ເພີ່ມທະວີ ວຽກງານຄວາມປອດໄພທາງຫຼວງ ຜ່ານການໂຄສະນາ ແລະ ບັງຄັບໃຊ້ກົດໝາຍ

ຈຸດປະສົງ ເພື່ອເຮັດໃຫ້ຜູ້ຂັບຂີ່ມີຄວາມຮູ້ ຄວາມເຂົ້າໃຈ ກ່ຽວກັບກົດຈະລາຈອນທາງບົກ, ລະບຽບການຂັບຂີ່ທີ່ປອດໄພ ແລະ ມາດຕະການ ໃນການໃຊ້ລົດ-ໃຊ້ຖະໜົນຢ່າງຖືກຕ້ອງ, ເພື່ອແນໃສ່ຫຼຸດຜ່ອນການເກີດອຸບັດເຫດ, ນໍາສະເໜີຂໍ້ມູນກ່ຽວກັບສະພາບລວມຂອງສາເຫດຕົ້ນຕໍທີ່ພາໃຫ້ເກີດອຸບັດເຫດຕາມທ້ອງຖະໜົນ, ຄຸນສົມບັດ ແລະ ມາລະຍາດທີ່ດີຂອງນັກຂັບຂີ່, ບັນດາປ້າຍຈະລາຈອນ ແລະ ເຄື່ອງໝາຍສັນຍານການຈະລາຈອນ ຕາມເສັ້ນທາງ, ເຜີຍແຜ່ ດໍາລັດ ວ່າດ້ວຍກົດຈະລາຈອນທາງບົກ. ການໂຄສະນາປູກຈິດສໍານຶກ ເປັນການໃຫ້ຄວາມຮູ້ ຄວາມຕື່ນຕົວ ໃຫ້ແກ່ສັງຄົມ ກ່ຽວກັບຄວາມສໍາຄັນຂອງການປະຕິບັດຕາມກົດຈະລາຈອນຢ່າງເຂັ້ມງວດ. ພ້ອມນີ້ ທີມງານຍັງໄດ້ຈັດກິດຈະກໍາ ຖາມ-ຕອບ ກ່ຽວກັບຄວາມຮູ້ດ້ານການຂັບຂີ່ປອດໄພຕາມທ້ອງຖະໜົນຫຼວງ ມອບຂອງຂວັນ ແລະ ລາງວັນ ໃຫ້ແກ່ ນັກຮຽນທີ່ຮ່ວມກິດຈະກຳ ຕື່ມອີກ.

ການປູກຈິດສໍານຶກ ຕ້ອງເຮັດໄປຄຽງຄູ່ກັບການເພີ່ມທະວີການບັງຄັບໃຊ້ກົດໝາຍຢ່າງເດັດຂາດ ເມື່ອປະຊາຊົນມີຄວາມເຂົ້າໃຈ ແລະ ເຈົ້າໜ້າທີ່ມີຄວາມເຂັ້ມງວດໃນການບັງຄັບໃຊ້ກົດໝາຍ, ຄວາມປອດໄພທາງຫຼວງ ຈຶ່ງຈະບັນລຸຜົນສໍາເລັດຢ່າງຍືນຍົງ.

(ຂ່າວ: ແສງອາທິດ)