ໂດຍ: ພູວັນ

ນັບແຕ່ມື້ສ້າງຕັ້ງເປັນຕົ້ນມາ ສະຫະພັນກຳມະບານລາວກໍໄດ້ເຄື່ອນໄຫວຕາມພາລະບົດບາດ, ສິດ ແລະໜ້າທີ່ທີ່ໄດ້ກຳນົດໄວ້ໃນໂຄງການດຳເນີນງານ ໂດຍໄດ້ກໍ່ສ້າງ, ປັບປຸງກົດລະບຽບ, ລະບົບການຈັດຕັ້ງ, ໂຄງປະກອບບຸກຄະລາກອນ, ແບບແຜນວິທີເຮັດວຽກ,ຂະຫຍາຍການຈັດຕັ້ງ ແລະສະມາຊິກກຳມະບານຢູ່ໃນແຕ່ລະຂົງເຂດ ເພື່ອໃຫ້ສອດຄ່ອງກັບຄວາມເປັນຈິງ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ.

ສະຫະພັນກໍາມະບານລາວໄດ້ປະກອບສ່ວນໃນພາລະກິດປະຕິວັດ ເພື່ອກໍ່ສ້າງເຂດປົດປ່ອຍເປັນລັດໜຶ່ງ, ກຽມທຸກເງື່ອນໄຂເພື່ອປົດປ່ອຍປະເທດຊາດຢ່າງສົມບູນ; ໜ້າທີ່ຕົ້ນຕໍຂອງກຳມະບານເວລານັ້ນແມ່ນລົງກໍ່ສ້າງຮາກຖານຢູ່ບັນດາຫົວໜ່ວຍແຮງງານຈຳນວນໜຶ່ງເຊັ່ນ: ໂຮງງານຕີເຫຼັກ, ໂຮງງານຕໍ່າແຜ່ນ, ໂຮງງານປຸງແຕ່ງອາຫານ, ໂຮງພິມ, ໄປສະນີ, ການສື່ສານ, ການກໍ່ສ້າງຖະໜົນຫົນທາງ ແລະ ອື່ນໆ ເພື່ອສຸມໃສ່ປຸກລະດົມຂົນຂວາຍ, ຊຸກຍູ້ມະຫາຊົນເຂົ້າຮ່ວມຂະບວນການຕໍ່ສູ້ໃຫ້ເປັນຂະບວນຟົດຟື້ນຢ່າງຕໍ່ເນື່ອງໂດຍຢຶດໝັ້ນຕາມແນວທາງນະໂຍບາຍຂອງພັກທີ່ວ່າ “ສັນຕິພາບ ເອກະລາດ ປະຊາທິປະໄຕ ແລະ ເອກະພາບ”ໂດຍໄດ້ມີຜົນງານພົ້ນເດັ່ນດັ່ງນີ້:

1) ໄດ້ຄົ້ນຄວ້າ, ປັບປຸງກົດລະບຽບຂອງສະຫະພັນກຳມະບານລາວ; ໄດ້ຮັບຮອງເອົາມື້ສ້າງຕັ້ງສະຫະພັນກຳມະບານລາວ; ເນື້ອໃນ, ກາໝາຍຂອງກຳມະບານລາວ; ພ້ອມກັນນັ້ນ, ໄດ້ສຸມໃສ່ກໍ່ສ້າງຊົນຊັ້ນກຳມະກອນ ແລະ ຜູ້ອອກແຮງງານລາວໃຫ້ມີຄຸນສົມບັດສິນທຳປະຕິວັດ, ມີສະຕິຮັກຊາດ, ມີຄວາມຮູ້, ຄວາມສາມາດ, ມີຫົວຄິດປະດິດສ້າງ, ມີຄວາມຈົງຮັກພັກດີຕໍ່ຊາດ, ຕໍ່ພັກແລະ ພາລະກິດປະຕິວັດຂອງປະຊາຊົນລາວບັນດາເຜົ່າ, ຕໍ່ສູ້ກັບສັດຕູທຸກໂຕຢ່າງອົງອາດກ້າຫານ, ເດັດຂາດບໍ່ຍອມຈຳນົນ, ມີຄວາມສາມັກຄີກັບເພື່ອນຮ່ວມຊາດ ແລະເພື່ອນມິດສາກົນ;2)ໄດ້ຄົ້ນຄວ້າ, ສ້າງ ແລະ ປັບປຸງບັນດານິຕິກຳຕ່າງໆ ເພື່ອຮັບໃຊ້ໃຫ້ແກ່ການເຄື່ອນໄຫວວຽກງານກຳມະບານເປັນຕົ້ນໄດ້ສ້າງ ແລະ ປັບປຸງກົດໝາຍວ່າດ້ວຍກຳມະບານລາວນັບແຕ່ປີ 2008 ເປັນຕົ້ນມາ;ຄົ້ນຄວ້າ, ສ້າງ, ປັບປຸງແລະ ຮັບຮອງເອົາເນື້ອໃນຂໍ້ແຂ່ງຂັນຂອງສະຫະພັນກຳມະບານລາວ; ປັບປຸງພາລະບົດບາດຂອງສະຫະພັນກຳມະບານແຕ່ລະຂັ້ນໃຫ້ແທດເໝາະກັບແຕ່ລະໄລຍະ; ບັນດານິຕິກຳຕ່າງໆ ທີ່ພົວພັນເຖິງສາຍພົວພັນແຮງງານ, ເອກະສານວ່າດ້ວຍການແບ່ງຂັ້ນຄຸ້ມຄອງໃນການເຄື່ອນໄຫວວຽກງານກຳມະບານ; ນິຕິກໍາກ່ຽວກັບການສ້າງຕັ້ງຫ້ອງການໂຄສະນາໃຫ້ຄຳປຶກສາທາງດ້ານກົດໝາຍໃຫ້ແກ່ຜູ້ອອກແຮງງານໄດ້ 9 ແຂວງ; ຜັນຂະຫຍາຍເອກະສານຍຸດທະສາດການປົກປ້ອງທາງສັງຄົມຂອງອົງການຈັດຕັ້ງກຳມະບານລາວ; ຄູ່ມືຝຶກອົບຮົມກ່ຽວກັບວຽກງານກຳມະບານ, ຄູ່ມືສ້າງຄູຝຶກຂອງກຳມະບານ;ໄດ້ປັບປຸງເນື້ອໃນຂໍ້ແຂ່ງຂັນ2ດີ5ເປັນເຈົ້າມາເປັນ5ເປັນເຈົ້າຂອງສະຫະພັນກຳມະບານລາວໂດຍຕິດພັນກັບຂໍ້ແຂ່ງຂັນຮັກຊາດແລະພັດທະນາຂອງພັກ ເພື່ອສ້າງຄວາມເຂັ້ມແຂງໃຫ້ແກ່ສະຫະພັນກຳມະບານລາວແຕ່ລະຂັ້ນ; 3)ຄົ້ນຄວ້າ,​ສ້າງ ແລະ ປັບປຸງເອກະສານວ່າດ້ວຍການຫັນປ່ຽນໃໝ່ຢ່າງແຂງແຮງເລິກເຊິ່ງ ແລະ ຮອບດ້ານໃນຂົງເຂດວຽກງານກຳມະບານ ເພື່ອຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIຂອງພັກເຂົ້າສູ່ວຽກງານຕົວຈິງ; 4).ໂຄສະນາ, ປຸກລະດົມຂົນຂວາຍ, ເຕົ້າໂຮມມະຫາຊົນເຂົ້າເປັນສະມາຊິກກຳມະບານບົນພື້ນຖານຄວາມຕື່ນຕົວ ແລະ ສະໝັກໃຈ ໂດຍເນັ້ນໃສ່ຫົວໜ່ວຍແຮງງານເພື່ອຮັບປະກັນໃຫ້ແກ່ການປົກປ້ອງສິດ ແລະ ຜົນປະໂຫຍດທາງດ້ານວັດຖຸ ແລະ ຈິດໃຈ; ເອົາໃຈໃສ່ໃນການໂຄສະນາຂະຫຍາຍການຈັດຕັ້ງ ແລະ ສະມາຊິກກຳມະບານໃຫ້ນັບມື້ນັບຫຼາຍຂຶ້ນ;ຊຸກຍູ້ສ້າງຕັ້ງກອງທຶນຊ່ວຍເຫຼືອຊຶ່ງກັນ ແລະ ກັນຂອງສະຫະພັນກຳມະບານໃນແຕ່ລະຂັ້ນນັບມື້ເພີ່ມຂຶ້ນທາງດ້ານທຶນ ແລະ ຈຳນວນເປັນການສ້າງພື້ນຖານທາງດ້ານເສດຖະກິດຂອງກຳມະບານຕາມທ່າແຮງຂອງແຕ່ລະກົມກອງ, ທ້ອງຖິ່ນ ເພື່ອສ້າງຄວາມເຂັ້ມແຂງໃຫ້ແກ່ການເຄື່ອນໄຫວວຽກງານກຳມະບານໃນຂອບເຂດທົ່ວປະເທດ ແລະໄດ້ປຸກລະດົມ, ສຶກສາອົບຮົມສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານໃຫ້ມີຄວາມສາມັກຄີປອງດອງໃຫ້ເປັນປຶກແຜ່ນ, ຮັກເຊື້ອແພງຊາດ, ມີຄວາມຕື່ນຕົວ, ມີສະຕິຮັກຊາດ ຕິດພັນກັບການປະຕິບັດລະບຽບກົດໝາຍ; ໃນນີ້,ໄດ້ເລັ່ງໃສ່ຈັດຕັ້ງປະຕິບັດມະຕິ 108 ຂອງກົມການເມືອງສູນກາງພັກ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່;5). ໂຄສະນາຜ່ານສື່ສິ່ງພິມ ແລະ ເອເລັກໂຕຣນິກ ເປັນຕົ້ນຜະລິດໜັງສືພິມແຮງງານ, ວາລະສານກຳມະບານ, ຜະລິດລາຍການວິທະຍຸ, ໂທລະພາບ, ຜະລິດສື່ອອນລາຍພ້ອມດຽວກັນນີ້ສະຫະພັນກຳມະບານແຂວງ, ນະຄອນ ແລະ ເມືອງ ສາມາດຜະລິດສື່ອອນລາຍຂອງຕົນເປັນປົກກະຕິ;6). ສະຫະພັນກໍາມະບານລາວໄດ້ປັບປຸງການຈັດຕັ້ງຂອງຕົນເປັນແຕ່ລະໄລຍະ, ຂະຫຍາຍການຈັດຕັ້ງ ແລະ ສະມາຊິກກໍາມະບານເຂົ້າສູ່ຂົງເຂດວິສາຫະກິດຂອງລັດ ແລະ ຫົວໜ່ວຍແຮງງານເອກະຊົນ, ການຈັດຕັ້ງກຳມະບານໄດ້ຮັບການຂະຫຍາຍຕົວທາງດ້ານປະລິມານ ແລະ ຄຸນນະພາບ; ປັບປຸງພາລະບົດບາດ, ສິດ, ໜ້າທີ່ຂອງກຳມະບານໃຫ້ສອດຄ່ອງກັບສະພາບຄວາມເປັນຈິງໃນໄລຍະໃໝ່; ບໍາລຸງ-ກໍ່ສ້າງທິດສະດີວຽກງານກຳມະບານ, ຍົກລະດັບສີມືແຮງງານໃຫ້ແກ່ພະນັກງານກຳມະບານອາຊີບ, ເຄິ່ງອາຊີບ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວບັນດາເຜົ່າ ໃຫ້ມີຄວາມເຂັ້ມແຂງທາງດ້ານປະລິມານ ແລະ ຄຸນນະພາບ ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່;7). ສະຫະພັນກຳມະບານລາວໄດ້ເປັນຕົວແທນໃນການປົກປ້ອງສິດ ແລະ ຜົນປະໂຫຍດອັນຊອບທຳໃຫ້ແກ່ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວຢ່າງແທ້ຈິງເປັນຕົ້ນ: ໄດ້ເຂົ້າຮ່ວມແກ້ໄຂຂໍ້ຂັດແຍ່ງດ້ານແຮງງານ ແລະ ໄດ້ທວງຄ່າແຮງງານໃຫ້ຜູ້ອອກແຮງງານ; ນັບແຕ່ປີ 1991ສະຫະພັນກຳມະບານລາວໄດ້ຄົ້ນຄວ້າ ແລະ ນຳສະເໜີປັບປຸງຄ່າແຮງງານຂັ້ນຕໍ່າຂອງກຳມະກອນ ແລະ ຜູ້ອອກແຮງງານ; ມາຮອດປັດຈຸບັນໄດ້ຮັບການປັບປຸງຄ່າແຮງງານຂັ້ນຕໍ່າໄດ້ທັງໝົດ 10ຄັ້ງຈາກ 2,000 ກີບ ຂຶ້ນມາເປັນ1,600,000ກີບ, ເລີ່ມຈັດຕັ້ງປະຕິບັດນັບແຕ່ວັນທີ 1 ຕຸລາ 2023 ເປັນຕົ້ນມາ;ນອກຈາກນັ້ນ, ກໍໄດ້ສະເໜີເງິນອຸດໜຸນຄ່າຄອງຊີບໃຫ້ແກ່ຜູ້ອອກແຮງງານທີ່ມີລາຍໄດ້ຕໍ່າ900,000 ກີບຕໍ່ຄົນຕໍ່ເດືອນຊຶ່ງລວມທັງຄ່າແຮງງານ ແລະ ເງິນອຸດໜູນເປັນ 2,500,000 ກີບຕໍ່ຄົນ/ເດືອນ, ເລີ່ມປະຕິບັດນັບແຕ່ວັນທີ 1 ຕຸລາ 2024 ເປັນຕົ້ນມາ; 8).ໄດ້ສະເໜີແລະເປີດນຳໃຊ້ເບີສາຍດ່ວນຂອງສະຫະພັນກຳມະບານລາວ1512ແລະ ຕິດຕັ້ງຕູ້ເກັບກໍາຫາງສຽງຈາກສັງຄົມຢູ່ 6ຈຸດໃນນະຄອນຫຼວງວຽງຈັນ ເພື່ອເກັບກຳສະພາບແນວຄິດ, ຄວາມຫຍຸ້ງຍາກ ແລະ ໃຫ້ຄໍາປຶກສາດ້ານແຮງງານແລະ ບັນຫາອື່ນໆຂອງສະມາຊິກກຳມະບານ, ກຳມະກອນ ແລະ ຜູ້ອອກແຮງງານ; 9).ເອົາໃຈໃສ່ຊີ້ນຳການເຄື່ອນໄຫວວຽກງານກວດກາກຳມະບານຕາມພາະບົດບາດ, ສິດ ແລະ ໜ້າທີ່ຂອງຄະນະກວດກາກຳມະບານແຕ່​ລະຂັ້ນໃນການປະຕິບັດກົດໝາຍ, ກົດລະບຽບ, ມະຕິກອງປະຊຸມໃຫຍ່ຜູ້ແທນກຳມະບານລາວ, ແຜນພັດທະນາວຽກງານກຳມະບານລາວແຕ່ລະຄັ້ງ, ກວດກາການນຳໃຊ້ງົບປະມານ, ເງິນບຳລຸງ, ເງິນກອງທຶນ ແລະ ແຫຼ່ງລາຍຮັບອື່ນໆ ຂອງສະຫະພັນກໍາມະບານລາວ;10).ສະຫະພັນກຳມະບານລາວໄດ້ຕັ້ງໜ້າປະຕິບັດວຽກງານພົວພັນຮ່ວມມືກັບຕ່າງປະເທດຕາມແນວທາງການຕ່າງປະເທດຂອງພັກ, ໂດຍສະເພາະຮ່ວມມືກັບກຳມະບານປະເທດເພື່ອນມິດຍຸດທະສາດ, ເພື່ອນມິດສາກົນ, ອົງການຈັດຕັ້ງສາກົນ, ແລກປ່ຽນຄະນະຜູ້ແທນຂັ້ນສູງ, ແລກປ່ຽນບົດຮຽນດ້ານວິຊາການ, ຝຶກອົບຮົມ, ຍົກລະດັບໄລຍະສັ້ນ, ໄລຍະຍາວຢູ່ບັນດາປະເທດເພື່ອນມິດຍຸດທະສາດ ແລະ ອື່ນໆ.