຍິງຂຶ້ນກັບສະຫະພັນແມ່ຍິງເມືອງ 56 ຮາກຖານ.

ຈາກນັ້ນ, ສະຫາຍ ນາງ ຄໍາຜ້າຍ ພິມພິລາ ຮອງປະທານສະຫະພັນແມ່ຍິງເມືອງ ໄດ້ຜ່ານສະຫຼຸບການຈັດຕັ້ງປະຕິບັດແຜນພັດທະນາແມ່ຍິງ 5 ປີ (20219-2024 ແລະ ແຜນພັດທະນາ 5 ປີ ຕໍ່ໜ້າ (2025-2029), ຮັບຟັງການປະກອບຄໍາເຫັນຈາກແຂກ ແລະ ຜູ້ແທນກອງປະຊຸມ, ຜ່ານບົດສໍາຫຼວດການນໍາພາລວມ ຂອງຄະນະບໍລິຫານງານສະຫະພັນແມ່ຍິງເມືອງແກ່ນທ້າວ ສະໄໝທີ VI.

ກອງປະຊຸມ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງເມືອງແກ່ນທ້າວ ຊຸດໃໝ່ 19 ສະຫາຍ, ເລືອກເອົາສະຫາຍ ນາງ ຄໍາຜ້າຍ ພິມພິລາ ເປັນປະທານສະຫະພັນແມ່ຍິງເມືອງ, ສະຫາຍ ນາງ ປ໋ອກ ໄຊຍະວົງ ແລະ ສະຫາຍ ນາງ ພອນມາລາ ສະແຫວງຊັບ ເປັນຮອງປະທານ,​ ເລືອກເອົາສະຫາຍ ນາງ ປ໋ອກ ໄຊຍະວົງ ເປັນປະທານກວດກາສະຫະພັນແມ່ຍິງເມືອງ ແລະ ເລືອກເອົາຜູ້ແທນສົມບູນ-ສໍາຮອງ ໄປຮ່ວມກອງປະຊຸມໃຫຍ່ຜູ້ແທນແມ່ຍິງແຂວງໄຊຍະບູລີ ຈໍານວນ 10 ສະຫາຍ.ໃນນີ້, ຜູ້ແທນສໍາຮອງ 2 ສະຫາຍ.

(ແຫຼ່ງຂ່າວ: ເມືອງແກ່ນທ້າວ).