ໃນຊຸມປີມໍ່ໆມານີ້, ເຂດປົກຄອງຕົນເອງເຜົ່າຈ້ວງກວາງຊີ ສປ ຈີນ ໄດ້ລົງເລິກປະຕິບັດກິດຈະກຳສະເພາະກິດ ເພື່ອຫຼຸດຜ່ອນຄ່າບໍລິການ ແລະ ປັບປຸງປະສິດທິພາບຂອງການບໍລິການ, ແນໃສ່ສືບຕໍ່ປະຕິບັດການກໍ່ສ້າງດ່ານອັດສະລິຍະ, ເພື່ອຈຸດປະສົງສ້າງລະບົບດ່ານຊາຍແດນເຊື່ອມຕໍ່ ແລະ ສ້າງສະພາບແວດລ້ອມທາງທຸລະກິດສໍາລັບຊ່ອງທາງໄປສູ່ອາຊຽນໃຫ້ໄດ້ຮັບການປັບປຸງດີຂຶ້ນ ຊຶ່ງໄດ້ສ້າງຄວາມສະດວກໃຫ້ແກ່ການໃຊ້ເວລາຜ່ານຂາເຂົ້າ-ຂາອອກຂອງດ່ານກວາງຊີ ໃນປີ 2022 ຫຼຸດລົງ 10,9% ແລະ 74,8% ເມື່ອທຽບໃສ່ປີ 2019, ລະດັບການຫັນເປັນຂໍ້ມູນຂ່າວສານຂອງດ່ານຊາຍແດນໄດ້ຮັບການຍົກສູງຂຶ້ນຢ່າງເດັ່ນຊັດ. ຄຽງຄູ່ກັບການພັດທະນາຢ່າງວ່ອງໄວຂອງດ່ານຊາຍແດນ, ລະດັບການອຳນວຍຄວາມສະດວກດ້ານການຜ່ານດ່ານກໍໄດ້ຍົກສູງຂຶ້ນເຊັ່ນດຽວກັນ, ເປັນການຮັບປະກັນໃຫ້ແກ່ການເລັ່ງກໍ່ສ້າງຕ່ອງໂສ້ການສະໜອງອຸດສາຫະກຳຂ້າມເຂດແຄ້ວນ ແລະ ຂ້າມຊາຍແດນ.

ໃນວັນທີ 15 ກັນຍາ ປີ 2023, ໂຄງການດ່ານອັດສະລິຍະມິດຕະພາບຈີນ-ຫວຽດນາມ ໄດ້ເລີ່ມລົງມືກໍ່ສ້າງຢ່າງເປັນທາງການຢູ່ນະຄອນຜິງສຽງ ເຂດກວາງຊີ. ນີ້ແມ່ນໂຄງການດ່ານອັດສະລິຍະຂ້າມຊາຍແດນແຫ່ງທຳອິດລະຫວ່າງຈີນກັບຫວຽດນາມ, ສອງຝ່າຍໄດ້ຮ່ວມມືສ້າງຊ່ອງທາງສະເພາະຂົນສົ່ງສິນຄ້າຂ້າມຊາຍແດນແບບອັດສະລິຍະ ເພື່ອບັນລຸສິນຄ້າຜ່ານແດນຕະຫຼອດ 24 ຊົ່ວໂມງ. ເມື່ອສ້າງສຳເລັດ ແລະ ນຳໃຊ້ໃນປີ 2024, ຄວາມສາມາດຜ່ານດ່ານສູງສຸດຂອງດ່ານມິດຕະພາບຈະເພີ່ມຂຶ້ນເປັນສອງເທົ່າ. ຄຽງຄູ່ກັບດ່ານທາງຫຼວງດົງຈົ່ງ, ດ່ານທາງຫຼວງລອງປາງ ແລະ ດ່ານທາງຫຼວງໂຢ່ຢີກວນ ໄດ້ຜ່ານການກວດກາຮັບຮອງລະດັບຊາດໃນເດືອນກັນຍາຜ່ານມາ ພາຍຫຼັງໄດ້ເປີດກວ້າງການເປີດປະຕູ, ເຂດກວາງຊີຈະສ້າງເປັນລະບົບດ່ານຊາຍແດນໂດຍມີດ່ານໂຢ່ຢີກວນ, ດ່ານດົງຊິງ, ດ່ານດົງຈົ່ງ ແລະ ດ່ານລອງປາງ ເປັນຊ່ອງທາງຕົ້ນຕໍ ແລະ ມີຊ່ອງທາງວິຊາສະເພາະຫຼາຍຊ່ອງທາງປະສານສົມທົບກັນ ເພື່ອບັນລຸການສົ່ງສິນຄ້າຈາກນະຄອນໜານນິງ ເຂດກວາງຊີ ໄປຮອດຮ່າໂນ້ຍ ພາຍໃນ 24 ຊົ່ວໂມງ, ແລະ 12 ຊົ່ວໂມງໄປເຖິງ 4 ແຂວງຊາຍແດນຂອງຫວຽດນາມ.

ອີງຕາມການແນະນຳໃຫ້ຮູ້ວ່າ: ດ່ານໂຢ່ຢີກວນ ມີສິນຄ້າເຂົ້າ-ອອກຢ່າງຕໍ່ເນື່ອງ ແລະແມ່ນດ່ານນຳເຂົ້າໝາກໄມ້ຫຼາຍທີ່ສຸດຂອງຈີນ, ເປັນດ່ານທາງບົກແຫ່ງທຳອິດຂອງຈີນ ທີ່ນຳໃຊ້ຮູບແບບການຜ່ານດ່ານແບບອັດສະລິຍະທີ່ອີງໃສ່ຂໍ້ມູນຂ່າວສານຢ່າງຄົບຖ້ວນ. ເວລາຜ່ານດ່ານໃນປັດຈຸບັນໄດ້ຫຼຸດລົງຈາກ 10 ນາທີ ມາເປັນ 1 ນາທີເຄິ່ງ. ທ່ານນາງ Zhou Thi Fangrong ປະທານບໍລິສັດການລົງທຶນພັດທະນາ 3D ຫວຽດນາມ ຈຳກັດໃຫ້ສຳພາດກັບນັກຂ່າວວ່າ: “ປັດຈຸບັນ, ການແລກປ່ຽນດ້ານເສດຖະກິດ ແລະ ການຄ້າລະຫວ່າງ ຫວຽດນາມ ແລະ ຈີນ ນັບມື້ນັບແໜ້ນແຟ້ນ, ປະລິມານໃບສັ່ງຂົນສົ່ງສິນຄ້າຂ້າມຊາຍແດນທີ່ພວກເຮົາໄດ້ຮັບໄດ້ເພີ່ມຂຶ້ນຢ່າງວ່ອງໄວ. ຄວາມຄອງຄອຍຢາກໃຫ້ດ່ານອັດສະລິຍະສ້າງສຳເລັດໂດຍໄວ ເພື່ອເປັນການຮັບປະກັນການພັດທະນາທຸລະກິດຂອງບໍລິສັດ.”