ກະຊວງການເງິນຮ່ວມກັບພະແນກການເງິນແຂວງອັດຕະປື ໄດ້ຈັດກອງປະຊຸມເຜີຍແຜ່, ແນະນຳຊຸກຍູ້ດ້ານວິຊາການວຽກງານການຄຸ້ມຄອງຕິດຕາມຫົວໜ່ວຍທຸລະກິດ ແລະ ການແຈ້ງ-ການມອບລາຍຮັບສ່ວຍສາອາກອນ, ລາຍຮັບຈາກຊັບສິນແຫ່ງລັດ ແລະ ການສ້າງແຜນງົບປະມານແຫ່ງລັດປີ 2025 ຂຶ້ນໃນວັນທີ 24 ມິຖຸນາຜ່ານມາ ທີ່ພະແນກການເງິນແຂວງ ໂດຍມີທ່ານນາງ ໄຍຄຳ ສີຊານົນ ຮອງຫົວໜ້າພະແນກການເງິນ ແຂວງ, ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນກະຊວງການເງິນ ພ້ອມດ້ວຍຂະແໜງການ ກ່ຽວຂ້ອງເຂົ້າຮ່ວມ.
ທ່ານ ບຸນປະເສີດ ສີກຸນລະບຸດ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອຮັບປະກັນໃຫ້ບັນດາມາດຕະການ ແລະ ບາງໜ້າວຽກຈຸດສຸມທີ່ກະຊວງການເງິນໄດ້ກຳນົດໄວ້ ສາມາດຈັດຕັ້ງປະຕິບັດໃນປີ 2024 ໃຫ້ໄດ້ຮັບຜົນສໍາເລັດເປັນຢ່າງດີ ແລະ ກະກຽມໃສ່ປີ 2025 ໃຫ້ມີຖ່ວງທ່າຕັ້ງໜ້າ ຊຶ່ງຕົວເລກໃນກອບເພດານແຜນການເກັບລາຍຮັບພາຍໃນປະຈໍາປີ 2025 ແມ່ນສູງຫຼາຍ ແລະ ທ້າທາຍສົມຄວນ.
ກອງປະຊຸມບັນດາຜູ້ເຂົ້າຮ່ວມໄດ້ຮັບຟັງເອກະສານກ່ຽວກັບຄໍາແນະນຳວຽກນະໂຍບາຍຂອງກະຊວງການເງິນດ້ານມະຫາພາກ, ການສ້າງແຜນລາຍຮັບປະຈໍາປີ 2025, ວຽກຊັບສິນແຫ່ງລັດ, ລະບຽບການຄຸ້ມຄອງຕິດ ຕາມລາຍຮັບຊັບສິນແຫ່ງລັດ ແລະ ນິຕິກຳອື່ນໆ ຊຶ່ງປະກອບມີ 7 ໜວດ, 32 ມາດຕາ. ພ້ອມທັງປຶກສາຫາລື ເພື່ອຮັບປະກັນໃຫ້ບັນດາໜ້າວຽກຕ່າງໆ ກໍຄືການສ້າງແຜນຈັດເກັບລາຍຮັບປີ 2025 ໃຫ້ໄປຕາມແຜນທີ່ກຳນົດໄວ້. ຂ່າວ: ວັດທະນາ