ຂ່າວຕ່າງປະເທດລາຍງານ ເມື່ອວັນທີ 23 ສິງຫາຜ່ານມາ, ກະຊວງການທ່ອງທ່ຽວຂອງກຳປູເຈຍໄດ້ເປີດເຜີຍບົດລາຍງານໂດຍລະບຸວ່າ ກຳປູເຈຍໄດ້ຮັບລາງວັນກຽດຕິຍົດຈາກ World Travel Award 2023 ຈຳນວນ 2 ລາງວັນໄດ້ແກ່ ຈຸດໝາຍປາຍທາງໆວັດທະນະທຳຂັ້ນນຳຂອງອາຊີ ແລະ ຈຸດໝາຍປາຍທາງການເດີນທາງຂອງຄົນໜຸ່ມສາວຂັ້ນນຳຂອງອາຊີ.

ທ່ານ ທົບ ໂສພຽກ ໂຄສົກ ແລະ ລັດຖະມົນຕີກະຊວງການທ່ອງທ່ຽວຂອງກຳປູເຈຍກ່າວວ່າ ກຳປູເຈຍຖືວ່າເປັນຈຸດໝາຍປາຍທາງໆວັດທະນະທຳ ແລະ ນິເວດວິທະຍາ ໂດຍກຳປູເຈຍມີຊື່ສຽງຄື ອັງກໍວັດ ຊື່ງເປັນແຫຼ່ງມໍລະດົກໂລກໃນແຂວງສຽມລາດ ແລະ ອ່າວທະເລທີ່ສວຍງາມໃນແຂວງສີຫະນຸວິນ. ອີກຢ່າງໜຶ່ງ, ການທ່ອງທ່ຽວຖືວ່າເປັນໜຶ່ງໃນສີ່ເສົາຫຼັກຄ້ຳຈູນເສດຖະກິດກຳປູເຈຍ ໂດຍອີງຕາມຂໍ້ມູນຈາກກະຊວງການທ່ອງທ່ຽວຂອງກຳປູເຈຍລະບຸວ່າ ກຳປູເຈຍຕ້ອນຮັບນັກທ່ອງທ່ຽວຕ່າງຊາດປະມານ 3,5 ລ້ານຄົນ ໃນໄລຍະເດືອນມັງກອນເຖິງເດືອນສິງຫາຂອງປີນີ້ ຊຶ່ງເພີ່ມຂຶ້ນ 250,8% ເມື່ອທຽບແບບລາຍປີ.