ເປີດງານເທດສະການອາຫານລາວ ຄັ້ງທີ 20 ພາຍໃຕ້ຄໍາຂວັນ 20 ປີ ເທດສະການອາຫານລາວມີໄຊ ສືບຕໍ່ກ້າວໄປສູ່ສາກົນ ໄດ້ຈັດຂຶ້ນວັນທີ 24 ມັງກອນ ນີ້5 ທີ່ສວນເຈົ້າອານຸວົງ (ແຄມຂອງ) ນະຄອນຫຼວງວຽງຈັນ, ໂດຍມີທ່ານ ນາງ ນາລີ ສີສຸລິດ ພັນລະຍາປະທານປະເທດ; ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ; ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານສູນກາງສະຫະພັນແມ່ຍິງລາວ ພ້ອມດ້ວຍບັນດາທ່ານພັນລະຍາການນໍາ, ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ ປະທານຄະນະກຳມະການຈັດງານເທດສະການອາຫານລາວກ່າວວ່າ: ເພື່ອສືບຕໍ່ອະນຸລັກ ແລະ ສົ່ງເສີມວັດທະນະທຳ, ຮີດຄອງປະເພນີລາວ ໂດຍສະເພາະແມ່ນການປຸງແຕ່ງອາຫານທີ່ເປັນເອກະລັກຂອງລາວໃຫ້ຄົງຢູ່ຄູ່ກັບສັງຄົມລາວຕະຫຼອດໄປ ຊຶ່ງການຈັດງານເທດສະການອາ

ຫານລາວຄັ້ງນີ້ ຄົບຮອບ 20 ປີ, ທັງນີ້ກໍເພື່ອໂຄສະນາອາຫານລາວໃຫ້ເປັນທີ່ຮູ້ຈັກໃນລະດັບອາຊຽນ, ພາກພື້ນ ແລະ ສາກົນ ໄດ້ຮັບຮູ້ຄວາມເຕີບໃຫຍ່ ແລະ ຂະຫຍາຍຕົວຂອງງານເທດສະການອາຫານລາວ ຈາກມື້ເລີ່ມຕົ້ນຈົນມາເຖິງປັດຈຸບັນນີ້ ພ້ອມກັນນັ້ນຍັງເປັນການຊຸກຍູ້ສົ່ງເສີມອາຫານລາວ ເພື່ອຮັບໃຊ້ງານຕ່າງໆ ໂດຍສະເພາະກອງປະຊຸມໃຫຍ່ຄັ້ງທີ IV ຂອງສະມາຄົມນັກທຸລະກິດແມ່ຍິງລາວທີ່ຈະຈັດຂຶ້ນໃນຕໍ່ໜ້າ.

ງານເທດສະການອາຫານລາວ ປີ 2025 ຈະດໍາເນີນເປັນເວລາ 5 ວັນ (ວັນທີ 22-26 ມັງກອນ2025ນີ້ ເລີ່ມແຕ່ເວລາ 9:00 ໂມງ 22:00 ໂມງ); ໃນພິທີມີຫຼາຍກິດຈະກຳເຊັ່ນ: ການແຂ່ງຂັນ “ພາເຂົ້າທ່ຽງອາຫານລາວ” ສະຫຼັບກັນໄປໃນແຕ່ລະວັນ, ສໍາລັບປີນີ້ມີ 180 ຮ້ານ, ໃນນັ້ນມີຮ້ານອາຫານເອກະລັກຂອງແຕ່ລະທ້ອງຖິ່ນແບບລາວໆ, ອາຫານລາວແບບປະຍຸກ, ຂອງຫວານ, ເຄື່ອງດື່ມລວມ 165 ຮ້ານ, ສິນຄ້າຫັດຖະກຳ 15 ຮ້ານ, ຄາດວ່າປີນີ້ຈະມີເງິນໝູນວຽນປະມານ 7 ຕື້ກີບ.

(ຂ່າວ-ພາບ: ຍຸພິນທອງ-ບຸນອູ້ມ)