ຄະນະຊາວໜຸ່ມ ປະຊາຊົນປະຕິວັດລາວ(ຄຊປປລ) ແຂວງຫຼວງນໍ້າທາຮ່ວມກັບບໍລິສັດວິສາຫະກິດຫັດຖະກຳ ປະດິດລາວຈຳປານະຄອນຫຼວງວຽງຈັນ ໄດ້ຈັດພິທີເຊັນສັນຍາຮ່ວມມືສ້າງຂະບວນການ,ສ້າງຜະລິດຕະພັນເປັນເອກະລັກຂອງຊາວໜຸ່ມແຂວງຂຶ້ນໃນວັນທີ 20 ມິຖຸນາຜ່ານມາ ຮ່ວມລົງນາມຄັ້ງນີ້ໂດຍມີທ່ານນາງ ປານີ ຈິດດາລາ ເລຂາ ຄຊປປລ ແຂວງ ແລະ ທ່ານນາງ ວະລິນລັດ ຈະລີນທັງສົມບັດ ປະທານບໍລິຫານຝ່າຍເສດຖະກິດຂອງວິສາຫະກິດຫັດຖະກຳປະດິດລາວຈຳປາ ໂດຍຊ້ອງໜ້າແຂກຖືກເຊີນ ແລະ ພະນັກງານທີ່ກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

ການເຊັນສັນຍາຄັ້ງນີ້ ເພື່ອເປັນບ່ອນອີງໃນການປະຕິບັດການຮ່ວມມືຜະລິດ ແລະ ຈໍາໜ່າຍນໍ້າຫອມ, ເສື້ອຢືດໂປໂລ ແລະ ກະເປົາເປ້ຊາວໜຸ່ມແຂວງ, ເພື່ອປະຕິບັດສິດໜ້າທີ່ ແລະ ຄວາມຮັບຜິດຊອບຂອງຄູ່ສັນຍາກຳນົດລະບຽບການ, ຫຼັກການ ແລະ ການພົວພັນຮ່ວມມືຕ່າງໆ ໂດຍສະເພາະແມ່ນອາຍຸສັນຍາ, ທຶນຂອງໂຄງການ, ຈໍານວນຜະລິດຕະພັນ, ການແບ່ງປັນພັນທະ, ການແກ້ໄຂຂໍ້ຂັດແຍ່ງ, ຂໍ້ຫ້າມ, ການຍົກເລີກສັນຍາ ແລະ ຜົນສັກສິດຂອງສັນຍາ. ສຳລັບຄວາມຮັບຜິດຊອບຂອງຝ່າຍ"ຂໍ"ແມ່ນຈະຕັ້ງໜ້າລົງທຶນເຂົ້າໃສ່ການຜະລິດ ຜະລິດຕະພັນນໍ້າຫອມ, ເສື້ອຢືດໂປໂລ ແລະກະເປົາເປ້ດ້ວຍທຶນຂອງຕົນເອງທັງໝົດ 100% ພ້ອມທັງຮັບປະກັນດ້ານຄຸນນະພາບຕໍ່ຜູ້ຊົມໃຊ້, ຮູບແບບ ແລະ ສີສັນທີ່ເປັນເອກະລັກສະເພາະຂອງຜະລິດຕະພັນໂດຍມີການຈົດລິຂະສິດຖືກຕ້ອງຕາມກົດໝາຍວ່າດ້ວຍລິຂະສິດ; ມີສິດທວງຖາມເອົາເງິນທຶນຄືນຕາມການຂາຍຕົວຈິງແຕ່ລະໄລຍະ ແລະ ເວລາທີ່ໄດ້ຕົກລົງກັນ ພ້ອມທັງຮັບຜິດຊອບຄ່າບໍລິຫານພາຍໃນ ແລະ ຄ່າຂົນສົ່ງຜະລິດຕະພັນໃຫ້ຊາວໜຸ່ມແຂວງຈົນສຳເລັດ. ການຈັດຕັ້ງປະຕິບັດໂຄງການດັ່ງກ່າວເປັນເວລາ 1 ປີ ນັບແຕ່ວັນທີ 20 ມິຖຸນາ 2024-ວັນທີ 20 ມິຖຸນາ 2025 ສາມາດຕໍ່ສັນຍາໄດ້ພາຍໃຕ້ເງື່ອນໄຂ ແລະ ການຕົກລົງເຫັນດີຂອງທັງສອງຝ່າຍ.

ຂ່າວ-ພາບ: ມຸນຕີ