ໂດຍ: ຕະວິນຍານ

ແຂວງໄຊຍະບູລີຖືສໍາຄັນ ແລະ ເຫັນທ່າແຮງບົ່ມຊ້ອນຂອງຊາວກະສິກອນໃນການຜະລິດກະສິກໍາເປັນສິນຄ້າສົ່ງອອກ.ໃນໄລຍະຜ່ານມາ,ເຖິງວ່າຊາວກະສິກອນຜະລິດພືດກະສິກໍາສົ່ງອອກໄດ້ ແຕ່ມີລັກສະນະກະແຈກກະຈາຍ,ເຮັດພໍໃຜພໍລາວ,ການຜະລິດບໍ່ມີຈຸດສຸມ,ຜະລິດໄດ້ໜ້ອຍ ແລະ ພົບບັນຫາອື່ນໆອີກ.

ເພື່ອເຮັດໃຫ້ການຜະລິດກະສິກໍາຂອງປະຊາຊົນມີຈຸດສຸມ,ໂດຍອີງໃສ່ມູນເຊື້ອ,ສະພາບຈຸດພິເສດ,ສະພາບແວດລ້ອມ,ເງື່ອນໄຂຂອງຊາວກະສິກອນຢູ່ແຕ່ລະເມືອງ ແລະ ຄວາມຕ້ອງການຂອງຕະຫຼາດ ພະແນກກະສິກໍາແຂວງໄຊຍະບູລີ ຈຶ່ງໄດ້ຈັດຕັ້ງກຸ່ມຜະລິດກະສິກໍາ ໂດຍເລັ່ງໃສ່ເຂດທີ່ມີເງື່ອນໄຂຕິດພັນກັບໂຄງການ.

ໃນໄລຍະຜ່ານມາ ຈົນມາຮອດປັດຈຸບັນ,ແຂວງໄຊຍະບູລີ ສາມາດສ້າງ ແລະ ປັບປຸງກຸ່ມຜະລິດກະສິກໍາໄດ້ທັງໝົດ 395 ກຸ່ມ, ສະ​ເພາະ​ປີ 2024 ສ້າງ​ຕັ້ງ​ໄດ້ 2 ກຸ່ມ​ຄື:ກຸ່ມ​ປູກ​ພືດ​ມູນ​ຄ່າ​ສູງ​ຂອງ​ໂຄງ​ການພັດ​ທະ​ນາ​ພື້ນ​ຖານ​ໂຄງ​ລ່າງ​ຊົນ​ນະ​ບົດນ້ຳ​ພ​ຽງ ເບີ 1 ແລະ ນໍ້າ​ພຽງ​ເບີ 2 ບ້ານ​ໂພນ​ຫີນ ໃນນີ້,ມີກຸ່ມປູກ 209ກຸ່ມ, ກຸ່ມລ້ຽງສັດມີ 91 ກຸ່ມ, ກຸ່ມປຸງແຕ່ງມີ 1 ກຸ່ມ ແລະ ກຸ່ມນຳ​ໃຊ້​ນໍ້າ​ຊົນ​ລະ​ປະ​ທານ 93 ກຸ່ມ. ສ້າງຄອບຄົວຕົວແບບດ້ານກະສິກໍາໄດ້ 167 ບ້ານ, ມີ247 ຄອບຄົວ, ໃນນັ້ນ: ມີຕົວແບບດ້ານການລ້ຽງສັດ99 ຄອບຄົວ, ຕົວແບບດ້ານການປູກຝັງ 148 ຄອບຄົວແລະຟາມແບບຢ່າງກະສິກໍາມີ30 ຟາມ;ສ້າງວິຊາການບ້ານດ້ານກະສິກໍາໄດ້ 282 ບ້ານ, ມີ 1.280 ຄົນ, ລ້ຽງສັດ-ສັດຕະວະແພດ 338 ຄົນ, ປູກຝັງ 224 ຄົນ, ຊົນລະປະທານ 182 ຄົນ ແລະ ປ່າໄມ້ 419 ຄົນ.

ໄປຄຽງຄູ່ກັນນັ້ນ,ແຂວງຍັງໄດ້ຈັດກອງປະຊຸມບ້ານແບບຢ່າງກະສິກໍາ 6 ເດືອນຕົ້ນປີ 2024 ເພື່ອຖອດຖອນບົດຮຽນ ແລະ ປັບປຸງຂໍ້ຄົງຄ້າງຕ່າງໆ,ປັບປຸງບົດແນະນໍາສະບັບເລກທີ 333 ກ່ຽວກັບການສ້າງບ້ານແບບຢ່າງກະສິກໍາ,ສ້າງແຜນວຽກຈຸດສຸມເພື່ອສຸມໃສ່ປະຕິບັດມາດຖານທີ່ຍັງບໍ່ຜ່ານ,ສ້າງເງື່ອນໄຂໃຫ້ຄົບຕາມມາດຕະຖານຂອງບ້ານແບບຢ່າງເພື່ອສະເໜີຮັບຮອງຕາມຂັ້ນຕອນ,ຄວາມຄືບໜ້າຂອງການຈັດຕັ້ງປະຕິບັດ.ປັດຈຸບັນ,ບາງເມືອງຍັງຢູ່ໃນຂະບວນການເຜີຍແຜ່ເຊື່ອມຊຶມເອກະສານຢູ່ບ້ານເປົ້າໝາຍ,ສ້າງຂໍ້ແຂ່ງຂັນຄອບຄົວຕົວແບບກະສິກໍາ,ບາງເມືອງພວມຈັດຕັ້ງປະຕິບັດກິດຈະກໍາຂໍ້ແຂ່ງຂັນຄອບຄົວຕົວແບບ.

ໃນເວລາດຽວກັນ,ພະແນກກະສິກໍາແຂວງ ຍັງລົງຕິດຕາມການສ້າງເຮືອນຮົ່ມຈໍານວນ 35 ຫຼັງ,ຢູ່ 4 ບ້ານ ຄື: ບ້ານນາຊິງ,ນາຕານ,ນາໂສມ ແລະ ໜອງບົວຊາຍຂຶ້ນກັບເມືອງພຽງ,ມີເນື້ອທີ່ 1,728 ຕາແມັດ,ທຽບໃສ່ແຜນປະຕິບັດໄດ້ 100%;ລົງຊຸກຍູ້ການສ້ອມແປງເຮືອນຮົ່ມ (ຕິດຕັ້ງເສົາ, ໂຄງເຮືອນ ແລະ ຫຼັງຄາ) ຢູ່ກອງພັນ 609 ໄດ້ຈໍານວນ 12 ຫຼັງ ທຽບໃສ່ແຜນການປະຕິບັດໄດ້ 100%,ຕິດຕາມການປຸກສ້າງ-ສ້ອມແປງເຮືອນຮົ່ມຢູ່ຄຸມຂັງແຂວງ ຈໍານວນ 20 ຫຼັງ ໃນນີ້ໄດ້ມຸງສໍາເລັດ 8 ຫຼັງ,ຊຸກຍູ້ການປຸກສ້າງເຮືອນຮົ່ມຢູ່ໂຮງຮຽນພັດທະນາພົນລະເມືອງດີດອນຫຼຶງເມືອງປາກລາຍມີຈໍານວນ 6 ຫຼັງສໍາເລັດແລ້ວ 1 ຫຼັງ.ສໍາເລັດການສ້າງເຮືອນຮົ່ມທົດລອງປູກຜັກ (Hydroponic) 1 ຫຼັງ, ກ້າເບ້ຍຜັກໄດ້ທັງໝົດ 13,076ເບ້ຍ ໃນນັ້ນ, ຜັກສະລັດ 6,479 ເບ້ຍ, ຜັກຊານາລີ 4.669 ເບ້ຍ,ຜັກຕັງໂອ 1.044 ເບ້ຍ ແລະ ຜັກກາດນາ 864 ເບ້ຍ ທຽບໃສ່ແຜນການປະຕິບັດໄດ້ 123% (ລື່ນຄາດໝາຍ 23%); ປູກຜັກໄຮໂດຣໂປນິກ (Hydroponic) ໄດ້ 10,782ຕົ້ນ, ໃນນັ້ນ: ສະລັດ 6,596ຕົ້ນ, ຜັກຊານາລີ 3,521.00 ສຸມ, ຜັກກາດນາ 400 ຕົ້ນ ແລະ ຜັກຕັງໂອ 265 ຕົົ້ນ ທຽບໃສ່ແຜນປະຕິບັດໄດ້ 139% (ລື່ນຄາດໝາຍ 39%);ເກັບຜົນຜະລິດຜັກທົດລອງໄດ້ ຈໍານວນ 329 ກິໂລ, ໃນນີ້,ມີຜັກສະລັດ 249 ກິໂລ ແລະ ຜັກຊານາລີ 80 ກິໂລ.

ເຖິງແນວໃດກໍຕາມ,ໃນປີ 2024 ຜ່ານມາ,ແຂວງໄດ້ວາງຄາດໝາຍສ້າງບ້ານແບບຢ່າງດ້ານກະສິກໍາ ແລະ ປ່າໄມ້ ໃຫ້ໄດ້ 20 ບ້ານ,ຜ່ານການປະເມີນບ້ານເປົ້າໝາຍແບບຢ່າງກະສິກໍາ ແລະ ປ່າໄມ້ ຈໍານວນ 29 ບ້ານພາຍໃນແຂວງ ແມ່ນຍັງບໍ່ທັນຜ່ານ 10 ມາດຖານ 24 ຕົວຊີ້ບອກຊຶ່ງເຫັນໄດ້ວ່າ ມາດຖານທີ່ຍັງບໍ່ບັນລຸລວມມີ 7 ມາດຖານ.