ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ (20 ມັງກອນ 1949 - 20 ມັງກອນ 2025), ໃນລະຫວ່າງວັນທີ 20-22 ມັງກອນ 2025 ນີ້, ການນໍາເມືອງທຸລະຄົມ ແຂວງວຽງຈັນ ໄດ້ເຕົ້າໂຮມຄະນະພັກ, ຫົວໜ້າຫ້ອງການ, ອົງການ, ກົມກອງ, ກຸ່ມບ້ານ, ບ້ານ, ລັດວິສາຫະກິດ, ທະນາຄານ ແລະ ພາກທຸລະກິດຕ່າງໆ ເພື່ອໄປອວຍພອນ, ໃຫ້ກໍາລັງໃຈ, ຖາມຂ່າວຄາວ, ພົບປະສາມັກຄີຕໍ່ນາຍ ແລະ ພົນທະຫານ ຢູ່ກອງບັນຊາການທະຫານເມືອງ, ກອງພັນໃຫຍ່ 497, ກອງພັນນ້ອຍທະຫານຮາບ 901 ແລະ ຢູ່ເຂື່ອນໄຟຟ້າ ນໍ້າມັງ 3.

ການໄປອວຍພອນນາຍ ແລະ ພົນທະຫານ ກໍຄືພະນັກງານນັກຮົບຂອງກໍາລັງປ້ອງກັນຊາດຢູ່ເມືອງທຸລະຄົມ ໃນແຕ່ລະປີ ເພື່ອໃຫ້ມີເນື້ອໃນຄວາມໝາຍຄວາມສໍາຄັນ, ມີຄວາມເອກະພາບກັນ, ເປັນຂະບວນການຟົດຟື້ນທົ່ວສັງຄົມ, ໃຫ້ທຸກພາກສ່ວນມີສ່ວນຮ່ວມ ແລະ ເພື່ອປະຕິບັດຕາມແຈ້ງການຂອງຂັ້ນເທິງ, ອົງການປົກຄອງເມືອງ ໄດ້ອອກແຈ້ງການຂອງທ່ານເຈົ້າເມືອງເຖິງ ພາກສ່ວນຕ່າງໆຢູ່ພາຍໃນເມືອງໃຫ້ຮັບຮູ້ ແລະ ໄປຮ່ວມອວຍພອນ ຄືກັບທຸກໆປີ. ພ້ອມທັງໄດ້ຈັດພິທີປາຖະກະຖາເລົ່າປະຫວັດມູນເຊື້ອວັນກໍາເນີດສ້າງຕັ້ງ, ເຕີບໃຫຍ່ຂະຫຍາຍຕົວ ແລະ ບັນດາຜົນງານຂອງກອງທັບ ຕະຫຼອດໄລຍະຜ່ານມາ ໂດຍເປົ້າໝາຍເຮັດໃຫ້ສະມາຊິກພັກ, ພະນັກງານ, ການຈັດຕັ້ງທຸກຂັ້ນ ແລະ ທຸກພາກສ່ວນຮັບຮູ້ເຂົ້າໃຈ ເຫັນໄດ້ຄວາມໝາຍຄວາມສໍາຄັນຂອງວັນດັ່ງກ່າວ.

(ແຫຼ່ງຂ່າວ:​ ເມືອງທຸລະຄົມ)