ທ່ານ ສົມພອນ ສອນດາລາ ຫົວໜ້າພະແນກສຶກສາທິການແລະກິລານະຄອນຫຼວງວຽງຈັນ (ນວ)ໄດ້ລາຍງານໃຫ້ຮູ້ກ່ຽວກັບການກະກຽມຈັດຕັ້ງສອບເສັງພາກຮຽນ I ຊັ້ນປະຖົມສຶກສາແລະຊັ້ນມັດທະຍົມສຶກສາທົ່ວນວປະຈຳສົກຮຽນ 2024-2025 ໃນວັນທີ 9 ມັງກອນຜ່ານມາວ່າ: ທົ່ວນວ ມີໂຮງຮຽນຊັ້ນປະຖົມສຶກສາທັງໝົດ 542 ແຫ່ງ,ມີໂຮງຮຽນລັດ 321ແຫ່ງ, ໂຮງຮຽນມູນລະປະຖົມ12 ແຫ່ງແລະ ໂຮງຮຽນເອກະຊົນທັງໝົດ209 ແຫ່ງ. ມີຈຳນວນນັກຮຽນຊັ້ນປະຖົມສຶກສາທັງໝົດ 80,456 ຄົນຍິງ 39,426 ຄົນ. ໂຮງຮຽນຊັ້ນມັດທະຍົມສຶກສາມີທັງໝົດ 205 ແຫ່ງ, ໂຮງຮຽນລັດມີ 107 ແຫ່ງ, ເອກະຊົນມີ98 ແຫ່ງ,ມີຈຳນວນນັກຮຽນຊັ້ນມັດທະຍົມສຶກສາທັງໝົດ 87,543 ຄົນຍິງ 43,496 ຄົນ.
ສຳລັບການສອບເສັງ ຊັ້ນປະຖົມສຶກສາເລີ່ມສອບເສັງນັບແຕ່ວັນທີ 13-15 ມັງກອນ 2025, ວັນທີ 16-24 ມັງກອນ 2025ນັກຮຽນພັກພາກຮຽນທີ I, ວັນທີ 27 ມັງກອນ 2025 ເລີ່ມເຂົ້າຮຽນພາກຮຽນທີ II; ຊັ້ນມັດທະຍົມສຶກສາເລີ່ມສອບເສັງນັບແຕ່ວັນທີ 13-17 ມັງກອນ 2025, ວັນທີ 20-24 ມັງກອນ 2025 ນັກຮຽນພັກພາກຮຽນທີ I, ວັນທີ 27 ມັງກອນ 2025 ເລີ່ມເຂົ້າຮຽນພາກຮຽນທີ II.
ທ່ານ ສົມພອນ ສອນດາລາ ກ່າວໃຫ້ຮູ້ອີກວ່າ: ເພື່ອກະກຽມການສອບເສັງພະແນກສຶກສາທິການ
ແລະກິລານວໄດ້ອອກແຈ້ງການຫາຫ້ອງການສຶກສາທິການແລະກິລາເມືອງ, ໂຮງຮຽນຕ່າງໆໃນນວເພື່ອຈັດຕັ້ງການສອບເສັງພາກຮຽນທີ I;ເປັນຕົ້ນແມ່ນການເບິ່ງຄືນທາງດ້ານສະຖານທີ່, ໂຕະຕັ່ງແລະການຈັດຫ້ອງສອບເສັງຕ່າງໆໃຫ້ມີຄວາມເປັນລະບຽບຮຽບຮ້ອຍ, ຫ້ອງການສຶກສາທິການແລະກິລາເມືອງ9 ເມືອງໃນນວໄດ້ລົງຕາມຕິດແລະເປັນຜູ້ຮັບຜິດຊອບໃນການຈັດຕັ້ງການສອບເສັງພາກຮຽນທີ I ພາຍໃນເມືອງຂອງຕົນໂດຍສົມທົບກັບຄະນະພັດທະນາສຶກສາຂັ້ນບ້ານ;ສຳລັບສະຖານທີ່ໃນການຈັດຕັ້ງສອບເສັງພາກຮຽນ I ແມ່ນຂຶ້ນກັບຫ້ອງການສຶກສາທິການແລະກິລາເມືອງເປັນຜູ້ຮັບຜິດຊອບ(ຊັ້ນປະຖົມສຶກສາ) ລວມທັງການອອກຫົວບົດສອບເສັງແລະການກວດບົດຕ່າງໆ. ສ່ວນຊັ້ນມັດທະຍົມສຶກສາໂຮງຮຽນເປັນຜູ້ຮັບຜິດຊອບລວມທັງການອອກຫົວບົດສອບເສັງແລະການກວດບົດຕ່າງໆ;ພະແນກສຶກສາທິການແລະກິລານວໄດ້ຂຶ້ນແຜນໃນການລົງຕິດຕາມການສອບເສັງພາກຮຽນ I ພາຍໃນນວໂດຍແບ່ງອອກເປັນ 5 ກຸ່ມເພື່ອຕິດຕາມການສອບເສັງໃຫ້ໄດ້ຮັບຜົນດີ;ຊັ້ນປະຖົມສຶກສາປີທີ 5 ແມ່ນໄດ້ອອກຕາຕະລາງສອບເສັງໃຫ້ແລະກຳນົດວັນສອບເສັງຊຶ່ງເອກະພາບກັນທົ່ວນວສອບເສັງວັນທີ 14-15 ມັງກອນ 2025. ສອບເສັງມື້ທຳອິດວັນທີ 14 ມັງກອນ 2025 ຕອນເຊົ້າວິຊາຫັດແຕ່ງແລະຕອນບ່າຍຂຽນຫວາຍ+ຄຳຖາມ. ມື້ທີສອງວັນທີ 15 ມັງກອນ 2025 ຕອນເຊົ້າຄະນິດສາດແລະຕອນບ່າຍວິທະຍາສາດແລະສິ່ງແວດລ້ອມ;ສຳລັບເມືອງຈັນທະບູລີຂໍສອບເສັງເລື່ອນໄປເປັນວັນທີ 20-24 ມັງກອນ 2025 ທຸກຊັ້ນພາຍໃນເມືອງເນື່ອງຈາກມີກອງປະຊຸມອົງຄະນະພັກເມືອງ;ຫຼັງຈາກສຳເລັດການຈັດສອບເສັງພາກຮຽນ I ແລ້ວໃຫ້ລາຍງານມາຍັງຫ້ອງການສຶກສາທິການແລະກິລາເມືອງ, ພະແນກສຶກສາທິການແລະກິລານວບໍ່ໃຫ້ກາຍວັນທີ 27 ມັງກອນ 2025.
ຂ່າວ-ພາບ: ພູວັນ
