ສະມາຄົມພັດທະນາກະສິກໍາ ແລະ ສິ່ງແວດລ້ອມແບບຍືນຍົງ(SAEDA) ຮ່ວມກັບ ກົມພັດທະນາຊົນນະບົດ ກະຊວງກະສິກຳ ແລະ ປ່າໄມ້, ພະແນກກະສິກຳ ແລະ ປ່າໄມ້ແຂວງວຽງຈັນ ໄດ້ຈັດກອງປະຊຸມແລກປ່ຽນບົດຮຽນພາວະການເປັນຜູ້ນໍາ, ການບໍລິຫານ ແລະ ການເຊື່ອມສານດ້ານນະໂຍບາຍ ໃຫ້ກຸ່ມກະສິກອນ 4 ເມືອງຢູ່ແຂວງວຽງຈັນຄື: ເມືອງວັງວຽງ, ຫີນເຫີບ, ໂພນໂຮງ ແລະ ເມືອງວຽງຄໍາ ໃນວັນທີ 21 ມິຖຸນາ ຜ່ານມາ ທີ່ເມືອງຫີນເຫີບ ແຂວງວຽງຈັນ ໂດຍມີ ທ່ານ ໂອລົດ ສີສູນທອນ ຮອງເຈົ້າເມືອງຫີນເຫີບ, ທ່ານ ທອງດໍາ ພົງພິຈິດ ຫົວໜ້າສະມາຄົມພັດທະນາກະສິກຳ ແລະ ສິ່ງແວດລ້ອມແບບຍືນຍົງ ແລະ ກະສິກອນ ເຂົ້າຮ່ວມ.

ທ່ານ ທອງດໍາ ພົງພິຈິດ ໄດ້ໃຫ້ຮູ້ວ່າ: ການຈັດກອງປະຊຸມຄັ້ງນີ້, ເພື່ອແລກປ່ຽນບົດຮຽນພາວະການເປັນຜູ້ນໍາ, ການບໍລິຫານ ແລະ ການເຊື່ອສານດ້ານນະໂຍບາຍ ໃນການພັດທະນາກຸ່ມຂອງແຕ່ລະເມືອງ ເປັນຕົ້ນ ເມືອງວັງວຽງ, ຫີນເຫີບ, ໂພນໂຮງ ແລະ ເມືອງວຽງຄໍາ. ທັງນີ້, ກໍເພື່ອຍົກສູງໃຫ້ກຸ່ມຜະລິດກະສິກໍາຮວມຕົວກັນດ້ວຍຮູບແບບເປັນກຸ່ມ ໃຫ້ຊາວກະສິກອນໄດ້ມາແລກປ່ຽນບົດຮຽນນໍາກັນ, ໃນການຈັດຕັ້ງປະຕິບັດໄລຍະຜ່ານມາ, ຊຸກຍູ້ສົ່ງເສີມວຽກງານກະສິກຳບັນດາກຸ່ມເປົ້າໝາຍ ເປັນຕົ້ນສົ່ງເສີມກຸ່ມກະສິກຳສະອາດ, ກຸ່ມຜະລິດກະສິກຳຍືນຍົງ, ກຸ່ມຜະລິດຜັກສະອາດ, ກຸ່ມຜະລິດຜັກສະອາດເປັນສິນຄ້າ, ກຸ່ມຜະລິດກະສິກຳອິນຊີ, ກຸ່ມປູກໝາກກ້ຽງ, ກຸ່ມປູກເຂົ້າ, ກຸ່ມນາບົວ, ກຸ່ມປູກໝາກເງາະ, ກຸ່ມປູກກະລຳປີສະອາດ, ກຸ່ມຜະລິດໄມ້ໃຫ້ໝາກສະອາດເປັນສິນຄ້າ.

ສໍາລັບ ໂຄງການພັດທະນາກະສິກໍາ ແລະ ສິ່ງແວດລ້ອມແບບຍືນຍົງ ໄດ້ເຂົ້າມາຊ່ວຍເຫຼືອ ກໍເພື່ອໃຫ້ຊາວກະສິກອນໄດ້ຮຽນຮູ້, ປັບຕົວເຂົ້າໃນການປ່ຽນແປງດິນຟ້າອາກາດໃນປັດຈຸບັນ ໂດຍສະເພາະບັນຫາສັດຕູພືດ ແລະ ການຕະຫຼາດ ເພື່ອໃຫ້ກະສິກອນດ້ວຍກັນໄດ້ພົບປະຮຽນຮູ້ຊຶ່ງກັນ ແລະ ກັນເຊັ່ນ: ການປູກ, ການບົວລະບັດຮັກສາຜົນຜະລິດ, ການລ້ຽງ ແລະ ການຕະຫຼາດ ທີ່ໄດ້ປະຕິບັດຕົວຈິງໃນຊີວິດປະຈໍາວັນ ເພື່ອເຂົ້າເຖິງຂໍ້ມູນ ແລະ ໄດ້ເຮັດວຽກຮ່ວມກັນຫຼາຍຂຶ້ນ.

ພ້ອມນີ້, ບັນດາກຸ່ມການຜະລິດຂອງແຕ່ລະເມືອງ ກໍໄດ້ແລກປ່ຽນຖອດຖອນບົດຮຽນໃນການຈັດຕັ້ງປະຕິບັດໄລຍະຜ່ານມາ ເປັນຕົ້ນ ຄວາມສາມັກຄີພາຍໃນກຸ່ມ, ການຕະຫຼາດ ແລະ ນະໂຍບາຍຕ່າງໆເຂົ້າເຖິງແຫຼ່ງທຶນ,ການປະສານງານລະຫວ່າງຜູ້ຊື້-ຜູ້ຂາຍ, ການຄວບຄຸມຄຸນນະພາບການຜະລິດ ຊຶ່ງພາຍຫຼັງສໍາເລັດກອງປະຊຸມ ກໍໄດ້ໄປທັດສະນະສວນໝາກເງາະ ຂອງສະມາຊິກກຸ່ມປູກໝາກເງາະເປັນສິນຄ້າ ຢູ່ບ້ານຫີນເຫີບເໜືອ ຕື່ມອີກ.

(ຂ່າວ-ພາບ: ວີລະວັນ)