ພິທີເຊັນສັນຍາເຊົ່າເນື້ອທີ່ດິນລັດເພື່ອກໍ່ສ້າງ ແລະ ບໍລິການຕະຫຼາດບ້ານນາຊິງ ເມືອງພຽງ ແຂວງໄຊຍະບູລີ ໄດ້ຈັດຂຶ້ນໃນວັນທີ 27 ຕຸລາ ຜ່ານມາ ທີ່ຫ້ອງປະຊຸມຂອງເມືອງ ໂດຍການເປັນກຽດເຂົ້າຮ່ວມຂອງທ່ານ ຄຳພັນ ຄຳພູບົວ ຮອງເຈົ້າເມືອງໆພຽງ, ມີບັນດາຫົວໜ້າຮອງຫົວໜ້າຫ້ອງການທີ່ກ່ຽວຂ້ອງຂອງເມືອງ, ຕາງໜ້າບໍລິສັດນັດທະກອນ ສົ່ງເສີມການຜະລິດກະສິກຳ ການຄ້າຂາອອກ-ຂາເຂົ້າ ຈຳກັດພ້ອມດ້ວຍພະນັກງານຫ້ອງການແຜນການ ແລະ ການລົງທຶນເມືອງເຂົ້າຮ່ວມ.

ພິທີໄດ້ຜ່ານສັນຍາວ່າດ້ວຍການເຊົ່າເນື້ອທີ່ດິນລັດເພື່ອກໍ່ສ້າງ ແລະ ບໍລິການຕະຫຼາດບ້ານນາຊິງ ຊຶ່ງມີເນື້ອທີ່ທັງໝົດ 929 ຕາແມັດ ໂດຍກິດຈະກຳປະກອບມີ ຖົມເດີ່ນຕະຫຼາດ, ກໍ່ສ້າງເສັ້ນທາງ ໃນຕະຫຼາດກວ້າງ 5 ແມັດ ແລະ ຮ່ອງລະບາຍນ້ຳກວ້າງ 40 ຊມ, ກໍ່ສ້າງຕະຫຼາດສົດ 22x34 ແມັດ ຈໍານວນ 1 ຫຼັງ, ຕະຫຼາດຫ້ອງແຖວ 8x40 ແມັດ ຈໍານວນ 1 ຫຼັງ, ຕະຫຼາດຫ້ອງແຖວ 8x36 ແມັດ ຈໍານວນ 3 ຫຼັງ, ຕະຫຼາດຫ້ອງແຖວ 8x32 ແມັດ ຈຳນວນ 1 ຫຼັງ, ຕະຫຼາດຫ້ອງແຖວ 8x28 ແມັດ ຈຳນວນ 2 ຫຼັງ, ກະລ່າຝາກລົດແມ່ຄ້າ 15x30 ແມັດ ຈຳນວນ 1 ຫຼັງກໍ່ສ້າງຫ້ອງນ້ຳ 3x9 ແມັດ ຈຳນວນ 1 ຫຼັງ, ລະບົບອ່າງກັ່ນຕອງນໍ້າເສຍ 6x6 ແມັດ ຈຳນວນ 1 ແຫ່ງ, ກໍ່ສ້າງເດີ່ນຈອດລົດຊົ່ວຄາວກາງເວັນ ແລະ ຈຸດຂາຍເຄື່ອງຕະຫຼາດກາງຄືນ, ກໍ່ສ້າງເດີ່ນຈອດລົດລູກຄ້າ ໂດຍແມ່ນ ບໍລິສັດ ນັດທະກອນ ສົ່ງເສີມການຜະລິດກະສິກຳ ການຄ້າຂາອອກ-ຂາເຂົ້າເປັນຜູ້ເຊົ່າ, ອາຍຸໃນການເຊົ່າແມ່ນ 30 ປີ ເພື່ອອຳນວຍຄວາມສະດວກໃຫ້ແກ່ພໍ່ຄ້າຊາວຂາຍກໍຄືປະຊາຊົນບັນດາເຜົ່າໃນການແລກປ່ຽນຊື້ຂາຍສິນຄ້າພ້ອມທັງນຳເອົາຜະລິດຕະພັນພາຍໃນກໍຄືສິນຄ້າໂອດັອບຂອງເມືອງພຽງອອກສູ່ຕະຫຼາດທັງເປັນການສ້າງຂະບວນການເພື່ອຂ່ຳນັບຮັບຕ້ອນກອງປະຊຸມໃຫຍ່ຂອງອົງຄະນະພັກເມືອງທີ່ຈະໄຂຂຶ້ນໃນຕໍ່ໜ້ານີ້ໃຫ້ເປັນຂະບວນການຢ່າງຟົດຟື້ນ.

ໃນໂອກາດນີ້, ກໍໄດ້ລົງນາມເຊັນສັນຍາລະຫວ່າງອົງການປົກຄອງເມືອງພຽງ ຕາງຫນ້າໂດຍຫ້ອງການແຜນການ ແລະ ການລົງທຶນເມືອງ ແລະ ບໍລິສັດນັດທະກອນ ສົ່ງເສີມການຜະລິດກະສິກຳການຄ້າຂາອອກ-ຂາເຂົ້າໂດຍມີບັນດາການນຳຂອງເມືອງ,ຫົວໜ້າຮອງຫົວໜ້າຫ້ອງການທີ່ກ່ຽວຂ້ອງພ້ອມດ້ວຍພະນັກງານຫ້ອງການ ແຜນການ ແລະ ການລົງທຶນເມືອງເຂົ້າຮ່ວມເປັນສັກຂີພິຍານ

(ຂ່າວ-ພາບ: ວົງສະຫວັນ ສຸທິໂວຫານ)