ວິທະຍຸກະຈາຍສຽງຫວຽດນາມລາຍງານວ່າ: ໃນກອງປະຊຸມສຸດຍອດຄວາມປອດໄພກ່ຽວກັບປັນຍາປະດິດ (AI) ທີ່ຈັດຂຶ້ນໃນວັນທີ 1 ພະຈິກ ຜ່ານມາ ຢູ່ ລອນດອນ ປະເທດອັງກິດ, ມີບັນດາປະເທດໃຫຍ່ໃນຂົງເຂດປັນຍາປະດິດ ຄື: ອາເມຣິກາ, ຈີນ ແລະ ສະຫະພາບເອີຣົບ ໄດ້ຕົກລົງເຫັນດີຮັບຮອງເອົາ “ຖະແຫຼງການ” ເພື່ອຊຸກຍູ້ການຮ່ວມມື ຮັບປະກັນຄວາມປອດໄພໃນຂົງເຂດປັນຍາປະດິດ.

ຂ່າວລະບຸວ່າ: ຖະແຫຼງການວາງອອກສອງທິດທາງການເຄື່ອນໄຫວ, ໜຶ່ງແມ່ນສຸມໃສ່ກໍານົດບັນດາຜົນກະທົບຄວາມສ່ຽງຂອງ AI ຕໍ່ກັບບັນດາປະເທດ, ກໍ່ສ້າງບັນດາແບບວິທີວິທະຍາສາດເພື່ອຄົ້ນຄວ້າກ່ຽວກັບບັນດາຄວາມສ່ຽງ. ສອງ, ຊຸກຍູ້ການສ້າງບັນດານະໂຍບາຍລະຫວ່າງຊາດ ເພື່ອລຶບລ້າງບັນດາຄວາມສຽງກ່ຽວກັບ AI.

ມີຫຼາຍກວ່າ 25 ປະເທດ ທີ່ເຂົ້າຮ່ວມກອງປະຊຸມສຸດຍອດຄວາມປອດໄພໃນຂົງເຂດ AI ໄດ້ລົງນາມໃນຖະແຫຼງການ. ໃນນັ້ນມີອາເມຣິກາ, ຈີນ, ສະຫະພາບເອີຣົບ (EU). ນີ້ຖືວ່າແມ່ນຜົນສຳເລັດທີ່ໜ້າສົນໃຈ ເພາະວ່າກ່ອນໜ້ານັ້ນເກີດມີຄວາມວິຕົກກັງວົນວ່າຄວາມເຄັ່ງຕຶງກ່ຽວກັບເຕັກໂນໂລຊີລະຫວ່າງ ອາເມຣິກາ ແລະ ຈີນ ໃນໄລຍະຜ່ານມາ ອາດຈະກີດຂວາງບັນດາຄວາມພະຍາຍາມ ທີ່ແນໃສ່ຄວບຄຸມ AI ໃນທົ່ວໂລກ.