ຂ່າວສານຫວຽດນາມລາຍງານວ່າ: ວັນທີ 23 ຕຸລາຜ່ານມາ, ທ່ານ ຮິລິນ ເຟີນັນໂດ ລັດຖະມົນຕີກະຊວງການທ່ອງທ່ຽວ ສີລັງກາ ໃຫ້ຮູ້ວ່າ: ຄະນະລັດຖະບານໄດ້ອະນຸມັດໂຄງການຍົກເວັ້ນວີຊາທົດລອງສຳລັບພົນລະເມືອງ 7 ປະເທດ ລວມມີ: ອິນເດຍ, ຈີນ, ຣັດເຊຍ, ມາເລເຊຍ, ຍີ່ປຸ່ນ, ອິນໂດເນເຊຍ ແລະ ໄທ ຈະຖືກຍົກເວັ້ນວີຊາພາຍໃຕ້ໂຄງການທົດລອງທີ່ແກ່ຍາວເຖິງວັນທີ 31 ມີນາ 2024. ຕາມສື່ມວນຊົນທ້ອງຖິ່ນແລ້ວ, ຄະນະລັດຖະບານ ສີລັງກາ ຍັງໄດ້ສະເໜີໃຫ້ນຳໃຊ້ລະບົບປີ້ຍົນເອເລັກໂຕຣນິກຢູ່ບັນດາສະຖານທີ່ທ່ອງທ່ຽວໃນທົ່ວປະເທດໃນອະນາຄົດອັນໃກ້ໆນີ້.

ສີລັງກາ ເປັນປະເທດເກາະໃນອາຊີໃຕ້, ເອີ້ນວ່າ "ໄຂ່ມຸກຂອງມະຫາສະຫມຸດອິນເດຍ", ມີເສັ້ນທາງເຊື່ອມຕໍ່ທາງທະເລລະຫວ່າງອາຊີຕາເວັນຕົກ ແລະ ອາຊີໃຕ້. ປະເທດເກາະແຫ່ງນີ້ເປັນສູນກາງວັດທະນະທຳ ແລະ ພຸດທະສາສະ ໜາທີ່ເກົ່າແກ່, ມີຊື່ສຽງໃນການຜະລິດ ແລະ ສົ່ງອອກຊາ, ກາເຟ, ຢາງພາລາ ແລະ ໝາກພ້າວ. ຄວາມງາມທາງທໍາມະຊາດຂອງປ່າໄມ້ເຂດຮ້ອນ, ຫາດຊາຍ ແລະ ມໍລະດົກວັດທະນະທໍາເຮັດໃຫ້ປະເທດນີ້ເປັນຈຸດຫມາຍປາຍທາງທີ່ມີຊື່ສຽງຂອງນັກທ່ອງທ່ຽວທົ່ວໂລກ.

ຂະແໜງການທ່ອງທ່ຽວຂອງ ສີລັງກາ ຕັ້ງເປົ້າໝາຍດຶງດູດນັກທ່ອງທ່ຽວໃຫ້ໄດ້ 2 ລ້ານເທື່ອຄົນໃນປີ 2023, ຊຶ່ງສູງກວ່າເປົ້າໝາຍດຶງດູດນັກທ່ອງທ່ຽວ 1,5 ລ້ານເທື່ອຄົນໃນເມື່ອກ່ອນ.