ວິທະຍຸກະຈາຍສຽງຫວຽດນາມລາຍງານວ່າ: ວັນທີ 23 ຕຸລາ ຜ່ານມານີ້, ທ່ານ ບຸ່ຍຊວນເກື່ອງ ຮອງປະທານຄະນະກຳມະການປະຊາຊົນ ນະຄອນ ໂຮ່ຈີມິນ ໄດ້ຕ້ອນຮັບທ່ານ ໂດມິນິກ ພາຣາວິຊິນິ ລັດຖະມົນຕີກະຊວງເສດຖະກິດ, ການສຶກສາ ແລະ ຄົ້ນຄ້ວາ ປະເທດ ສະວິດ, ທີ່ພວມຢ້ຽມຢາມ ແລະ ເຮັດວຽກຢູ່ນະຄອນ ໂຮ່ຈີມິນ.

ຂ່າວລະບຸວ່າ: ທີ່ການຕ້ອນຮັບ, ທ່ານ ບຸ່ຍຊວນເກື່ອງ ຖືວ່າ: ການພົວພັນຮ່ວມມືລະຫວ່າງນະຄອນ ໂຮ່ຈີມິນ ແລະ ສະວິດ ຍັງມີຄວາມສາມາດໃນຫຼາຍຂົງເຂດເພື່ອພັດທະນາ, ພິເສດແມ່ນໃນຂົງເຂດທີ່ຕ່າງຝ່າຍຕ່າງມີຄວາມສົນໃຈ. ນະຄອນ ໂຮ່ຈີມິນ ພ້ອມແລ້ວທີ່ຈະຊຸກຍູ້ການຮ່ວມມືໃນບັນດາຂົງເຂດ ການພັດທະນາຕົວເມືອງຍືນຍົງ, ການເງິນ, ທະນາຄານ, ການສຶກສາບຳລຸງສ້າງ, ການແພດ. ນະຄອນ ໂຮ່ຈີມິນ ຍາມໃດກໍໃຫ້ການຕ້ອນຮັບ ແລະ ສ້າງທຸກເງື່ອນໄຂສະດວກ ໃຫ້ບັນດາວິສາຫະກິດ ສະວິດ ທີ່ເຂົ້າມາດຳເນີນທຸລະກິດ ແລະ ລົງທຶນຍາວນານຢູ່ນະຄອນ ໂຮ່ຈີມິນ.

ສ່ວນທ່ານ ໂດມິນິກ ພາຣາວິຊິນິ ໃຫ້ຮູ້ວ່າ: ກະຊວງເສດຖະກິດ, ການສຶກສາ ແລະ ຄົ້ນຄ້ວາ ສະວິດ ຈະມີການເຮັດວຽກກັບບັນດາວິສາຫະກິດ ສະວິດ ທີ່ພວມລົງທຶນຢູ່ນະຄອນ ໂຮ່ຈີມິນ ແນໃສ່ຊຸກຍູ້ບັນດາການເຄື່ອນໄຫວລົງທຶນ, ດຳເນີນທຸລະກິດຂອງວິສາຫະກິດ ສະວິດ ຢູ່ ຫວຽດນາມ. ທ່ານຍັງສະແດງຄວາມປາດຖະໜາວ່າ ການນຳ ນະຄອນໂຮ່ຈີມິນ ຈະສືບຕໍ່ສ້າງເງື່ອນໄຂ, ເອົາໃຈໃສ່ຊ່ວຍເຫຼືອບັນດາວິສາຫະກິດ ສະວິດ ເຂົ້າຮ່ວມບັນດາໂຄງການຢູ່ນະຄອນໃນຂົງເຂດ ພັດທະນາຕົວເມືອງແບບຍືນຍົງ, ການຄ້າ, ພະລັງງານທົດແທນ, ຄົມມະນາຄົມສີຂຽວ ແລະ ການເງິນ-ທະນາຄານ.