ຂ່າວຕ່າງປະເທດລາຍງານ ເມື່ອບໍ່ດົນມານີ້, ອົງການການສຶກສາ, ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO) ໄດ້ເປີດເຜີຍບົດລາຍງານໂດຍລະບຸວ່າ: UNESCO ໄດ້ແຕ່ງຕັ້ງນະຄອນຫຼວງກາຣາກັສ ເປັນເມືອງສ້າງສັນທາງດ້ານດົນຕີ (Creative City of Music).

ບົດລາຍງານລະບຸວ່າ: ມີການຄັດເລືອກ 55 ເມືອງຈາກທົ່ວໂລກເຂົ້າສູ່ເຄືອຂ່າຍເມືອງສ້າງສັນຂອງ UNESCO ເນື່ອງໃນວັນເມືອງໂລກ ຊຶ່ງກົງກັບວັນອັງຄານ ທີ 31 ຕຸລາ ຜ່ານມາ. ເມືອງເຫຼົ່ານີ້ໄດ້ຮັບຄັດເລືອກເພາະມີຄວາມຕັ້ງໃຈເບິ່ງແຍງ ແລະ ໃຊ້ປະໂຫຍດຈາກວັດທະນະທຳ ແລະ ຄວາມຄິດສ້າງສັນ ຊຶ່ງເປັນສ່ວນໜຶ່ງຂອງຍຸດທະສາດການພັດທະນາ ແລະ ສະທ້ອນແນວປະຕິບັດອັນສ້າງສັນໃນການວາງຜັງເມືອງທີ່ຢຶດຖືມະນຸດເປັນສູນກາງ. ທ່ານ ເອີນເນສໂຕ ວິນກັສ ລັດຖະມົນຕີກະຊວງວັດທະນະທຳຂອງເວເນຊູເອລາໄດ້ສະແດງຄວາມຍິນດີ ແລະ ລະບຸວ່າ: ການແຕ່ງຕັ້ງນີ້ກົງກັບວັນຄ້າຍວັນເກີດຂອງ ທ່ານ ອາລີ ພຣິມີຣາ ໜຶ່ງໃນນັກດົນຕີທີ່ມີຊື່ສຽງທີ່ສຸດຂອງປະເທດດ້ວຍ.

ໃນເດືອນກໍລະກົດຜ່ານມາ, ທ່ານ ຄາແມນ ເມເລນເດດ ເຈົ້າຄອງກຳແພງນະຄອນຫຼວງກາຣາກັສ ປະກາດວ່າ: ລັດຖະບານໄດ້ສະເໜີການແຕ່ງຕັ້ງນະຄອນຫຼວງກາຣາກັສ ເປັນເມືອງສ້າງສັນທາງດ້ານດົນຕີ ເນື່ອງໃນວາລະກໍ່ຕັ້ງເມືອງ ຄົບຮອບ 456 ປີ.