ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 1 ພະຈິກ ຜ່ານມານີ້ ຢູ່ ຮ່າໂນ້ຍ, ກະຊວງການຕ່າງປະເທດ ຫວຽດນາມ ໄດ້ສົມທົບກັບສະຖານທູດ ສ ເກົາຫຼີ ປະຈຳ ຫວຽດນາມ ຈັດເວທີປາໄສຍຸດທະສາດ ອາຊຽນ - ສ ເກົາຫຼີ, ດ້ວຍຫົວຂໍ້: ມຸ່ງໄປເຖິງການພົວພັນຄູ່ຮ່ວມມືຍຸດທະສາດ ຮອບດ້ານ ອາຊຽນ - ສ ເກົາຫຼີ ເພື່ອສັນຕິພາບ, ຄວາມໝັ້ນຄົງ ແລະ ວັດທະນາຖາວອນ. ນີ້ແມ່ນຂໍ້ລິເລີ່ມສະເໜີໂດຍ ຫວຽດນາມ.

ກ່າວຄຳເຫັນໃນກອງປະຊຸມ, ທ່ານ ໂດຮຸ່ງຫວຽດ ຮອງລັດຖະມົນຕີ ການຕ່າງປະເທດ ຫວຽດນາມ ໄດ້ຕີລາຄາວ່າ ອາຊຽນ ແລະ ສ ເກົາຫຼີ ໄດ້ກາຍເປັນຄູ່ຮ່ວມມືຍຸດທະສາດທີ່ມີຄວາມໄວ້ເນື້ອເຊື່ອໃຈ ແລະ ແທດຈິງ. ສອງຝ່າຍໄດ້ຕັດສິນໃຈຊຸກຍູ້ການພົວພັນຄູ່ຮ່ວມມືຍຸດທະສາດ, ພັດທະນາ, ຂະຫຍັນຂັບເຄື່ອນ, ແທດຈິງ ແລະ ຕ່າງຝ່າຍຕ່າງມີຜົນປະໂຫຍດ. ທ່ານ ໂດຮຸ່ງຫວຽດ ຢັ້ງຢືນວ່າ: ອາຊຽນສະແດງຄວາມຊົມເຊີຍຕໍ່ຄວາມຫວັງຂອງ ສ ເກົາຫຼີ ຢາກສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງຮອບດ້ານ ລະຫວ່າງ ອາຊຽນ ແລະ ສ ເກົາຫຼີ ພ້ອມກັບຜັນຂະຫຍາຍຂໍ້ລິເລີ່ມສາມັກຄີ ອາຊຽນ - ສ ເກົາຫຼີ (KASI) ເພື່ອແນໃສ່ປະກອບສ່ວນໃຫ້ແກ່ຄວາມພະຍາຍາມນີ້.

ສ່ວນຝ່າຍ ສ ເກົາຫຼີ, ທ່ານ ຊາງ ໂຮ ຈິນ ຮອງລັດຖະມົນຕີ ການຕ່າງປະເທດ ໄດ້ຢັ້ງຢືນວ່າ: ສ ເກົາຫຼີ ມີຄວາມຫວັງຢາກເພີ່ມທະວີ ແລະ ເຮັດໃຫ້ການພົວພັນຄູ່ຮ່ວມມືກັບ ອາຊຽນ ເລິກເຊິ່ງກວ່າເກົ່າ ຜ່ານການສົມທົບກັບ ສ ເກົາຫຼີ ໃນການຜັນຂະຫຍາຍຂໍ້ລິເລີ່ມສາມັກຄີ ອາຊຽນ - ສ ເກົາຫຼີ ສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງຮອບດ້ານ ລະຫວ່າງອາຊຽນ - ສ ເກົາຫຼີ.