ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 29 ຕຸລາ ຜ່ານມາຢູ່ນະຄອນຫຼວງຮ່າໂນ້ຍກະຊວງການຕ່າງປະເທດໄດ້ສົມທົບກັບອົງການອົບພະຍົບສາກົນ (IOM) ຈັດຕັ້ງກອງປະຊຸມປະກາດບົດລາຍງານກ່ຽວກັບຊາວອົບພະຍົບຫວຽດນາມ 2023.

ຂ່າວລະບຸວ່າ: ກ່າວຄຳເຫັນໃນກອງປະຊຸມ, ທ່ານ ຫງວຽນມິງຫວູ ຜູ້ຊ່ວຍລັດຖະມົນຕີ ກະຊວງການຕ່າງປະເທດຫວຽດນາມ ໃຫ້ຮູ້ວ່າ: ໃນສະພາບການເຊື່ອມໂຍງ ແລະ ໂລກາພິວັດປັດຈຸບັນ, ການອົບພະຍົບນັບມື້ນັບເພີ່ມຂຶ້ນຢ່າງວ່ອງໄວ, ສົ່ງຜົນສະທ້ອນເຖິງທຸກປະເທດ. ສະນັ້ນ, ການຕີລາຄາການເຄື່ອນໄຫວອົບພະຍົບຂອງພົນລະເມືອງຫວຽດນາມໄປຕ່າງປະເທດ ແລະ ຂະບວນການອົບພະຍົບຂອງຊາວຕ່າງປະເທດເຂົ້າຫວຽດນາມແມ່ນຈຳເປັນທີ່ສຸດ. ນີ້ກໍແມ່ນເປົ້າໝາຍຂອງບົດລາຍງານກ່ຽວກັບການອົບພະຍົບ ຂອງຫວຽດນາມ ໃນປີ 2023 ຖືກປະກາດຢ່າງເປັນທາງການ.

ທ່ານ ຫງວຽນມິງຫວູ ຢືນຢັນວ່າ: ຫວຽດນາມ ປາຖະໜາຢາກຊຸກຍູ້ການຮ່ວມມືກັບບັນດາປະເທດ ກໍຄືອົງການສະຫະປະຊາຊາດ ແລະ ອົງການຈັດຕັ້ງສາກົນ ແນໃສ່ເພີ່ມທະວີການແລກປ່ຽນບົດຮຽນໃນການຄຸ້ມຄອງການອົບພະຍົບ, ກໍ່ສ້າງ ແລະ ຄຸ້ມຄອງລະບົບຂໍ້ມູນກ່ຽວກັບການອົບພະຍົບ, ຍູ້ແຮງບັນດາມາດຕະການຊຸກຍູ້ການອົບພະຍົບ ຢ່າງປອດໄພ ຖືກຕ້ອງຕາມກົດໝາຍ ແລະ ຫຼຸດຜ່ອນຄວາມສ່ຽງໃຫ້ແກ່ຜູ້ອົບພະຍົບໃນຂະບວນການອົບພະຍົບ.