ຕາມການໃຫ້ສຳພາດຂອງທ່ານສົມອົກໜໍ່ຈະເລີນຫົວໜ້າພະແນກກະສິກຳແລະປ່າໄມ້ແຂວງວຽງຈັນຄັ້ງວັນທີ30ຕຸລາ2023ໃຫ້ຮູ້ວ່າ: ການເກັບກ່ຽວເຂົ້ານາປີຂອງແຂວງວຽງຈັນມາຮອດປັດຈຸບັນສາມາດເກັບກ່ຽວສຳເລັດແລ້ວ65%ຂອງເນື້ອທີ່ນາປີທັງໝົດທົ່ວແຂວງແລະຄາດວ່າຈະໃຫ້ສຳເລັດ100%ໃນເດືອນທັນວາ2023ນີ້. ສຳລັບແຂວງວຽງຈັນໃນລະດູຝົນທີ່ຜ່ານມາໄດ້ວາງຄາດໝາຍການຜະລິດເຂົ້ານາປີໄວ້55.944ເຮັກຕາ, ສາມາດບັນລຸໄດ້100%ແຕ່ສາມາດເກັບກ່ຽວໄດ້ຕົວຈິງ55.045ເຮັກຕາ, ທັງນີ້ກໍຍ້ອນໄດ້ຮັບຜົນກະທົບຈາກໄພພິບັດນ້ຳຖ້ວມເຮັດໃຫ້ເນື້ອທີ່ນາປີເສຍຫາຍທັງໝົດ899ເຮັກຕາ. ໃນນັ້ນເມືອງວັງວຽງໄດ້ຮັບຜົນກະທົບ77ເຮັກຕາ, ເມືອງກາສີ822ເຮັກຕາ. ສະຫຼຸບແລ້ວສະເລ່ຍຜົນເສຍຫາຍແມ່ນ1,6%ຂອງເນື້ອທີ່ຜະລິດຕົວຈິງ. ຄາດວ່າຜົນຜະລິດເຂົ້ານາປີໃນປີນີ້ຈະໄດ້ຮັບ238.344ໂຕນ, ສະເລ່ຍໄດ້4,33ໂຕນຕໍ່ເຮັກຕາ. ນອກຈາກຜົນຜະລິດຈາກເຂົ້າແລ້ວຊາວກະສິກອນຍັງໄດ້ປູກພືດເປັນສິນຄ້າເຊັ່ນ: ມັນຕົ້ນ, ສາລີຫວານ, ສາລີແຂງ, ໝາກແຕງ, ໝາກຖົ່ວແລະອື່ນໆຊຶ່ງແຜນການ23.284ເຮັກຕາ, ປະຕິບັດໄດ້25.436ເຮັກຕາ, ເທົ່າກັບ109%ຂອງແຜນການຜົນຜະລິດທັງໝົດ260.719ໂຕນ. ທ່ານກ່າວອີກວ່າ: ການກະກຽມໃສ່ການຜະລິດລະດູແລ້ງສູ້ຊົນປູກເຂົ້ານາແຊງໃຫ້ໄດ້10.618ເຮັກຕາ, ຜົນຜະລິດໃຫ້ໄດ້59.286ໂຕນສະມັດຖະພາບສະເລ່ຍ5,5ໂຕນຕໍ່ເຮັກຕາ, ສູ້ຊົນປູກພືດລະດູແລ້ງໃຫ້ໄດ້26.643ເຮັກຕາ, ຜົນຜະລິດໃຫ້ໄດ້238.210ໂຕນສະມັດຖະພາບສະເລ່ຍໃນ9,07ໂຕນຕໍ່ເຮັກຕາ.
ຫົວໜ້າພະແນກກະສິກຳແລະປ່າໄມ້ແຂວງວຽງຈັນກ່າວອີກວ່າ: ເພື່ອໃຫ້ບັນລຸຕາມແຜນການດັ່ງກ່າວໄດ້ພະແນກກະສິກຳແລະປ່າໄມ້ແຂວງວຽງຈັນໄດ້ວາງມາດຕະການຈັດຕັ້ງປະຕິບັດປັນຕົ້ນ: ຈະໄດ້ມີການກວດກາເກັບກຳເນື້ອທີ່ນາທີ່ມີເງື່ອນໄຂເຮັດນາແຊງທີ່ມີຈຸດສຸມຢູ່ແຕ່ລະເມືອງທີ່ມີໂຄງການຊົນລະປະທານ, ໜອງ, ບຶງ, ກວດຄືນລະບົບຊົນລະປະທານທີ່ຈະສະໜອງນ້ຳໃນລະດູແລ້ງໃຫ້ມີຄວາມພ້ອມ,ຊຸກຍູ້ຊາວກະສິກອນທີ່ມີເງື່ອນໄຂເຮັດນາແຊງແລະປູກພືດໃຫ້ໄດ້ຕາມແຜນການທີ່ວາງໄວ້, ສະໜອງແນວພັນເຂົ້າ, ພືດ, ຝຸ່ນ, ປຸ໋ຍແລະຢາປາບສັດຕູພືດໃຫ້ພຽງພໍແລະແຕ່ງນັກວິຊາການລົງສົມທົບກັບເມືອງເພື່ອຊ່ວຍຊາວກະສິກອນໃນດ້ານເຕັກນິກໃນການປູກແລະການບົວລະບັດຮັກສາເພື່ອຮັບປະກັນທາງດ້ານປະລິມານແລະຄຸນນະພາບ.
(ຂ່າວ-ພາບ: ແຂວງວຽງຈັນ)