ປະທານ ທນຊ ຢ້ຽມຢາມ ແລະ ຊຸກຍູ້ການພັດທະນາ ກຸ່ມບ້ານຈຽງຕູບ.

ໃນວັນທີ 15 ກຸມພາ ຜ່ານມາ, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ພ້ອມດ້ວຍທ່ານ ພົນໂທ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ ໄດ້ລົງຢ້ຽມຢາມ ແລະ ຊຸກຍູ້ການພັດທະນາກຸ່ມບ້ານຈຽງຕູບ ເມືອງເຊໂປນ ແຂວງສະຫວັນນະເຂດ ໂດຍມີທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນະເຂດ ພ້ອມດ້ວຍຄະນະຮ່ວມຕິດຕາມ.
ການລົງຢ້ຽມຢາມຄັ້ງນີ້, ທ່ານ ປະທານ ສນຊ ແລະ ຄະນະ ໄດ້ຕິດຕາມເບິ່ງການພັດທະນາພື້ນຖານໂຄງລ່າງ, ການກໍ່ສ້າງສ້ອມແປງ ແລະ ຍົກລະດັບເສັ້ນທາງ ແຕ່ທາງແຍກເສັ້ນທາງ 28ເອ ຈຸດບ້ານໂພນໄຮ ຫາ ບ້ານຈຽງຕູບ ຊາຍແດນລາວ-ຫວຽດນາມ ຍາວ 60 ກ່ວາກິໂລແມັດ, ການບຸກເບີກເນື້ອທີ່ນາ ແລະ ເນື້ອທີ່ການຜະລິດ, ການບຸກເບີກຈັດສັນບັນດາຫ້ອງການຕ່າງໆ ຂອງກຸ່ມບ້ານຈຽງຕູບ ເມືອງເຊໂປນ, ການຈັດສັນບັນດາໂຄງການທີ່ນອນໃນກຸ່ມບ້ານຈຽງຕູບ ເມືອງເຊໂປນ ແມ່ນການສຸມທຶນຮອນຂອງລັດຖະບານ ເຂົ້າໃນການພັດທະນາພື້ນຖານໂຄງລ່າງໃຫ້ປະຊາຊົນຢູ່ລຽບຊາຍແດນ ລາວ-ຫວຽດນາມ ມີຄວາມສະດວກສະບາຍ, ໂດຍສະເພາະການສຸມທຶນຮອນຂອງແຂວງສະຫວັນະເຂດ ແລະ ກະຊວງປ້ອງກັນປະເທດ ເພື່ອໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາທີ່ດີຂຶ້ນ, ໂຄງການລົງທຶນທີ່ສຸມໃສ່ຢູ່ເຂດກຸ່ມບ້ານຈຽງຕູບທີ່ຈະຈັດຕັ້ງປະຕິບັດໃນປີ 2024 ມີທັງໝົດ 11 ໂຄງການ, ມູນຄ່າ 50 ຕື້ 580 ລ້ານກ່ວາກີບ. ໂດຍນຳໃຊ້ 5 ບ້ວງທຶນເຂົ້າໃນການພັດທະນາໂຄງການ.
ຍ້ອນຄວາມເປັນຫ່ວງເປັນໃຍ ຕໍ່ການພັດທະນາ ເພື່ອໃຫ້ປະຊາຊົນໄດ້ຮັບຮູ້ເຊື່ອມຊຶມ ແລະ ເຂົ້າໃຈຕໍ່ການພັດທະນາ. ດັ່ງນັ້ນ, ອຳນາດການປົກຄອງກຸ່ມບ້ານ ຕ້ອງເຕົ້າໂຮມປະຊາຊົນພາຍໃນບ້ານຂອງຕົນ, ເຮັດໃຫ້ປະຊາຊົນເຂົ້າໃຈພັກ-ລັດຖະບານມີຄວາມເປັນຫ່ວງເປັນໃຍຢາກໃຫ້ມີການພັດທະນາຢ່າງທົ່ວເຖິງທຸກທ້ອງຖິ່ນຮາກຖານ, ພ້ອມນັ້ນກໍລົງເລິກເກັບກຳສຳມະໂນຄົວຕົວເລກໃຫ້ລະອຽດ, ເປົ້າໝາຍກຳລັງແຮງເຄື່ອນໄຫວກຳລັງແຮງປ້ອງກັນຊາດ-ປ້ອງກັນຄວາມສະຫງົບ. ນຳພາແນວຄິດປະຊາຊົນ, ມີຄວາມສາມັກຄີສ້າງສາພັດທະນາ, ວາງແຜນພັດທະນາໃຫ້ລະອຽດ.
   ໃນການມາຢ້ຽມຢາມໂຄງການພັດທະນາກຸ່ມບ້ານຈຽງຕູບຄັ້ງນີ້, ທ່ານ ປະທານ ສນຊ ໄດ້ມອບເຂົ້າສານ 1 ໂຕນເຄິ່ງ, ອຸປະກອນເຮັດແທ່ງນ້ຳລິນ, ເຄື່ອງກິລາ ໃຫ້ກຸ່ມບ້ານຈຽງຕູບ.
    (ຂ່າວ: ສະຫວັນ)