ກອງປະຊຸມບໍ່ເປັນທາງການຂອງລັດຖະມົນຕີປ້ອງກັນປະເທດອາຊຽນ-ອາເມຣິກາ​ ໄດ້ຈັດຂື້ນໃນວັນທີ​ 20​ ພະຈິກນີ້ ທີ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ​ ພົນເອກ​ ຈັນສະໝອນ​ ຈັນຍາລາດ ​ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ​ແຫ່ງ​ ສປປ ລາວ, ມີທ່ານ​ ຣອຍ​ ອອດສະຕິນ​ ລັດຖະມົນຕີ​ກະຊວງ​ປ້ອງກັນ​ປະເທດ​ແຫ່ງ​ ສ​ ອາເມຣິກາ, ​ມີ ບັນດາລັດຖະມົນຕີກະຊວງປ້ອງກັນປະເທດອາຊຽນ ແລະ​ ຕີມໍເລັດສະເຕ ເຂົ້າຮ່ວມ. ໃນກອງປະຊຸມສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ອາຊຽນ-ສະຫະລັດອາເມຣິກາ ຕະຫຼອດໄລຍະ ຜ່ານມາ ທີ່ໄດ້ຮັບການເສີມຂະຫຍາຍ, ກວມເອົາການຮ່ວມມືດ້ານການເມືອງ-ຄວາມໝັ້ນຄົງ, ດ້ານເສດຖະກິດ ແລະ ວັດທະນະທໍາ-ສັງຄົມ. ອັນໄດ້ສະທ້ອນໃຫ້ເຫັນໝາກຜົນ ຂອງການຮ່ວມມື ໃນໄລຍະຜ່ານມາ ແລະ ທ່າແຮງ ຂອງການຮ່ວມມືກັນ ໃນອະນາຄົດ ເພື່ອສືບຕໍ່ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ກໍຄືການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື. ສໍາລັບທິດທາງການຮ່ວມມືໃນຕໍ່ໜ້າ, ສປປ ລາວ ໄດ້ຊຸກຍູ້ໃຫ້ ສະຫະລັດອາເມຣິກາ ສືບຕໍ່ສະໜັບສະໜູນ ອາຊຽນໃນຂົງເຂດທີ່ສໍາຄັນ ເປັນຕົ້ນ: ການຄ້າ-ການລົງທຶນ, ສາທະລະນະສຸກ, ພະລັງງານສະອາດ, ການພັດທະນາຊັບພະຍາກອນມະນຸດ ໂດຍຜ່ານການແລກປ່ຽນດ້ານການສຶກສາ ແລະ ວັດທະນາທໍາ, ການສະໜອງທຶນຝຶກອົບຮົມໃນໄລຍະສັ້ນ, ໄລຍະຍາວ ແລະ ການສົ່ງເສີມໂຄງການດ້ານການພັດທະນາດ້ານສີມືແຮງງານ ໃນຂະແໜງການເຕັກໂນໂລຊີທີ່ທັນສະໄໝ, ດ້ານນະວັດຕະກໍາ ກໍຄື ປັນຍາປະດິດ ແລະ ດ້ານອື່ນໆ.

(ຂ່າວ-ພາບ: ບຸນຕອມ, ແສງຈັນ)