ອີງຕາມແຈ້ງການຂອງກະຊວງການຕ່າງປະເທດອີຣານ ໃຫ້ຮູ້ໃນວັນທີ 24 ກັນຍາ ນີ້ ວ່າ: ທ່ານ ຮອດເຊັນ ອາເມຍ ອັບດູນລາຮານ ລັດຖະມົນຕີກະຊວງການຕ່າງປະເທດອີຣານ ແລະ ທ່ານ ໄອມານ ຊາຟາດີ ລັດຖະມົນຕີກະຊວງການຕ່າງປະເທດຈໍແດນ ໄດ້ສະແດງຄວາມມຸ່ງໝັ້ນທີ່ຈະປັບປຸງສາຍພົວພັນລະຫວ່າງສອງຝ່າຍ.

ໃນວັນທີ 23 ກັນຍາ ຜ່ານມາ ນັກການທູດຂັ້ນສູງຂອງສອງປະເທດໄດ້ຈັດການພົບປະກັນນອກວາລະກອງປະຊຸມສະມັດຊາໃຫຍ່ອົງການສະຫະປະຊາຊາດ ຄັ້ງທີ 78 ຢູ່ນະຄອນນິວຢອກ ສະຫະລັດອາເມຣິກາ, ບ່ອນທີ່ພິຈາລະນາເຖິງບັນຫາຂອງພາກພື້ນທີ່ມີຜົນປະໂຫຍດຮ່ວມມກັນ.

ທ່ານ ອາເມຍ ອັບດູນລາຮານ ໄດ້ທົບທວນຄືນການພົບປະກັນກັບເຈົ້າຊີວິດອັບດູນລາທີ II ຂອງຈໍແດນ ໃນເດືອນທັນວາປີຜ່ານມາ, ໃນເວລານັ້ນ ທ່ານ ຊາຟາດີ ກໍໄດ້ເຂົ້າຮ່ວມ ຊຶ່ງສົ່ງຜົນເຮັດໃຫ້ສອງປະເທດມີການຮ່ວມມືທີ່ດີໃນຫຼາຍຂົງເຂດທີ່ແຕກຕ່າງກັນ ຊຶ່ງຝ່າຍອີຣານໄດ້ກຽມພ້ອມແລ້ວທີ່ຈະປັບປຸງສາຍພົວພັນ ແລະ ການຮ່ວມມືສອງຝ່າຍ.

ທ່ານ ອາເມຍ ອັບດູນລາຮານ ໄດ້ສະແດງຄວາມຫວັງວ່າສາຍພົວພັນລະຫວ່າງເຕເຮຣານ ແລະ ອາມານ ຈະໄດ້ຮັບການປັບປຸງ ຊຶ່ງສອດຄ່ອງກັບຜົນປະໂຫຍດຂອງສອງຊາດ ທັງສອດຄ່ອງກັບບັນຍາກາດໃນທາງສ້າງສັນໃນພາກພື້ນປັດຈຸບັນ ແລະ ກໍແມ່ນທ່າອ່ຽງຂອງສາຍພົວພັນທີ່ມີການຂະຫຍາຍຕົວລະຫວ່າງອີຣານ ແລະ ລັດອາຣັບມຸສລີມ.

ສ່ວນລັດຖະມົນຕີວ່າການກະຊວງການຕ່າງປະເທດຈໍແດນ ກໍໄດ້ສະແດງຄວາມມຸ່ງຫວັງທີ່ຢາກມີສາຍພົວພັນທີ່ດີຖານອ້າຍນ້ອງກັບອີຣານ ແລະ ເປັນການເປີດປະຫວັດສາດໜ້າໃໝ່ທີ່ມີຕໍ່ສາຍພົວພັນສອງຝ່າຍ.

ທ່ານກ່າວວ່າ: ພວກເຮົາມີສິ່ງທ້າທາຍອັນໃຫຍ່ຫຼວງຮ່ວມກັນຢູ່ໃນພາກພື້ນນີ້ ແລະ ມີຄວາມຈຳເປັນທີ່ຈະຕ້ອງຮ່ວມມືຊຶ່ງກັນ ແລະ ກັນ ເພື່ອກ້າວຂ້າມສິ່ງທ້າທາຍ ແລະ ສົ່ງຜົນດີຕໍ່ສາຍພົວພັນອັນເປັນປະຫວັດສາດ ແລະ ຖານອ້າຍນ້ອງລະຫວ່າງສອງຊາດ.