ສາລາພັກເຢັນນໍ້າບຸ້ຍ ບ້ານໜອງແປນ ເປັນແຫຼ່ງທ່ອງທ່ຽວທາງທໍາມະຊາດທີ່ໜ້າໄປສໍາພັດ

ໃນວັນທີ 4 ພະຈິກ 2025ນີ້, ຫ້ອງການວັດທະນະທໍາ ແລະ ການທ່ອງທ່ຽວເມືອງອຸທຸມພອນ ໄດ້ສືບຕໍ່ຄວາມພະຍາຍາມໃນການປັບປຸງ ແລະ ພັດທະນາແຫຼ່ງທ່ອງທ່ຽວແບບວົງແຫວນ ຫຼື ແບບຄົບວົງຈອນທີ່ຕັ້ງຢູ່ໃນເຂດພື້ນທີ່ໄກ້ກັນ ຂອງເມືອງເພື່ອເສີມສ້າງທ່າແຮງດຶງດູດນັກທ່ອງທ່ຽວ ແລະ ສົ່ງເສີມເສດຖະກິດທ້ອງຖິ່ນ.

ແຜນການພັດທະນາຄັ້ງນີ້, ກວມເອົາໄລຍະທາງປະມານ 25 ກິໂລແມັດເລີ່ມຕົ້ນຈາກຈຸດຕົວເມືອງອຸທຸມພອນ 3 ຫຼ່ຽມປີ້ງໄກ່ລາດເຊໂນຈົນເຖິງຈຸດລົງສໍາຫລວດ ສາລາພັກເຢັນນໍ້າບຸ້ຍ. ເສັ້ນທາງທ່ອງທ່ຽວແບບວົງແຫວນນີ້ ມີຈຸດປະສົງເພື່ອເຊື່ອມໂຍງຈຸດທ່ອງທ່ຽວຕ່າງໆເຂົ້າໃນລະບົບດຽວກັນເຮັດໃຫ້ນັກທ່ອງທ່ຽວສາມາດໄດ້ປະສົບການທີ່ສົມບູນ ແລະ ຄົບຖ້ວນ. ການສໍາຫລວດຄັ້ງນີ້, ນໍາພາໂດຍທ່ານ ຄໍາຜັ້ນ ສຸນີນຸວົງສາ ຫົວໜ້າຫ້ອງການວັດທະນະທໍາ ແລະ ການທ່ອງທ່ຽວເມືອງ. ພ້ອມທີມງານນັກວິຊາການຈາກຫ້ອງການທີ່ກ່ຽວຂ້ອງອ້ອມຂ້າງເມືອງເຂົ້າຮ່ວມສໍາຫລວດໃນຄັັ້ງນີ.

ທ່ານ ຄໍາຜັ້ນ ສຸນີນຸວົງສາ ເວົ້າວ່າ: ຈຸດທີ່ລົງສໍາຫຼວດກວດກາຄັ້ງນີ້, ແມ່ນໄດ້ລົງສໍາຫຼວດສະຖານທີ່ບ່ອນຈະໄດ້ບຸກເບີກບ່ອນຈອດລົດໃຫຍ່, ອະນາໄມຕາມທາງເຂົ້າສະຖານທີ່ສາລາພັກເຢັນນໍ້າບຸ້ຍ ແລະ ບໍລິເວນພາຍໃນເດິ່ນ, ລົງກວດກາວັດແທກຄືນຂອບເຂດເນື້ອທີ່ດິນ ເພື່ອຈະອອກໃບຕາດິນເປັນດິນວັດທະນະທໍາ,ໃນເນື້ອທີ່ 10 ກວ່າເຮັກຕາ, ອີກຢ່າງກໍເພື່ອກະກຽມໃນການຈັດງານເປີດແຫຼ່ງທ່ອງທ່ຽວ ສາລາພັກເຢັນນໍ້າບຸ້ຍ ທີ່ຈະຈັດຂຶ້ນໃນມໍ່ໆນີ້ ,ບ່ອນດັ່ງກ່າວເປັນຈຸດທ່ອງທ່ຽວທີ່ມີຄຸນຄ່າທາງດ້ານວັດທະນະທໍາ, ທໍາມະຊາດແລະ ມີຄວາມຕິດພັນກັບປະຫວັດສາດທ້ອງຖິ່ນຢ່າງເລິກຊຶ່ງ. ພື້ນທີ່ເຫຼົ່ານີ້ມີທັດສະນີຍະພາບທີ່ສວຍສົດງົດງາມ ແລະ ມີຄວາມສໍາຄັນທາງປະຫວັດສາດທີ່ສາມາດດຶງດູດນັກທ່ອງທ່ຽວທັງໃນ ແລະ ຕ່າງປະເທດໄດ້ເປັນຢ່າງດີ. ຊຶ່ງສິ່ງທີ່ມະຫັດສະຈັນ ແລະ ຄົງໄວ້ຄວາມໂດດເດັ່ນທາງທໍາມະຊາດ ແມ່ນນໍ້າບຸ້ຍ ຫຼື ນໍ້າອອກບໍ່.

(ແຫຼ່ງຂ່າວ: ແຂວງສະຫວັນນະເຂດ)