ພິທີລົງນາມເຊັນສັນຍາ ລະຫວ່າງ ກຸ່ມບໍລິສັດ ພົງສະຫວັນ ຈໍາກັດ ແລະ ບໍລິສັດ ອາຣຸບ ສິງກະໂປ ຈໍາກັດ (ARUP Singapore Pte Ltd) ເພື່ອສຶກສາຄວາມເປັນໄປໄດ້ໃນໂຄງການຮ່ວມລົງທຶນຂອງ ກຸ່ມບໍລິສັດ ພົງສະຫວັນ ຈຳກັດ ກັບລັດຖະບານ ສປປ ລາວ ເພື່ອປັບປຸງພັດທະນາ ການຄຸ້ມຄອງສະໜາມບິນສາກົນ ຂອງ ສປປ ລາວ ໄດ້ຈັດຂຶ້ນເມື່ອບໍ່ດົນມານີ້ ທີ່ໂຮງແຮມແລນມາກ ນະຄອນຫຼວງວຽງຈັນ, ຮ່ວມລົງນາມໃນຄັ້ງນີ້ ລະຫວ່າງ ທ່ານ ໄພບູນ ພົງສະຫວັນ ຮອງປະທານຄະນະກຳມະການຂາຮຸ້ນ ກຸ່ມບໍລິສັດພົງສະຫວັນ ຈຳກັດ ແລະ ບໍລິສັດ ອາຣຸບ ສິງກະໂປ ຈໍາກັດ (ARUP Singapore Pte Ltd) ຕາງໜ້າໂດຍ ທ່ານ ເຈສັນ ຊິມສັນ(Mr. Jason Simpson) ຜູ້ອໍານວຍການໃຫຍ່ ປະຈໍາຫ້ອງການປະເທດມຽນມາ, ປະເທດລາວ ແລະ ປະເທດໄທ ຂອງ ບໍລິສັດ ອາຣຸບ ສິງກະໂປ ຈຳກັດ ໂດຍເປັນກຽດເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ພ້ອມດ້ວຍບັນດາທ່ານຈາກກະຊວງ, ບໍລິສັດທີ່ກ່ຽວຂ້ອງເຂົ້າຮ່ວມ.
ໂຄງການຮ່ວມມືດັ່ງກ່າວນີ້ ຈະເປັນການປັບປຸງຍົກລະດັບຄຸນນະພາບການຄຸ້ມຄອງສະໜາມບິນສາກົນ ຂອງ ສປປ ລາວ ເຮັດໃຫ້ສະໜາມບິນຂອງປະເທດ ເປັນສະໜາມບິນທີ່ໄດ້ມາດຕະ ຖານສາກົນ ໂດຍພັດທະນາກິດຈະການຂົນສົ່ງທາງອາກາດຂອງປະເທດໃຫ້ຂະຫຍາຍຕົວ ເພື່ອໃຫ້ ສປປ ລາວ ເປັນສູນກາງການບິນຂອງພາກພື້ນເອເຊຍປາຊີຟິກ ແລະ ເຊື່ອມໂຍງກັບສາຍການບິນສາກົນ ທັງເປັນການສ້າງໃບໜ້າໃໜ່ໃຫ້ປະເທດ ໂດຍສ້າງສະພາບແວດລ້ອມທີ່ດຶງດູດນັກທ່ອງທ່ຽວໃຫ້ເຂົ້າມາຈັບຈ່າຍໃຊ້ສອຍ ກໍ່ໃຫ້ເກີດການໜູນວຽນ ແລະ ຟົດຟື້ນຂອງເສດຖະກິດພາຍໃນ ແລະ ທັງເປັນການເອື້ອອໍານວຍໃຫ້ນັກລົງທຶນຈາກສາກົນ ໃຫ້ເຂົ້າມາລົງທຶນອັນກໍ່ໃຫ້ເກີດຫົວໜ່ວຍທຸລະກິດຂະໜາດກາງ ແລະ ຂະໜາດໃຫຍ່ ຈຶ່ງເກີດມີການຈ້າງງານສ້າງອາຊີບວຽກເຮັດງານທໍາ ສ້າງລາຍຮັບໃຫ້ແກ່ປະຊາຊົນ ແລະ ປະເທດໃຫ້ມີເສດຖະກິດຂະຫຍາຍຕົວຢ່າງກ້າວກະໂດດ.
ການເຊັນສັນຍາໃນຄັ້ງນີ້ ແມ່ນມີຄວາມໝາຍ ແລະ ຄວາມສຳຄັນ ແລະ ເປັນການຈັດຕັ້ງຜັນຂະຫຍາຍເນື້ອໃນຈິດໃຈຂອງບົດບັນທຶກຄວາມເຂົ້າໃຈ (MOU) ລະຫວ່າງ ກະຊວງໂຍທາທິການ ແລະ ຂົນສົ່ງ ຕາງໜ້າໂດຍກົມການບິນພົນລະເຮືອນ ແລະ ກຸ່ມບໍລິສັດພົງສະຫວັນ ຈຳກັດ ຊຶ່ງໄດ້ເຊັນຮ່ວມກັນ ໃນຄັ້ງວັນທີ 22 ມິຖຸນາ 2022 ຜ່ານມາ. ສະນັ້ນ ເພື່ອດໍາເນີນການຈັດຕັ້ງປະຕິບັດເກັບກຳຂໍ້ມູນຕົວຈິງ ສ້າງບົດວິພາກເສດຖະກິດ - ເຕັກນິກ (FS), ມາຮອດປັດຈຸບັນ ທາງກຸ່ມບໍລິສັດພົງສະຫວັນ ຈໍາກັດ ຈຶ່ງໄດ້ຄັດເລືອກເອົາ ບໍລິສັດ ອາຣຸບ ສິງກະໂປ ຈຳກັດ ຊຶ່ງເປັນບໍລິສັດທີ່ປຶກສາ ວິສະວະກໍາອອກແບບ ທີ່ມີຊື່ສຽງລະດັບສາກົນ ເປັນຜູ້ໃຫ້ບໍລິການສຶກສາຄວາມເປັນໄປໄດ້ໃນການອອກແບບໂຄງການປັບປຸງ ພັດທະນາລະບົບການຄຸ້ມຄອງສະໜາມບິນໃຫ້ມີປະສິດທິພາບ ແລະ ປະສິດທິຜົນສູງຂຶ້ນ ທັງເປັນການຍົກລະດັບຄຸນນະພາບດ້ານການບໍລິການ, ການຄຸ້ມຄອງບໍລິຫານດ້ານເຕັກນິກວິຊາການ ແລະ ອື່ນໆ ຂອງສະໜາມບິນໃຫ້ເປັນມາດຕະຖານສາກົນ. ບໍລິສັດ ອາຣຸບ ສິງກະໂປ ຈຳກັດ ແມ່ນບໍລິສັດທີ່ມີປະສົບການ ແລະຄວາມສຳນິຊໍານານສູງທາງດ້ານວິສະວະກຳອອກແບບສະໜາມບິນ ແລະ ການພັດທະນາການບິນມາເປັນເວລາຫຼາຍກວ່າ 60 ປີ, ພ້ອມທັງມີສາຍພົວພັນອັນຍາວນານກັບຫຼາຍສະໜາມບິນຊັ້ນນໍາໃນທົ່ວໂລກ, ບໍລິສັດໃຫ້ຄໍາແນະນໍາກ່ຽວກັບການລົງທຶນ ແລະ ວາງແຜນ, ການອອກແບບດ້ານການປະຕິບັດງານທາງວິຊາການ, ການປັບປຸງປະສິດທິພາບສະໜາມບິນໂດຍນຳໃຊ້ເຕັກໂນໂລຊີສະໄໝໃໝ່ທີ່ສະໜັບສະໜູນການອະນຸລັກສິ່ງແວດລ້ອມແບບຍືນຍົງ. ພ້ອມທັງໃຫ້ຄຳປຶກສາດ້ານການວາງແຜນການຄຸ້ມຄອງສະໜາມບິນ, ການວາງແຜນຍຸດທະສາດທາງດ້ານທຸລະກິດ-ການເງິນ ແລະ ອອກແບບໂຄງສ້າງພື້ນຖານການບິນແບບຍືນຍົງໃນທົ່ວໂລກ.
ຂ່າວ-ພາບ: ຍຸພິນທອງ
