ການຊ່ວງເຮືອປະເພນີ ປະຈໍາປີ 2024 ທີ່ນະຄອນປາກເຊ ແຂວງຈໍາປາສັກ ເປີດຂຶ້ນໃນວັນທີ 18 ຕຸລານີ້ ຢູ່ບໍລິເວນແຄມນໍ້າເຊໂດນ ບ້ານທ່າສາລາຄໍາ ໂດຍການໃຫ້ກຽດເຂົ້າຮ່ວມ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ, ມີແຂກຖືກເຊີນ, ນັກທ່ອງທ່ຽວທັງພາຍໃນ ແລະ ຕ່າງປະເທດ ຕະຫຼອດຮອດພໍ່ແມ່ພີ່ນ້ອງຊາວນະຄອນປາກເຊເຂົ້າຮ່ວມ.

ໃນພິທີ, ທ່ານ ບົວລີ ເພັດສົງຄາມ ເຈົ້ານະຄອນປາກເຊລາຍງານວ່າ: ການແຂ່ງຂັນຊ່ວງເຮືອປະເພນີ ປະຈໍາປີ 2024 ທີ່ນະຄອນປາກເຊ, ປີນີ້ ມີເຮືອຊ່ວງມາຈາກບັນດາບ້ານພາຍໃນນະຄອນປາກເຊ, ຈາກບັນດາເມືອງຂອງແຂວງຈໍາປາສັກ ແລະ ແຂວງສາລະວັນ ເຂົ້າຮ່ວມ 59ລໍາ.ມີການແຂ່ງຂັນ 7 ປະເພດຄື: ເຮືອຊ່ວງ 12 ສີພາຍ (ຊາຍ) ມີ 20ລໍາ, ເຮືອຊ່ວງ 24 ສີພາຍ (ຊາຍ) ມີ 10ລຳ, ເຮືອຊ່ວງ 24 ສີພາຍ (ຍິງ) ມີ 7ລໍາ, ເຮືອຊ່ວງປະເພນີ 33 ສີພາຍ (ຊາຍ) ມີ 8ລຳ, ເຮືອຊ່ວງປະເພນີ 33 ສີພາຍ (ຍິງ) ມີ 6ລໍາ, ເຮືອສູດ 33 ສີພາຍ (ຊາຍ) ມີ 5ລໍາ ແລະ ເຮືອຊ່ວງ 55 ສີພາຍ (ຊາຍ) ມີ 3 ລຳ.

ໃນໂອກາດນີ້, ທ່ານ ຮອງນາຍົກລັດຖະມົນຕີ ໃຫ້ກຽດຂຶ້ນລັ່ນຄ້ອງ 9 ບາດ ແລະ ປ່ອຍປຸ່ມເປົ້າ ເປີດການແຂ່ງຂັນຊ່ວງເຮືອ ປະເພນີ ປະຈໍາປີ 2024 ຢ່າງເປັນທາງການ ໂດຍມີທ່ານເຈົ້າແຂວງ, ບັນດາທ່ານການນໍາ ແລະ ແຂກເຊື້ອເຊີນ ໃຫ້ກຽດເຂົ້າຮ່ວມເປັນສັກຂີພະຍານ.

(ຂ່າວ-ພາບ: ທູນທອງໃຈ)