ກອງປະຊຸມສໍາມະນາສ້າງຄວາມເຂັ້ມແຂງວຽກງານຄຸ້ມຄອງອິນເຕີເນັດໃຫ້ຄະນະກໍາມະການຄຸ້ມຄອງອິນເຕີເນັດຂັ້ນເມືອງໄດ້ຈັດຂຶ້ນຫວ່າງບໍ່ດົມານີ້ທີ່ຫ້ອງປະຊຸມ ຫ້ອງວ່າການເມືອງວຽງພູຄາ ແຂວງຫຼວງນໍ້າທາ ໂດຍເປັນກຽດເຂົ້າຮ່ວມມີ ທ່ານ ພູມອນ ຄູນສີລິເຮືອງ ກໍາມະການປະຈໍາພັກເມືອງ ຮອງເຈົ້າເມືອງວຽງພູຄາ, ທ່ານ ບຸນຍືນ ພິລີນຫວນ ຮອງຫົວໜ້າພະແນກ ເຕັກໂນໂລຊີ ແລະ ການສື່ສານແຂວງ, ທ່ານ ສີພັນສີຫາລາດ ຫົວໜ້າຫ້ອງການເຕັກໂນໂລຊີ ແລະ ການສື່ສານເມືອງ, ມີຫົວໜ້າຫ້ອງການ-ຮອງຫ້ອງການ, ກອງບັນຊາການ ປກຊ-ປກສ, ທີມງານຄະນະກໍາມະການຄຸ້ມຄອງອິນເຕີເນັດຂັ້ນແຂວງ ແລະ ຫ້ອງການອ້ອມຂ້າງເມືອງເຂົ້າຮ່ວມ.

ໃນກອງປະຊຸມ, ທ່ານ ສີພັນ ສີຫາລາດ ໄດ້ລາຍງານສະພາບລວມໂດຍຫຍໍ້ກ່ຽວກັບການຄຸ້ມຄອງອິນເຕີເນັດພາຍໃນເມືອງ ແລະ ຂໍ້ສະເໜີອື່ນໆ, ຮັບຟັງການຜ່ານຂໍ້ຕົກລົງຂອງທ່ານເຈົ້າແຂວງ, ຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແຕ່ງຕັ້ງ ຄະນະກໍາມະການຄຸ້ມຄອງອິນເຕີເນັດຂັ້ນແຂວງ ແລະ ຂັ້ນເມືອງ, ຮັບຟັງການເຜີຍແຜ່ກ່ຽວກັບການນໍາໃຊ້ສື່ສັງຄົມອອນລາຍໃຫ້ມີຄວາມປອດໄພ ແລະ ມີສະຕິຕໍ່ການບໍ່ຖືກຫຼອກລວງທາງອອນລາຍ, ການນໍາໃຊ້ສື່ສັງຄົມອອນລາຍ ຊຶ່ງປະກອບມີຄວາມໝາຍຂອງສື່ສັງຄົມອອນລາຍ, ປະຫວັດຄວາມເປັນມາຂອງສື່ສັງຄົມອອນລາຍ, ສະຖິຕິການນໍາໃຊ້ສື່ສັງຄົມອອນລາຍໃນໂລກ ແລະ ພາຍໃນ ສປປລາວ, ຜົນປະໂຫຍດ ແລະ ຜົນເສຍຫາຍໃນການນໍາໃຊ້ສື່ສັງຄົມອອນລາຍ, ນິຕິກໍາໃນການຄຸ້ມຄອງສື່ສັງຄົມອອນລາຍຢູ່ ສປປລາວ, ການນໍາໃຊ້ສື່ອອນລາຍໃຫ້ມີຄວາມປອດໄພ ແລະ ສິ່ງທີ່ທ້າທາຍ, ເຜີຍແຜ່ບັນດານິຕິກໍາ ແລະ ກົດໝາຍ ວ່າດ້ວຍການຄຸ້ມຄອງອິນເຕີເນັດ, ຜ່ານຂໍ້ຕົກລົງພະແນກເຕັກໂນໂລຊີ ແລະ ການສື່ສານແຂວງ ກ່ຽວກັບການຄຸ້ມຄອງວຽກງານໄປສະນີພາຍໃນແຂວງ, ຫຼັກການຄຸ້ມຄອງວຽກງານໄປສະນີ, ການຄຸ້ມຄອງບັນດາຫົວໜ່ວຍທຸລະກິດໃຫ້ການບໍລິການໄປສະນີ, ການຄຸ້ມຄອງດ້ານຄຸນນະພາບ ແລະ ມາດຕະຖານເຕັກນິກ, ຮັບຟັງການນໍາສະເໜີສະພາບລວມຂອງສື່ມວນຊົນແຂວງຫຼວງນໍ້າທາ, ລັກສະນະຂອງສື່ມວນຊົນແຂວງ, ສະພາບຫາງສຽງສັງຄົມ, ການຈັດຕັ້ງປະຕິບັດແນວທາງນະໂຍບາຍຂອງພັກເຂົ້າສູຊີວິດຈິງ ແລະ ນໍາສະເໜີວຽກງານປ້ອງກັນຊາດ-ປ້ອງກັນຄວາມສະຫງົບ,.

ໂອກາດດັ່ງກ່າວ ທ່ານ ພູມອນ ຄູນສີລິເຮືອງ, ທ່ານ ບຸນຍືນ ພິລີນຫວນ ໄດ້ຮຽກຮ້ອງມາຍັງຄະນະກໍາມະການຄຸ້ມຄອງອິນເຕີເນັດຂັ້ນເມືອງ ເປັນເຈົ້າການຕິດຕາມກວດກາ ມີສະຕິຕໍ່ການບໍ່ຖືກຫຼອກລວງທາງອອນລາຍ ແລະ ຮຽກຮ້ອງມາຍັງທຸກພາກສ່ວນໃນການນໍາໃຊ້ສື່ສັງຄົມອອນລາຍໃຫ້ມີສະຕິ, ບໍ່ໃຫ້ຕົກເປັນເຫຍື່ອມິດສາຊີບທາງອອນລາຍໃຫ້ມີຄວາມປອດໄພ, ນໍາເອົາເນື້ອໃນເອກະສານຄັ້ງນີ້ລົງເຜີຍແຜ່ໃຫ້ສັງຄົມຮັບຮູ້ ແລະ ເຂົ້າໃຈຕໍ່ກັບການນໍາໃຊ້ອິນເຕີເນັດໃຫ້ທົ່ວເຖິງ.