ຂ່າວສານຊີອາໄອລາຍງານໃນວັນທີ 21 ມັງກອນ ຜ່ານມາວ່າ:ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານວະລາດີເມຍ ປູຕິນ ປະທານາທິບໍດີຣັດເຊຍຜ່ານທາງວິດີໂອ.
ທ່ານສີຈິ້ນຜິງເນັ້ນໜັກວ່າ: ໃນປີ2025, ຂ້າພະເຈົ້າຍິນດີຮ່ວມກັບທ່ານປູຕິນ ຮັບມືກັບຄວາມບໍ່ແນ່ນອນຂອງສະພາບແວດລ້ອມພາຍນອກດ້ວຍຄວາມໝັ້ນຄົງແລະຄວາມເຂັ້ມແຂງຂອງການພົວພັນລະຫວ່າງຈີນ-ຣັດເຊຍ. ສອງຝ່າຍຄວນສືບຕໍ່ລົງເລິກການປະສານງານທາງຍຸດທະສາດ, ຢຶດໝັ້ນສະໜັບສະໜູນຊຶ່ງກັນແລະກັນຢ່າງເດັດດ່ຽວ, ປົກປັກຮັກສາຜົນປະໂຫຍດທີ່ຖືກຕ້ອງຕາມກົດໝາຍຂອງສອງປະເທດ. ຈີນຍິນດີຮ່ວມກັບຣັດເຊຍກໍຄືປະເທດສະມາຊິກອື່ນໆ, ຊຸກຍູ້ໃຫ້ອົງການຮ່ວມມືຊຽງໄຮ້ກ້າວເຂົ້າສູ່ໄລຍະໃໝ່ທີ່ມີການພັດທະນາດ້ວຍຄຸນນະພາບສູງກວ່າເກົ່າ, ມີຄວາມຮັບຜິດຊອບແລະສ້າງຜົນງານຫຼາຍກວ່າເກົ່າ. ຈີນ-ຣັດເຊຍຄວນຮ່ວມກັນຊຸກຍູ້ “ການຮ່ວມມືບຣິກສໃຫຍ່” ເພື່ອຂຽນປະຫວັດສາດໜ້າໃໝ່ແຫ່ງການສາມັກຄີກັນສ້າງຄວາມເຂັ້ມແຂງດ້ວຍຕົນເອງຂອງເຂດໂລກໃຕ້.
ທ່ານວະລາດີເມຍ ປູຕິນສະແດງຄວາມເຫັນດີຕໍ່ທັດສະນະຂອງທ່ານສີຈິ້ນຜິງ, ໂດຍກ່າວຢືນຢັນວ່າ: ການຮ່ວມມືລະຫວ່າງຣັດເຊຍ-ຈີນບົນພື້ນຖານທີ່ສອງປະເທດມີຜົນປະໂຫຍດຮ່ວມທີ່ກວ້າງຂວາງ, ສາຍພົວພັນຣັດເຊຍ-ຈີນແມ່ນເປັນເອກະລາດ, ຈະບໍ່ຮັບຜົນກະທົບຈາກປັດໄຈການເມືອງພາຍໃນປະເທດແລະສະພາບການສາກົນໃນປັດຈຸບັນ.
