ເມືອງຈຳປາສັກ ໄດ້ຈັດກອງປະຊຸມຝຶກອົບຮົບການຂຶ້ນທະບຽນແຮງງານລາວ ແລະ ແຮງງານຕ່າງປະເທດຂັ້ນເມືອງຕາມວາລະແຫ່ງຊາດໃຫ້ບັນດາບໍລິສັດ, ໂຮງຈັກ, ໂຮງງານ ແລະ ຫົວໜ່ວຍບໍລິການພາຍໃນເມືອງ ຂຶ້ນໃນວັນທີ 20 ມິຖຸນາຜ່ານມາ ທີ່ຫ້ອງປະຊຸມທົ່ງນາງາມ ເມືອງຈຳປາສັກ ແຂວງຈຳປາສັກ ໂດຍການເປັນປະທານຂອງທ່ານ ຄຳພູ ສີພົມມາ ຮອງເຈົ້າເມືອງ, ມີທ່ານ ຍຸທິນ ຈັນທະວົງ ຮັກສາການຫົວໜ້າຫ້ອງການແຮງງານ ແລະ ສະຫວັດດີການສັງຄົມ (ຮສສ) ເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງແຈ້ງການຂອງທ່ານເຈົ້າແຂວງຈຳປາສັກ ສະບັບເລກທີ 07/ຈຂ.ຈສ, ລົງວັນທີ 16 ພຶດສະພາ 2023, ຜ່ານຂໍ້ຕົກລົງຂອງຄະນະຮັບຜິດຊອບການຂຶ້ນທະບຽນແຮງງານລາວ ແລະ ແຮງງານຕ່າງປະເທດຂັ້ນເມືອງຕາມວາລະແຫ່ງຊາດ, ຜ່ານບົດບັນທຶກກອງປະຊຸມຄະນະຮັບຜິດຊອບການຂຶ້ນທະບຽນແຮງງານລາວ ແລະ ແຮງງານຕ່າງປະເທດຂັ້ນແຂວງຕາມວາລະແຫ່ງຊາດ.

ເນື້ອໃນທີ່ນໍາມາຝຶກໃນຄັ້ງນີ້ປະກອບມີເອກະສານກົນໄກການເຊື່ອມໂຍງຂໍ້ມູນຂອງຫົວໜ່ວຍແຮງງານ, ຄູ່ມືການຂຶ້ນທະບຽນແຮງງານລາວ ແລະ ແຮງງານຕ່າງປະເທດ, ລະບົບຄຸ້ມຄອງພະນັກງານສຳລັບຫົວໜ່ວຍແຮງງານ, ກອງປະຊຸມໄດ້ມີການປະກອບຄຳຄິດຄຳເຫັນແລກປ່ຽນບົດຮຽນຊຶ່ງກັນ ແລະ ກັນ, ຕອນທ້າຍໄດ້ຮັບຟັງການໂອ້ລົມຈາກທ່ານ ຄຳພູ ສີພົມມາ ເພື່ອເປັນບ່ອນອີງ ແລະ ຊຸກຍູ້ກອງປະຊຸມໃຫ້ປະສົບຜົນສຳເລັດສູງ.

ຂ່າວ-ພາບ: ໄຊຍະສິດ ສີຫາວົງ