 |
ທ່ານ ສົມມິດ ມະນີເລີດ ຕາງໜ້າອົງການແຄ ປະຈຳ ສປປ ລາວ ກ່າວວ່າ: ໂຄງການສຸເປີວີຄອບຟີ ແມ່ນເປັນໂຄງການໜຶ່ງທີ່ຂຶ້ນກັບອົງການແຄຣ໌ນາໆຊາດ ປະຈຳ ສປປ ລາວ ໂດຍໄດ້ຮັບທຶນການສະໜັບສະໜູນຈາກສະຫະພາບເອີຣົບ ມີໄລຍະເວລາການຈັດຕັ້ງປະຕິບັດ 4 ປີ ເລີ່ມແຕ່ປີ 2022 ຈົນຮອດວັນທີ 28 ກຸມພາ 2026 ແລະ ໄດ້ມີການຂະຫຍາຍເວລາອອກໄປ ຮອດເດືອນ ມິຖຸນາ 2026 ເຊິ່ງນັບແຕ່ໂຄງການ ໄດ້ເຂົ້າມາຈັດຕັ້ງປະຕິບັດຢູ່ເມືອງດາກຈຶງ ແມ່ນເຫັນໄດ້ຢ່າງຈະແຈ້ງເຖິງການປ່ຽນແປງ ລະຫວ່າງ ກ່ອນ ແລະ ຫຼັງ ທີ່ມີໂຄງການເຂົ້າມາຊ່ວຍເຫຼືອ; ໂດຍກ່ອນນັ້ນ, ຊາວສວນກາເຟດາກຈຶງ ຈະຜະລິດແບບກະແຈກກະຈາຍ ອີງໃສ່ທຳມະຊາດເປັນຫຼັກ ຄຸນນະພາບຂອງກາເຟບໍ່ໄດ້ມາດຕະຖານ, ຖືກກົດລາຄາຈາກພໍ່ຄ້າຄົນກາງ ແລະ ບົດບາດຂອງແມ່ຍິງໃນຄອບຄົວ, ລວມທັງໃນຂະບວນການຜະລິດແມ່ນບໍ່ໄດ້ຮັບການເອົາໃຈໃສ່ ແຕ່ຫຼັງມີໂຄງການ ຈຶ່ງໄດ້ປ່ຽນໂສມໜ້າໃໝ່ໃນການຜະລິດ ຈາກການສະໜອງເຄື່ອງຈັກ, ອຸປະກອນການແປຮູບທີ່ທັນສະໄຫມ ເຮັດໃຫ້ຊາວສວນກາເຟ ສາມາດຜະລິດກາເຟທີ່ມີຄຸນນະພາບສູງ ຕອບສະໜອງຄວາມຕ້ອງການຂອງຕະຫຼາດທັງພາຍໃນ ແລະ ຕ່າງປະເທດ.
ນອກນັ້ນ, ທາງໂຄງການ ຍັງໄດ້ສະໜອງເບ້ຍໄມ້ໃຫ້ໝາກ ຈຳນວນໜຶ່ງ ເພື່ອປູກຊອນ ໃຫ້ເປັນຮົ່ມໃນສວນກາເຟ ເປັນການປັບປຸງລະບົບນິເວດ ແລະ ສ້າງລາຍຮັບເສີມ ແລະ ສິ່ງທີ່ພາກພູມໃຈທີ່ສຸດ ກໍແມ່ນ “ບົດບາດຍິງ-ຊາຍ” ໄດ້ຮັບການເຊີດຊູ ເຊິ່ງແມ່ຍິງ ໄດ້ຮັບການຝຶກອົບຮົມ ຍົກລະດັບເປັນຜູ້ນຳ ທີ່ມີຄວາມຮູ້ນໍາພາຄຸ້ມຄອງການເງິນ ແລະ ມີຄວາມເຂັ້ມແຂງດ້ານເສດຖະກິດ. ພ້ອມນີ້ ໂຄງການ ຍັງໄດ້ສ້າງຕັ້ງ "ສະຫະກອນກາເຟພູດອຍດາກຈຶງ” ເພື່ອເຕົ້າໂຮມຄວາມສາມັກຄີ ແລະ ເປັນຕົວແທນໃນການເຈລະຈາການຄ້າຢ່າງເປັນລະບົບ, ໄດ້ສົ່ງເສີມການຜະລິດກາເຟທີ່ມີມູນຄ່າເພີ່ມຈາກການຂາຍກາເຟໝາກແດງ ປ່ຽນເປັນກາເຟຂາວ ແລະ ກາເຟໝາກຂຽວ (ໝາກສ້ອມ) ທີ່ມີຄຸນນະພາບສູງ ທັງຊ່ວຍເພີ່ມທັກສະທາງດ້ານເຕັກນິກ ແລະ ມູນຄ່າຂອງຜະລິດຕະພັນ ໂດຍລາຍໄດ້ຈາກການຂາຍກາເຟ ສະເລ່ຍເພີ່ມຂຶ້ນ 40% ຊ່ວຍໃຫ້ຄອບຄົວມີທີ່ຢູ່ອາໃສ, ມີໂພສະນາການ ແລະ ມີຊີວິດທີ່ດີຂຶ້ນ; ສ່ວນແມ່ຍິງ ມີບົດບາດນຳໜ້າເກືອບເຄິ່ງຫນຶ່ງຂອງຕຳແໜ່ງທັງໝົດ ໃນການດຳເນີນງານຂອງໂຄງການສຸເປີວີຄອບຟີ ຢູ່ເມືອງດາກຈຶງ; ທັງນີ້ ສະຫະກອນກາເຟພູດອຍດາກຈຶງ ມີກຸ່ມຜະລິດ 17 ກຸ່ມ ເຂົ້າເຖິງກຸ່ມເປົ້າໝາຍໄດ້ທັງໝົດ 15 ບ້ານ, ມີຜູ້ຜະລິດ 702 ຄົນ ແລະ ເຂົ້າເຖິງປະຊາກອນ 4,463 ຄົນ.
ທ່ານ ບຸນສົ່ງ ລໍາມະຍົດ ໄດ້ກ່າວສະແດງຄວາມຂອບອົກຂອບໃຈຕໍ່ໂຄງການ ທີ່ສ້າງຄວາມເຂັ້ມແຂງໃຫ້ແກ່ຊາວສວນກາເຟເມືອງດາກຈຶງ; ພ້ອມນີ້ ກໍຂໍໃຫ້ຊາວສວນກາເຟ ກໍຄືສະຫະກອນກາເຟພູດອຍດາກຈຶງ ຈົ່ງສືບຕໍ່ປະຕິບັດຈຸດປະສົງຂອງໂຄງການ ໃຫ້ເກີດດອກອອກຜົນດີຂຶ້ນເລື້ອຍໆ ເພື່ອສ້າງເສດຖະກິດຂອງຄອບຄົວໃຫ້ມີລາຍຮັບສູງຂຶ້ນ.
ຂ່າວ: ອັດສະວິນ
ຄໍາເຫັນ