ຂ່າວຕ່າງປະເທດລາຍງານ ເມື່ອບໍ່ດົນມານີ້, ທີມງານນັກວິໄຈຂອງສະຖາບັນເຕັກໂນໂລຊີແມສຊາຊູເຊດ (MIT) ໃນລັດແມສຊາຊູເຊດຂອງສະຫະລັດອາເມຣິກາໄດ້ເປີດເຜີຍຜົນງານການອອກແບບໃໝ່ທີ່ອາດຈະຄວບຄຸມ ແລະ ໃຊ້ປະໂຫຍດຈາກຄວາມຮ້ອນຂອງດວງຕາເວັນສູງເຖິງ 40% ເພື່ອຜະລິດເຊື້ອໄຟໄຮໂດຣເຈນສະອາດ.

ຜົນການສຶກສາທີ່ເຜີຍແຜ່ຜ່ານວາລະສານໂຊລາ ເອັນເນີຈີ (Solar Energy Journal) ລະບຸວ່າ ທີມວິສາວະກອນຂອງ MIT ໄດ້ເຮັດການອອກແບບລະບົບທີ່ສາມາດຜະລິດໄຮໂດຣເຈນທາງອຸນຫະພູມທາງເຄມີ ຫຼື ເຄມີຄວາມຮ້ອນ (Thermochemical) ຈາກພະລັງງານແສງຕາເວັນ. ລະບົບດັ່ງກ່າວຄວບຄຸມ ແລະ ໃຊ້ປະໂຫຍດຈາກຄວາມຮ້ອນຂອງດວງຕາເວັນ ເພື່ອແຍກນ້ຳໂດຍກົງ ແລະ ຜະລິດໄຮໂດຣເຈນ ຊຶ່ງເປັນເຊື້ອໄຟສະອາດທີ່ສາມາດເປັນພະລັງງານຂັບເຄື່ອນລົດບັນທຸກ ເຮືອ ແລະ ເຮືອບິນໃນໄລຍະໄກ ໂດຍບໍ່ມີການປ່ອຍແກັສເຮືອນແກ້ວ. ອີກຢ່າງໜຶ່ງ, ລະບົບຜະລິດໄຮໂດຣເຈນແບບດັ້ງເດີມແມ່ນອາໄສເຊື້ອໄຟຟອສຊິວ ແຕ່ລະບົບໃໝ່ໃຊ້ພຽງພະລັງງານແສງຕາເວັນເທົ່ານັ້ນ.

ທ່ານ ອາເມດ ໂກເນີມ ອາຈານປະຈຳສາຂາວິຊາວິສະວະກຳເຄື່ອງກົນຈັກຂອງ MIT ຊຶ່ງເປັນຜູ້ຂຽນຜົນການສຶກສາອັນດັບທຳອິດເປີດເຜີຍວ່າ ໄຮໂດຣເຈນຖືວ່າເປັນເຊື້ອໄຟແຫ່ງອະນາຄົດ ໂດຍມີຄວາມຈຳເປັນຕ້ອງຜະລິດໄຮໂດຣເຈນໃຫ້ໄດ້ໃນຕົ້ນທຶນທີ່ຖືກ ແລະ ໄດ້ປະລິມານຫຼາຍ.