ຂໍ້ມູນທີ່ຫາກໍເຜີຍແຜ່ໂດຍ ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ (LTP) ໃຫ້ຮູ້ວ່າ: ມູນຄ່າການນໍາເຂົ້າ ແລະ ສົ່ງອອກສິນຄ້າ ທີ່ຍັງບໍ່ກວມເອົາມູນຄ່າການນໍາເຂົ້າ ແລະ ສົ່ງອອກ ໄຟຟ້າ ປະຈໍາເດືອນ 8 ປີ 2023 ບັນລຸໄດ້ 980 ລ້ານໂດລາ ຊຶ່ງໃນນີ້ມູນຄ່າການສົ່ງອອກມີປະມານ 446 ລ້ານໂດລາ, ມູນຄ່າການນໍາເຂົ້າປະມານ 534 ລ້ານໂດລາ ແລະ ຂາດດຸນການຄ້າ ປະມານ 88 ລ້ານໂດລາ. ເມື່ອຕິດຕາມຂໍ້ມູນໃນແຕ່ລະເດືອນຜ່ານມານີ້ ເຫັນວ່າ ສປປ ລາວ ຂາດດຸນການຄ້າ ຕິດຕໍ່ກັນເປັນເດືອນທີ 5.

ມູນຄ່າການນໍາເຂົ້າ ແລະ ສົ່ງອອກສິນຄ້າ ໂດຍລວມໃນປີ 2022 ຜ່າມາ, ສປປ ລາວ ເກີນດຸນການຄ້າ ປະມານ 1.390 ລ້ານໂດລາ ດ້ວຍມູນຄ່ານໍາເຂົ້າ ແລະ ສົ່ງອອກທັງໝົດປະມານ 15.000 ລ້ານໂດລາ (ສົ່ງອອກປະມານ 8.198 ລ້ານໂດລາ ແລະ ນໍາເຂົ້າ 6.808 ລ້ານໂດລາ). ເຖິງຢ່າງໃດກໍຕາມ, ມູນຄ່າການຄ້າໃນເດືອນ 1 ປີ 2023 ກໍສືບຕໍ່ຂາດດຸນມາຈາກເດືອນ 12 ປີ 2022 ທີ່ຂາດດຸນການຄ້າປະມານ 23 ລ້ານໂດລາ (ບັນລຸ 1.088 ລ້ານໂດລາ: ສົ່ງອອກ 532 ລ້ານໂດລາ ແລະ ນໍາເຂົ້າ 556 ລ້ານໂດລາ) ຊຶ່ງໃນເດືອນທໍາອິດຂອງປີນີ້ແມ່ນຂາດດຸນການຄ້າປະມານ 13 ລ້ານໂດລາ ຈາກການສົ່ງອອກ ແລະ ນໍາເຂົ້າທັງໝົດປະມານ 935 ລ້ານໂດລາ (ສົ່ງອອກປະມານ 461 ລ້ານໂດລາ ແລະ ນໍາເຂົ້າປະມານ 474 ລ້ານໂດລາ).

ນັບແຕ່ເດືອນ 1 ຫາ ເດືອນ 8 ປີ 2023, ສປປ ລາວ ເກີນດຸນການຄ້າໃນເດືອນ 2 ແລະ ເດືອນ 3 ດ້ວຍມູນຄ່າເກີນດຸນການຄ້າລວມປະມານ 73 ລ້ານໂດລາ ໂດຍເດືອນ 2 ເກີນດຸນປະມານ 48 ລ້ານໂດລາ (ບັນລຸທັງໝົດ 962 ລ້ານໂດລາ: ສົ່ງອອກ 505 ລ້ານໂດລາ ແລະ ນໍາເຂົ້າ 457 ລ້ານໂດລາ) ແລະ ເດືອນ 3 ເກີນດຸນ 25 ລ້ານໂດລາ (ທັງໝົດ 1.236 ລ້ານໂດລາ: ສົ່ງອອກ 630 ລ້ານໂດລາ ແລະ ນໍາເຂົ້າ 606 ລ້ານໂດລາ). ຈາກເດືອນ 4 ຫາ ເດືອນ 8, ສປປ ລາວ ຂາດດຸນການຄ້າເປັນເດືອນທີ 5 ຕິດຕໍ່ກັນ ຖ້າລວມທັງເດືອນ 1 ປີນີ້ ແມ່ນປະເທດເຮົາຂາດດຸນ 6 ເດືອນໃນ 8 ເດືອນຂອງການສົ່ງອອກ ແລະ ນໍາເຂົ້າສິນຄ້າ ປີ 2023 ຊຶ່ງລວມການຂາດດຸນທັງໝົດ 6 ເດືອນມີປະມານ 457 ລ້ານໂດລາ.

ສະເພາະການຂາດດຸນ 5 ເດືອນຕິດຕໍ່ກັນ ມີມູນຄ່າລວມທັງໝົດປະມານ 444 ລ້ານໂດລາ ໂດຍນັບຈາກເດືອນ 4 ປີນີ້ມາ ທີ່ຂາດດຸນ 17 ລ້ານໂດລາ (ທັງໝົດ 947 ລ້ານໂດລາ: ສົ່ງອອກ 465 ລ້ານໂດລາ ແລະ ນໍາເຂົ້າ 482 ລ້ານໂດລາ), ເດືອນ 5 ຂາດດຸນ 47 ລ້ານໂດລາ (ທັງໝົດ 1.086 ລ້ານໂດລາ: ສົ່ງອອກ 520 ລ້ານໂດລາ ແລະ ນໍາເຂົ້າ 567 ລ້ານໂດລາ), ເດືອນ 6 ຂາດດຸນ 126 ລ້ານໂດລາ (ທັງໝົດ 1.041 ລ້ານໂດລາ: ສົ່ງອອກ 458 ລ້ານໂດລາ ແລະ ນໍາເຂົ້າ 584 ລ້ານໂດລາ), ເດືອນ 7 ຂາດດຸນ 166 ລ້ານໂດລາ (ທັງໝົດ 1.025 ລ້ານໂດລາ: ສົ່ງອອກ 429 ລ້ານໂດລາ ແລະ ນໍາເຂົ້າ 595 ລ້ານໂດລາ). ສ່ວນມູນຄ່າການຂາດດຸນການຄ້າເດືອນ 8 ໄດ້ລາຍງານຂ້າງເທິງນັ້ນ.

(ຂ່າວ: ສຸກສະຫວັນ, ພາບ: LTP)