ກົມໂຄສະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບສໍານັກຂ່າວໜັງສືພິມ, ໂທລະພາບ ແລະ ສື່ອອນລາຍຈາກສະມາຄົມນັກຂ່າວໄທ ໄດ້ສໍາເລັດກິດຈະກໍາການຢ້ຽມຢາມຜະລິດຕະພັນທ່ອງທ່ຽວຢູ່ແຂວງຄໍາມ່ວນ ແລະ ສະຫວັນນະເຂດໃນວັນທີ 30 ມັງກອນນີ້, ຈຸດປະສົງເພື່ອແນໃສ່ໂຄສະນາສົ່ງເສີມການທ່ອງທ່ຽວ ເພື່ອດຶງດູດນັກທ່ອງທ່ຽວຈາກປະເທດໃກ້ຄຽງໃຫ້ເຂົ້າມາທ່ຽວລາວຫຼາຍຂຶ້ນ.
ໃນໂອກາດນໍາພາຄະນະສື່ມວນຊົນໄທເຄື່ອນໄຫວໃນຄັ້ງນີ້, ທ່ານ ຈິຣະພົງ ປະເສີດພົນກຣັງ ເລຂາທິການສະມາຄົມນັກຂ່າວ, ນັກໜັງສືພິມແຫ່ງປະເທດໄທໄດ້ໃຫ້ສໍາພາດວ່າ: ໂຄງການນີ້, ໄດ້ຮັບຜົນສໍາເລັດຢ່າງຈົບງາມ ແລະ ສື່ມວນຊົນໄທລ້ວນແຕ່ມີຄວາມປະທັບໃຈຕໍ່ສະຖານທີ່ທ່ອງທ່ຽວທາງດ້ານທໍາມະຊາດ, ປະຫວັດສາດ, ວັດທະນະທຳ ແລະ ອາຫານລາວຢູ່ 2 ແຂວງດັ່ງກ່າວ ຊຶ່ງເຫັນໄດ້ນະໂຍບາຍສົ່ງເສີມການທ່ອງທ່ຽວຂອງລັດຖະບານລາວ ລວມທັງພາກເອກະຊົນທີ່ມີສ່ວນຮ່ວມພັດທະນາ ແລະ ຍົກລະດັບແຫຼ່ງທ່ອງທ່ຽວໃຫ້ໄດ້ມາດຕະຖານ ເພື່ອຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ແນໃສ່ຊຸກຍູ້ເສດຖະກິດຂອງແຂວງ ກໍຄືຂອງປະເທດໃຫ້ຂະຫຍາຍຕົວຢ່າງຕໍ່ເນື່ອງ, ຮັບຮູ້ໄດ້ເຖິງປະຫວັດທີ່ເກົ່າແກ່ ແລະ ມີຄວາມເຊື່ອມໂຍງກັນລະຫວ່າງພະທາດອີງຮັງ, ພະທາດສີໂຄດຕະບອງ, ພະທາດໂຜ່ນທີ່ປະຊາຊົນໄທ ແລະ ລາວ ໃຫ້ຄວາມເຄົາລົບນັບຖື. ນອກຈາກນີ້, ສື່ມວນຊົນໄທ ແລະ ລາວຍັງໄດ້ແລກປ່ຽນຂໍ້ມູນຂ່າວສານ, ສ້າງຄວາມເຂົ້າໃຈຊຶ່ງກັນ ແລະ ກັນດ້ານຮີດຄອງປະເພນີ, ພາສາ, ຄໍາເວົ້າ ແລະ ອື່ນໆ ເພື່ອເຮັດໃຫ້ສື່ມວນຊົນທັງສອງປະເທດມີການພົວພັນຮ່ວມມືກັນຫຼາຍຂຶ້ນໃນຕໍ່ໜ້າ.
ກິດຈະກໍາໃນຄັ້ງນີ້, ສື່ມວນຊົນ 2 ປະເທດລາວ ແລະ ໄທໄດ້ເຄື່ອນໄຫວເກັບກຳຂ່າວ ແລະ ຢ້ຽມຢາມສະຖານທີ່ທ່ອງທ່ຽວທີ່ໂດດເດັ່ນທາງດ້ານປະຫວັດສາດ ແລະ ທໍາມະຊາດຂອງ 2 ແຂວງຄື:ພະທາດສີໂຄດຕະບອງ, ຖໍ້າພະໜອງປາຝາ, ໜອງປາເຊືອມ, ພູຜາມ່ານ, ຂຸນກອງແລງ, ຖໍ້ານໍ້າລອດເຊບັ້ງໄຟ, ຕາດສຽງລືຢູ່ແຂວງຄໍາມ່ວນ ແລະ ຢ້ຽມພະທາດອີງຮັງ, ພະທາດໂຜ່ນ, ຫໍໄຕປີດົກ ແລະ ດົງລີງຢູ່ແຂວງສະຫວັນນະເຂດຕື່ມອີກ.
(ຂ່າວ-ພາບ: ວັນເພັງ)
ຄໍາເຫັນ