ຂ່າວຕ່າງປະເທດລາຍງານ ໃນວັນທີ 26 ຕຸລາ ຜ່ານມາ, ມູນິທິໂຈເຊບ ຣາວນະທີ (Joseph Rowntree Foundation) ໄດ້ເປີດເຜີຍບົດລາຍງານໂດຍລະບຸວ່າ: ປະຊາຊົນໃນອັງກິດປະມານ 3,8 ລ້ານຄົນ ຊຶ່ງລວມເຖິງເດັກນ້ອຍ 1 ລ້ານຄົນໃຊ້ຊີວິດຢູ່ກັບຄວາມອຶດຫິວ ໃນປີ 2022.

ມູນນິທິ Joseph Rowntree Foundation ຊຶ່ງເປັນໜຶ່ງໃນອົງກອນການກຸສົນທີ່ມີຊື່ສຽງທີ່ສຸດໃນອັງກິດໄດ້ເປີດເຜີຍບົດລາຍງານຈຳນວນດັ່ງກ່າວຄິດເປັນເກືອບ 2,5 ເທົ່າຂອງຈຳນວນຄົນທຸກຍາກໃນປີ 2017 ແລະ ເພີ່ມຂຶ້ນເກືອບ 3 ເທົ່າໃນກຸ່ມປະຊາກອນເດັກນ້ອຍ ເຮັດໃຫ້ການຈັດການກັບຄວາມທຸກຍາກໃນອັງກິດກາຍເປັນເລື່ອງຈຳເປັນທີ່ຮີບດ່ວນ. ບົດລາຍງານລະບຸວ່າ: ລະດັບຄວາມທຸກຍາກໃນອັງກິດເພີ່ມສູງຂຶ້ນ ໂດຍຜູ້ຄົນຈຳນວນຫຼາຍຕ້ອງດິ້ນຮົນຫາເງິນມາຕອບສະໜອງຕໍ່ຄວາມຕ້ອງການທາງກາຍຍະພາບຂັ້ນພື້ນຖານ ທັງເຮັດໃຫ້ຮ່າງກາຍອົບອຸ່ນບໍ່ປຽກຝົນ, ສະອາດ ແລະ ອີ່ມທ້ອງ. ບົດລາຍງານລະບຸຕື່ມວ່າ: ສິ່ງເຫຼົ່ານີ້ມີຜົນກະທົບຕໍ່ສຸຂະພາບກາຍ, ສຸຂະພາບຈິດ ແລະ ໂອກາດຂອງປະຊາຊົນ ແລະ ຍັງສ້າງຄວາມກັງວົນໃຫ້ແກ່ການບໍລິການຕ່າງໆທີ່ແບກຮັບພາລະຫຼາຍເກີນໄປຢູ່ແລ້ວ ໂດຍເກືອບ 3 ໃນ 4 ຂອງປະຊາຊົນທີ່ພົບກັບຄວາມທຸກຍາກຢູ່ໃນລະຫວ່າງການຮັບເງິນປະກັນສັງຄົມ ຊຶ່ງສະທ້ອນເຖິງສິດທິປະໂຫຍດທີ່ບໍ່ພຽງພໍ. ສ່ວນການສະໜັບສະໜູນສະເພາະກິດຈາກລັດຖະບານອັງກິດ ຊຶ່ງມີຂຶ້ນຄັ້ງທຳອິດເມື່ອໄລຍະການແຜ່ລະບາດຂອງພະຍາດໂຄວິດ-19 ແລະ ກຳລັງຊ່ວຍເລື່ອງຄ່າຄອງຊີບຢູ່ໃນຂະນະນີ້ ຍັງບໍ່ສາມາດຢຸດຢັ້ງລະດັບຄວາມອຶດຫິວທີ່ເພີ່ມຂຶ້ນໄດ້.

ບົດລາຍງານແນະນຳໃຫ້ມີການປະຕິຮູບລະບົບປະກັນສັງຄົມຂອງອັງກິດຢ່າງກວ້າງຂວາງຂຶ້ນ ແລະ ຮັບຮອງການຈັດສັນຄວາມຊ່ວຍເຫຼືອດ້ານການເງິນສຸກເສີນສຳລັບການຈັດການກັບໜີ້ສິນ ສະຫວັດດີການ ແລະ ບັນຫາທີ່ຢູ່ອາໄສທີ່ເຮັດໃຫ້ປະຊາຊົນອຶດຫິວ.