ຄະນະນຳສະຫະພັນກຳມະບານລາວ ວາງກະຕ່າດອກໄມ້ ຢູ່ໜ້າຮູບປັ້ນຫຼໍ່ ປະທານ ໄກສອນ ພົມວິຫານ ເນື່ອງໃນໂອກາດ ວັນສ້າງຕັ້ງສະຫະພັນກໍາມະບານລາວ ຄົບຮອບ 69 ປີ (ວັນທີ 1 ກຸມພາ 1956 ຫາ ວັນທີ 1 ກຸມພາ 2025) ໃນວັນທີ 31 ມັງກອນ ນີ້, ນຳໂດຍ ສະຫາຍ ເລັດ ໄຊຍະພອນ ກຳມະການສູນກາງພັກເລຂາຄະນະບໍລິຫານງານພັກປະທານຄະນະບໍລິຫານງານສູນກາງສະຫະພັນກໍາມະບານລາວ ໂດຍໄດ້ນຳເອົາກະຕ່າດອກໄມ້ ມາຈັດພິທີສະດຸດີຢູ່ໜ້າຮູບປັ້ນຫຼໍ່ ປະທານ ໄກສອນ ພົມວິຫານ ເພື່ອສະແດງຄວາມເຄົາລົບຮັກ, ກະຕັນຍູຮູ້ບຸນຄຸນ ແລະ ລະນຶກເຖິງຜູ້ນໍາທີ່ດີເດັ່ນ ແລະ ເຄົາລົບຮັກ ຂອງພັກ-ລັດ ແລະ ປວງຊົນລາວທັງຊາດ, ຜູ້ນໍາພາຖະນຸບໍາລຸງ, ຝຶກຝົນຫຼໍ່ຫຼອມກໍ່ສ້າງສະຫະພັນກຳມະບານລາວ ໃຫ້ໜັກແໜ້ນເຂັ້ມແຂງຢ່າງບໍ່ຢຸດຢັ້ງ, ຊື່ສຽງຮຽງນາມຂອງ ປະທານ ໄກສອນ ພົມວິຫານ ໄດ້ຕິດພັນຢ່າງສະໜິດແໜ້ນ ຕະຫຼອດໄລຍະແຫ່ງການນຳພາ ພາລະກິດປະຕິວັດ ອັນຍິ່ງໃຫຍ່ຂອງພັກ ແລະ ຂອງປະເທດຊາດ ທັງຢູ່ໃນໄລຍະການຕໍ່ສູ້ກູ້ຊາດ ກໍຄືໄລຍະປົກປັກຮັກສາ-ສ້າງສາພັດທະນາປະເທດຊາດ, ເປັນຜູ້ລິເລີ່ມ ແລະ ນຳພາ ພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກ ຍາດໄດ້ໄຊຊະນະສະຫງ່າງາມຕະຫຼອດມາ.
ຄຸນງາມຄວາມດີ, ວິລະກຳອັນລໍ້າຄ່າຂອງ ປະທານ ໄກສອນ ພົມວິຫານ ໄດ້ກາຍເປັນສັນຍາລັກແຫ່ງການເຕົ້າໂຮມຄວາມສາມັກຄີເປັນເອກະພາບ ໃນທຸກຊັ້ນຄົນ, ທຸກຊົນເຜົ່າ, ທຸກສາສະໜາ, ທຸກເພດໄວ ແລະ ບັນດາປະຊາຊາດທີ່ຮັກຫອມສັນຕິພາບທົ່ວໂລກຊຶ່ງຈະຖືກຈາລຶກໄວ້ໃນດວງໃຈຕະຫຼອດກາລະນານ.
ໃນວັນດຽວກັນ, ຄະນະນຳສູນກາງສະຫະພັນກໍາມະບານລາວ ກໍໄດ້ຈັດການແຂ່ງຂັນກິລາດອກປີກໄກ່ ຊີງຂັນມິດຕະພາບ ຕ້ອນຮັບວັນສ້າງຕັ້ງສະຫະພັນກໍາມະບານລາວ ຄົບຮອບ 69 ປີ ທີ່ສະຖາບັນພັດທະນາກໍາມະບານລາວ ນະຄອນຫຼວງວຽງຈັນ ເພື່ອເປັນການເຕົ້າໂຮມຄວາມສາມັກຄີ ສ້າງກິດຈະກໍາຕີດອກປີກໄກ່, ເປັນການຮັດແໜ້ນຄວາມສາມັກຄີຮ່ວມກັນ ລະຫວ່າງ ການນໍາ ກັບການນໍາ ແລະ ສະຫະພັນກໍາມະບານ, ກະຊວງ, ອົງການ ເພື່ອສ້າງຂະບວນການຂໍ່ານັບຮັບຕ້ອນ ວັນສ້າງຕັ້ງສະຫະພັນກໍາມະບານລາວ ຄົບຮອບ 69 ປີ.
(ຂ່າວ-ພາບ: ຍຸພິນທອງ-ບຸນອູ້ມ)
ຄໍາເຫັນ