 |
ພິທີເຊັນສັນຍາສໍາປະທານ ໄດ້ຈັດຂຶ້ນໃນວັນທີ 6 ກໍລະກົດຜ່ານມາທີ່ ເມືອງທ່າແຂກ ໂດຍມີທ່ານ ພາກອນ ແກ້ວມະນີ ຫົວໜ້າຫ້ອງການຄະນະກຳມະການສົ່ງເສີມ ແລະ ຄຸ້ມຄອງການລົງທຶນແຂວງ, ທ່ານ ນາງ ພະນົມພອນ ຢ້ຽມພະບູ່ ປະທານບໍລິສັດພະນົມພອນ ການຄ້າ ຂາອອກ-ຂາເຂົ້າ ຈໍາກັດຜູ້ດຽວ, ມີພາກສ່ວນກ່ຽວຂ້ອງເຂົ້າຮ່ວມ.
ໂຄງການດັ່ງກ່າວມີຈຸດປະສົງເພື່ອຂຸດຄົ້ນ ແລະ ປຸງແຕ່ງຫີນກໍ່ສ້າງສຳລັບຈຳໜ່າຍພາຍໃນປະເທດ ພ້ອມທັງສ້າງພື້ນຖານດ້ານການລົງທຶນ ຊຶ່ງໂຄງການຈະດຳເນີນພາຍໃຕ້ຮູບແບບການລົງທຶນພາຍໃນ 100% ໂດຍມີມູນຄ່າການລົງທຶນລວມ 1,100,000 ໂດລາ ແລະ ທຶນຈົດທະບຽນ 1,000,000 ໂດລາ, ກຳນົດອາຍຸສຳປະທານໄວ້ 5 ປີ ແລະ ສາມາດພິຈາລະນາຕໍ່ອາຍຸໄດ້ຕາມເງື່ອນໄຂທີ່ກຳນົດ.
ແຜນການດຳເນີນງານປະກອບດ້ວຍການບຸກເບີກພື້ນທີ່ຂຸດຄົ້ນ, ການກໍ່ສ້າງເສັ້ນທາງເຂົ້າສູ່ພື້ນທີ່ການຜະລິດ, ການກໍ່ສ້າງຫ້ອງການ, ການຕິດຕັ້ງອຸປະກອນ ແລະ ເຄື່ອງຈັກ ກ່ອນເຂົ້າສູ່ຂັ້ນຕອນການຜະລິດ ແລະ ຈຳໜ່າຍ.
ນອກຈາກນັ້ນ ບໍລິສັດຍັງຈະຕ້ອງດຳເນີນກິດຈະການຕາມລະບຽບກົດໝາຍຢ່າງເຄັ່ງຄັດ, ຮັບຜິດຊອບດ້ານເງິນທຶນດ້ວຍຕົນເອງ, ສົ່ງເສີມການຈ້າງງານພາຍໃນທ້ອງຖິ່ນ ແລະ ດຳເນີນມາດຕະການປົກປັກຮັກສາສິ່ງແວດລ້ອມຕາມເງື່ອນໄຂທີ່ກຳນົດໄວ້ໃນບົດສຶກສາຜົນກະທົບສິ່ງແວດລ້ອມ ພ້ອມທັງປະຕິບັດພັນທະດ້ານພາສີ ແລະ ຄ່າສຳປະທານຕາມກົດໝາຍຂອງ ສປປ ລາວ.
ຂ່າວ: ກອງຄຳ
ຄໍາເຫັນ