ຂ່າວຕ່າງປະເທດລາຍງານ ໃນວັນທີ 21 ມັງກອນ ຜ່ານມາວ່າ: ສິງກະໂປ ສະເໜີມາດຕະການທີ່ເຂັ້ມງວດເພື່ອຄວບຄຸມການໃຊ້ເວລາກັບໜ້າຈໍຂອງເດັກນ້ອຍກ່ອນໄວຮຽນ ແລະໂຮງຮຽນ ຊຶ່ງເປັນສ່ວນ ໜຶ່ງຂອງໂຄງການລິເລີ່ມດ້ານສຸຂະພາບໂດຍຫຼາຍກະຊວງ.
ຖະແຫຼງການຮ່ວມຈາກກະຊວງສາທາລະນະສຸກ, ກະຊວງສຶກສາ, ກະຊວງການພັດທະນາສັງຄົມ ແລະ ຄອບຄົວ ຂອງສິງກະໂປ ລະບຸວ່າ:ນັບແຕ່ວັນທີ 1 ກຸມພາ 2025 ເປັນຕົ້ນໄປ, ສູນພັດທະນາເດັກກ່ອນໄວຮຽນຈະບັງຄັບໃຊ້ກົດລະບຽບສະບັບປັບປຸງທີ່ຫ້າມການໃຊ້ເວລາກັບໜ້າຈໍສຳລັບເດັກອາຍຸຕ່ຳກວ່າ 18 ເດືອນ ແລະ ຈຳກັດການໃຊ້ເວລາກັບໜ້າຈໍສະເພາະໃນການຮຽນ-ການສອນ ສຳລັບເດັກອາຍຸ 18 ເດືອນຫາ 6 ປີ.
ເຈົ້າໜ້າທີ່ຈະແນະນໍາໃຫ້ຄູສອນສຸມໃສ່ຄວາມສຳຄັນກັບປະສົບການທີ່ມີຄວາມໝາຍຫຼາຍກວ່າການເຮັດກິດຈະກໍາທີ່ນັ່ງຢູ່ເຊັ່ນ: ການໃຊ້ເວລາກັບໜ້າຈໍເປັນເວລາດົນນານຫຼືນັ່ງຢູ່ໂດຍບໍ່ເຄື່ອນໄຫວ. ຂະນະທີ່ໂຮງຮຽນປະຖົມແລະມັດທະຍົມໄດ້ນຳມາດຕະການທີ່ຄ້າຍຄືກັນນີ້ມາໃຊ້. ໂດຍກຳນົດໃຫ້ນັກຮຽນຕ້ອງເກັບຮັກສາໂທລະສັບຂອງຕົນເອງໃນພື້ນທີ່ໆກໍານົດໃນລະຫວ່າງການຮຽນແລະຈໍາກັດການນໍາໃຊ້ອຸປະກອນການສື່ສານໃຫ້ຢູ່ໃນເວລາຫຼືສະຖານທີ່ໆກໍານົດໄວ້ເຊັ່ນ: ໃນເວລາພັກຜ່ອນຫຼືຫຼັງຈາກເລີກໂຮງຮຽນ.
ກະຊວງສາທາລະນະສຸກໄດ້ປັບປ່ຽນຄຳແນະນຳສຳລັບຜູ້ປົກຄອງ, ໂດຍແນະນຳໃຫ້ເດັກນ້ອຍອາຍຸ 3-6 ປີ ໃຊ້ເວລາກັບໜ້າຈໍບໍ່ເກີນ 1 ຊົ່ວໂມງຕໍ່ມື້ ແລະ ເດັກອາຍຸ 7-12 ປີ ໃຊ້ເວລາກັບໜ້າຈໍບໍ່ເກີນ 2 ຊົ່ວໂມງຕໍ່ມື້ ຊຶ່ງບໍ່ລວມວຽກບ້ານ. ພ້ອມທັງຮຽກຮ້ອງໃຫ້ຜູ້ປົກຄອງຈໍາກັດການເຂົ້າເຖິງອຸປະກອນມືຖືແລະສື່ສັງຄົມອອນລາຍຂອງເດັກນ້ອຍ.
ມາດຕະການເຫຼົ່ານີ້ແມ່ນສ່ວນໜຶ່ງຂອງໂຄງການ Grow Well SG ຊຶ່ງເປັນແຜນຍຸດທະສາດສົ່ງເສີມສຸຂະພາບແຫ່ງຊາດໂດຍສາມກະຊວງ, ໂດຍມີຈຸດປະສົງເພື່ອສົ່ງເສີມການດໍາລົງຊີວິດທີ່ດີຕໍ່ສຸຂະພາບແລະການເບິ່ງແຍງປ້ອງກັນສໍາລັບເດັກນ້ອຍ, ໂດຍເນັ້ນຄວາມສຳຄັນການປັບປຸງດ້ານໂພຊະນາການ, ພຶດຕິກໍາການນອນ, ປະສົບການການຮຽນຮູ້ ແລະກິດຈະກໍາທາງດ້ານຮ່າງກາຍ.
ການຄົ້ນຄວ້າຊີ້ໃຫ້ເຫັນວ່າ: ການໃຊ້ເວລາໜ້າກັບຈໍຫຼາຍເກີນໄປສາມາດສົ່ງຜົນກະທົບຕໍ່ການພັດທະນາທາງປັນຍາ ແລະ ທັກສະທາງພາສາ, ສຸຂະພາບຈິດ, ສຸຂະພາບທາງດ້ານຮ່າງກາຍ ຂອງເດັກ. ເຖິງແມ່ນວ່າເດັກນ້ອຍສ່ວນໃຫຍ່ໃນສິງກະໂປຈະມີສຸຂະພາບແຂງແຮງ, ແຕ່ການໃຊ້ເວລາກັບໜ້າຈໍທີ່ຍາວນານແລະການດຳລົງຊີວິດແບບເຊື່ອງຊ້າ ເປັນອັນຕະລາຍຕໍ່ການພັດທະນາໂດຍລວມຂອງເດັກ.
ປະຈຸບັນ, ໂຄງການດັ່ງກ່າວແມ່ນສຸມໃສ່ເດັກນ້ອຍອາຍຸ 12 ປີ ຫຼື ຕ່ໍາກວ່າແລະວາງແຜນທີ່ຈະຂະຫຍາຍໄປສູ່ກຸ່ມອາຍຸອື່ນໆ ຫຼາຍຂຶ້ນໃນອະນາຄົດ.
