ວັນທີ 5 ພະຈິກຜ່ານມາ ທີ່ສະໂມສອນ ເມືອງເງິນ ແຂວງໄຊຍະບູລີ ໄດ້ຈັດດກອງປະຊຸມຄົບຄະນະບໍລິຫານງານພັກເມືອງເງິນ ຄັ້ງທີ 14 ສະໄຫມທີ V ພາຍໃຕ້ການເປັນປະທານຂອງສະຫາຍ ທະວິສັກ ໄຊຍະວົງ ເລຂາຄະນະບໍລິຫານງານພັກເມືອງ ເຈົ້າເມືອງໆເງິນ, ໂດຍການເຂົ້າຮ່ວມຂອງ ສະຫາຍ ສຳລານ ສຸວັນນະໂຊດ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີຄະນະບໍລິຫານງານພັກເມືອງ, ສະມາຊິກສະພາປະຊາຊົນແຂວງປະຈໍາເມືອງ, ເລຂາຄະນະພັກຮາກຖານ, ເລຂາໜ່ວຍພັກທົ່ວເມືອງ ເຂົ້າຮ່ວມ.

ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການຜ່ານຮ່າງບົດລາຍງານການນໍາພາ-ຊີ້ນໍາ ວຽກງານຮອບດ້ານ ໄລຍະ 9 ເດືອນ ແລະ ທິດທາງແຜນການ 3 ເດືອນທ້າຍປີ 2024, ຮ່າງບົດລາຍງານກ່ຽວກັບການຕີລາຄາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ ໄລຍະ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍປີ 2024 ຕິດພັນກັບການຕີລາຄາ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ. ຮັບຟັງ ຄຳແນະນຳຂອງທ່ານເຈົ້າແຂວງ ສະບັບເລກທີ 82/ຈຂ.ຊຍ, ລົງວັນທີ 11 ກໍລະກົດ 2024 ກ່ຽວກັບການເຊື່ອຖື ຮີດຄອງປະເພນີ ຂອງປະຊາຊົນບັນດາເຜົ່າຢູ່ແຂວງ. ຮັບຟັງການປະກອບຄໍາເຫັນ ຈາກບັນດາໜ່ວຍພັກຮາກຖານອ້ອມຂ້າງເມືອງ ແລະ ໜ່ວຍພັກຮາກຖານບ້ານຈໍານວນໜຶ່ງ. ຈາກນັ້, ຜູ້ເຂົ້າຮ່ວມໄດ້ພ້ອມກັນຄົ້ນຄວ້າ ປະກອບຄໍາຄິດຄໍາເຫັນຢ່າງມີຈຸດສຸມ ແລະ ມີຄວາມຮັບຜິດຊອບສູງ ໃສ່ຮ່າງບົດລາຍງານດັ່ງກ່າວ.

(ຂ່າວ: ອິນແປງ ແຫວນຄຳ)