ວັນທີ 21 ພະຈິກນີ້ ຢູ່ທີສະໂມສອນບ້ານນາສ້ານ ເມືອງບໍ່ແຕນ ແຂວງໄຊຍະບູລີ ຄະນະບໍລິຫານງານສະຫະພັນກຳມະບານເມືອບໍ່ແຕນ ໄດ້ຈັດພິທີສະຫຼຸບເນື້ອໃນຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານຂຶ້ນ ໂດຍການເຂົ້າຮ່ວມຂອງສະຫາຍ ອານຸສິດ ມະໂນສິນ ຮອງເລຂາພັກເມືອງ ຜູ້ຊີ້ນໍາວຽກພັກ-ພະນັກງານ ແລະ ອົງການຈັດຕັ້ງມະຫາຊົນ, ມີສະຫາຍ ສຸລິສັກ ຄຳອ່ອນ ຮອງປະທານສະຫະພັນກຳມະບານແຂວງ, ມີປະທານກໍາມະບານຮາກຖານອ້ອມຂ້າງເມືອງເຂົ້າຮ່ວມ.

ໃນພິທີ ສະຫາຍ ນາງ ເສີຍ ວິໄລທອງ ປະທານຄະນະບໍລິຫານງານສະຫະພັນກໍາມະບານເມືອງ ໄດ້ ຜ່ານບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າແຕ່ປີ 2019-2023 ແລະ ທິດທາງແຜນການ 5 ເປັນເຈົ້າ (ແຕ່ປີ 2024-2028). ທົ່ວເມືອງບໍ່ແຕນ ມີກໍາມະບານຮາກຖານທັງໝົດ 35 ຮາກຖານ, ໄດ້ຮັບຮອງ ແລະ ຢັ້ງຢືນກໍາມະບານ 5 ເປັນເຈົ້າ 5 ປີຕິດຕໍ່ກັນ 32 ຮາກຖານກວມເອົາ 91.42% ແລະ ໄດ້ຮັບຮອງເປັນເມືອງສະຫະພັນກໍາມະບານ 5 ເປັນເຈົ້າ, ທົ່ວເມືອງມີສະມາຊິກກຳມະບານທັງໝົດ 544 ສະຫາຍ, ຍິງ 226 ສະຫາຍ. ມີສະມາຊິກເຂົ້າຮ່ວມໃນການຕີລາຄາປະເມີນຈໍານວນ 544 ສະຫາຍ, ຍິງ 226 ສະຫາຍ, ຜ່ານການປະເມີນ ໄດ້ເປັນສະມາຊິກກໍາມະບານ 5 ເປັນເຈົ້າ 529 ສະຫາຍ, ຍິງ 226 ສະຫາຍ ກວມເອົາ 99.26%, ສາມາດປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າໃນແຕ່ລະຂໍ້ຄື: ຂໍ້ແຂ່ງທີ 1 ປະຕິບັດໄດ້ 91%, ຂໍ້ແຂ່ງຂັນທີ 2 ປະຕິບັດໄດ້ 90%, ຂໍ້ແຂ່ງຂັນທີ 3 ປະຕິບັດໄດ້ 90%, ຂໍ້ແຂ່ງຂັນ ທີ 4 ປະຕິບັດໄດ້ 91% ແລະ ຂໍ້ແຂ່ງທີ 5 ປະຕິບັດໄດ້ 92%.

ຕອນທ້າຍກໍ່ໄດ້ມອບໃບຮັບຮອງສະຫະພັນກໍາມະບານ 5 ເປັນເຈົ້າ ພ້ອມທັງໃບຍ້ອງຍໍ ໃຫ້ບຸກຄົນທີ່ມີຜົນງານດີເດັ່ນ ໃນການເຄື່ອນໄຫວວຽກງານກໍາມະບານໃນໄລຍະ 5 ຜ່ານມາ. ໃຫ້ກຽດມອບໂດຍສະຫາຍ ສຸລິສັກ ຄຳອ່ອນ ຮອງປະທານສະຫະພັນກຳມະບານແຂວງ ແລະ ເປັນກຽດຮັບໂດຍສະຫາຍ ນາງ ເສີຍ ວິໄລທອງ. ຈາກນັ້ນບັນດາຜູ້ເຂົ້າຮ່ວມກໍໄດ້ຮ່ວມກັນ ເປີດປ້າຍນາມມະຍົດ 5 ເປັນເຈົ້າ ຂອງສະຫະພັນກໍາມະບານເມືອງ ຕື່ມອີກ

(ຂ່າວ-ພາບ: ສາຍຄຳ ບຸນຍາວົງ)