ວັນທີ 25 ກັນຍາ ນີ້ ທີ່ພະແນກແຜນການ ແລະ ການລົງທຶນ ແຂວງຄຳມ່ວນ ໄດ້ຈັດກອງປະຊຸມ ສະຫຼຸບຕີລາຄາ ແລະ ຖອດຖອນບົດຮຽນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍການເປັນປະທານຂອງ ທ່ານ ເດດສັກດາ ມະນີຄໍາ ຫົວໜ້າພະແນກແຜນການ ແລະ ການລົງທຶນແຂວງ, ມີບັນດາຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ຕະຫຼອດຮອດຄະນະກອງເລຂາ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມຕາງໜ້າພະແນກແຜນກການ ແລະ ການລົງທຶນ ໃນນາມກອງເລຂາ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ ໄດ້ສະຫຼຸບໂດຍຫຍໍ້ກ່ຽວກັບວຽກງານດັ່ງກ່າວ ຊຶ່ງໃນໄລຍ 2 ປີກວ່າ ກອງເລາຂາໄດ້ສົມທົບຂະແໜງການ ທີ່ກ່ຽວຂ້ອງຂັ້ນແຂວງ ແລະ ເມືອງ, ພ້ອມກັນເອົາໃຈໃສ່ເປັນເຈົ້າການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງທາງດ້ານເສດຖະກິດ-ການເງິນ ທີ່ຕົນຮັບຜິດຊອບ ໃນຈຳນວນ 111 ຕົວຊີ້ບອກ ດ້ວຍຄວາມຮັບຜິດຊອບສູງ ສາມາດຕີລາຄາໄດ້: ຜົນການຈັດຕັ້ງປະຕິບັດຕົວຊີ້ບອກ ທີ່ສໍາເລັດແລ້ວ ຈຳນວນ 79 ຕົວຊີ້ບອກ, ໃນຈໍານວນ 111 ຕົວຊີ້ບອກທັງໝົດ, ຍັງອີກ 32 ຕົວຊີ້ບອກທີ່ຍັງບໍ່ສາມາດປະຕິບັດໄດ້ ແລະ ໄດ້ສຳເລັດການສ້າງນິຕິກຳລຸ່ມກົດໝາຍ ຈຳນວນ 5 ສະບັບ, ໃນຈຳນວນ 11 ສະບັບ, ຍັງບໍ່ທັນສຳເລັດ 6 ສະບັບ, ບົນພື້ນຖານປະຕິບັດຕາມທິດທາງແຜນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຂອງແຂວງຄຳມ່ວນ (2021-2023) ສະບັບເລກທີ 16/ ຈຂ,ລົງວັນທີ 17 ທັນວາ 2021 ແລະ ຄໍາແນະນໍາ ສະບັບເລກທີ 02/ຈຂ, ລົງວັນທີ 24 ມີນາ 2022 ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (2021-2023), ໃນຕົ້ນເດືອນກັນຍາ ປີ 2023 ນີ້ ຄະນະກອງເລຂາ ໄດ້ສົມທົບກັບກອງເລຂາວາລະແຫ່ງຊາດ ຂັ້ນເມືອງ ເພື່ອປະເມີນຜົນການຈັດຕັ້ງປະຕິບັດວາລະແຫ່ງຊາດ ຢູ່ຂັ້ນເມືອງ ສຳເລັດແລ້ວ ຈຳນວນ 10 ເມືອງ, ປັດຈຸບັນແມ່ນກໍາລັງກະກຽມ ເພື່ອຈະສະຫຼຸບມ້ວນທ້າຍວາລະແຫ່ງຊາດ.

ພາຍຫຼັງສໍາເລັດ ກອງປະຊຸມ ຄະນະກອງເລຂາ ກໍໄດ້ສືບຕໍ່ດໍາເນີນການປະເມີນ ຜົນການຈັດຕັ້ງປະຕິບັດວາລະແຫ່ງຊາດ ຮ່ວມກັບ ຂະແໜງການທີ່ກ່ຽວຂ້ອງ ຢູ່ບັນດາພາກສ່ວນພະແນກ, ອົງການຈັດຕັ້ງຂັ້ນແຂວງ, ຕາມການຄາດຄະເນສໍາລັບການສະຫຼຸບ ວາລະແຫ່ງຊາດ ຂັ້ນເມືອງ ແມ່ນຈະໃຫ້ສໍາເລັດພາຍໃນເດືອນກັນຍາ, ສ່ວນຢູ່ຂັ້ນແຂວງແມ່ນຈະໃຫ້ສໍາເລັດໃນເດືອນຕຸລາ ປີ 2023 ນີ້.

ຂ່າວ: ມະນີວັນ