ວັນທີ່ 29 ມັງກອນຜ່ານມານີ້,ພະແນກການເງິນແຂວງຫຼວງພະບາງ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານ ປະຈຳປີ 2024 ແລະທິດທາງແຜນການ ປີ 2025ຂຶ້ນຢູແຂວງດັ່ງກ່າວ ໂດຍເປັນປະທານຂອງ ທ່ານ ບຸນເຫຼືອ ສີນໄຊວໍຣະວົງ ຮອງເຈົ້າແຂວງຫຼວງພະບາງ, ມີຄະນະນຳພະແນກການເງິນແຂວງ, ເຈົ້າເມືອງ-ຮອງເຈົ້າເມືອງ-ນະຄອນ ຫຼວງພະບາງ, ຫົວໜ້າ-ຮອງຫົວໜ້າພະແນກການ-ກົມກອງ ແລະພະນັກງານຂົງເຂດການເງິນ ເຂົ້າຮ່ວມ.

ທ່ານ ຄີນຄຳ ເລັ່ງສະຫວັດ ຫົວໜ້າພະແນກການເງິນແຂວງ ໄດ້ຜ່ານບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2024 ແລະທິດທາງແຜນການ ປີ 2025 ຍົກໃຫ້ເຫັນດ້ານລາຍຮັບ ທັງສູນກາງ ແລະທ້ອງຖິ່ນ ແຜນການ 712 ຕື້ກວ່າກີບ ປະຕິບັດໄດ້ 1,087 ຕື້ກວ່າກີບເທົ່າກັບ152% ຂອງແຜນດັດແກ້ ຫຼື ປະຕິບັດໄດ້ລື່ນແຜນ 374 ຕື້ກວ່າກີບ, ໃນນີ້, ລາຍຮັບພູດສູນກາງ ແຜນການ 31 ຕື້ກວ່າກີບ ປະຕິບັດໄດ້ເກືອບ 36 ຕື້ກີບ ເທົ່າກັບ114% ຂອງແຜນດັດແກ້, ລາຍຮັບພາສີ ແຜນການ 31 ຕື້ກວ່າກີບ ປະຕິບັດໄດ້ເກືອບ 36 ຕື້ກີບ ເທົ່າກັບ114% ຂອງແຜນດັດແກ້, ລາຍຮັບຈາກການຂາຍໄມ້ຍຶດ 49 ລ້ານກວ່າກີບ. ສ່ວນລາຍຮັບພູດທ້ອງຖິ່ນທັງໝົດ ແຜນການ 681 ຕື້ກວ່າກີບ ປະຕິບັດໄດ້ 1,051 ຕື້ກວ່າກີບເທົ່າກັບ154% ຂອງແຜນດັດແກ້ ຫຼື ປະຕິບັດໄດ້ລື່ນແຜນ 370 ຕື້ກວ່າກີບ. ໃນນີ້, ສ່ວຍສາອາກອນແຜນການ 610 ຕື້ກວ່າກີບ, ປະຕິບັດໄດ້ເກືອບ 893 ຕື້ກີບ, ເທົ່າກັບ146% ຂອງແຜນດັດແກ້ ຫຼື ປະຕິບັດໄດ້ລື່ນແຜນ 282 ຕື້ກວ່າກີບ; ລາຍຮັບຊັບສິນຂອງລັດແຜນການ 69 ຕື້ກວ່າກີບ, ປະຕິບັດໄດ້ 158 ຕື້ກວ່າກີບເທົ່າກັບ228% ຂອງແຜນດັດແກ້ ຫຼື ປະຕິບັດໄດ້ລື່ນແຜນເກືອບ 89 ຕື້ກີບ; ເງິນເຫຼືອສົ່ງຄືນ ປະຕິບັດໄດ້ 344 ລ້ານກວ່າກີບ. ສຳລັບດ້ານລາຍຈ່າຍທົ່ວແຂວງແຜນການ 917 ຕື້ກວ່າກີບ ປະຕິບັດໄດ້ 910 ຕື້ກວ່າກີບ, ເທົ່າກັບຫຼາຍກວ່າ 99% ຂອງແຜນດັດແກ້. ໃນນັ້ນ, ແຜນບູລິມະສິດການເບີກຈ່າຍ ແມ່ນເງິນເດືອນພະນັກງານ ໃນທົ່ວແຂວງໃຫ້ສຳເລັດກ່ອນວັນທີ 25 ຂອງທຸກເດືອນ.

ໂອກາດນີ້, ທ່ານ ບຸນເຫຼືອ ສີນໄຊວໍຣະວົງ ໄດ້ມີຄຳເຫັນວ່າ: ເຖີງການຈັດເກັບລາຍຮັບ ຈະໄດ້ລື່ນແຜນການ ຫຼື ເກີນດູນ ແຕ່ແຫຼ່ງລາຍຮັບທີ່ເກັບໄດ້ສ່ວນໃຫຍ່ຍັງບໍ່ມີຄວາມຍືນຍົງ ເນື່ອງຈາກບັນດາຫົວໜ່ວຍທຸລະກິດທີ່ເກັບລາຍຮັບ ຍັງເປັນພຽງຫົວໜ່ວຍທີ່ດຳເນີນກິດຈະການໄລຍະສັ້ນ, ຈຶ່ງຮຽກຮ້ອງໃຫ້ຄະນະຮັບຜິດຊອບຂອງພະແນກການເງິນ ພ້ອມກັນສືບຕໍ່ພັດທະນານາລະບົບ ການຈັດເກັບລາຍຮັບໃຫ້ມີຄວາມທັນສະໄໝ, ທັງປະສານສົມທົບກັບທຸກພາກສ່ວນ ເພື່ອປ້ອນຂໍ້ມູນຖານການເກັບລາຍຮັບເຂົ້າໃນລະບົບ ໃຫ້ຄົບຖ້ວນ.

(ຂ່າວ: ອາພຸດເດດ ບຸບຜາ, ພາບ: ເພັດສາຄອນ ສີມມະວົງ)