ເຂົ້າຫຼາມ-ປີ້ງໄກ່​ ອາຫານພື້ນເມືອງລາວເອກະລັກໃນງານບຸນພະທາດຫຼວງ

ທ່ານ ນາງ ໝີ ໄຊສະຫວັນ ປະຊາຊົນບ້ານທາງແບ່ງນາໂພ ເມືອງໂພນໂຮງ ແຂວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນ ໃນວັນທີ 2 ພະຈິກ ຜ່ານມາວ່າ: ຕົນເອງ ແລະ ຄອບຄົວໄດ້ມາຂາຍເຂົ້າຫຼາມ-ປີ້ງໄກ່ໃນງານບຸນນະມັດສະການພະທາດຫຼວງວຽງຈັນທຸກໆປີ, ເຂົ້າຫຼາມ-ປີ້ງໄກ່ ຖືເປັນເອກະລັກໃນງານບຸນທີ່ຂາດບໍ່ໄດ້ ປະຊາຊົນສ່ວນໃຫຍ່ນິຍົມຮັບປະທານ ແລະ ຊື້ກັບບ້ານເພື່ອເປັນຂອງຕ້ອນຂອງຝາກໃນຍາມບຸນ ລາຄາປີ້ງໄກ່ເລີ່ມຕົ້ນ 50,000 ກີບຂຶ້ນໄປ, ເຂົ້າຫຼາມເລີ່ມຕົ້ນ 20,000 ກີບຕໍ່ບັ້ງຂຶ້ນໄປຊຶ່ງມີຫຼາຍລາຄາທີ່ແຕກຕ່າງກັນ.ປີນີ້ເຫັນວ່າມີຄົນມາທ່ຽວງານບຸນຫຼາຍເປັນພິເສດ ແລະ ໄດ້ຂາຍດີກວ່າທຸກໆປີ ເຮັດໃຫ້ງານບຸນມີບັນຍາກາດຄຶກຄື້ນມ່ວນຊື່ນ ເພື່ອສົ່ງເສີມວັດທະນະທຳອັນດີງາມຂອງຊາດໄວ້ໃຫ້ຄົງຢູ່ຕະຫຼອດໄປ.