 |
ໃນພິທີ, ທ່ານ ພົນໂທ ວົງຄໍາ ພົມມະກອນ ໄດ້ຫວນຄືນປະຫວັດມູນເຊື້ອ ຂອງປະທານ ສຸພານຸວົງ ເພິ່ນແມ່ນນັກປັນຍາຊົນຜູ້ຍິ່ງໃຫຍ່ ເປັນຜູ້ນໍາທີ່ດີເດັ່ນ ແລະ ເປັນວິລະບູລຸດຂອງຊາດລາວ ຕະຫຼອດຊີວິດໄດ້ອຸທິດ ຄວາມຮູ້ຄວາມສາມາດ ຫົວຄິດປະດິດສ້າງຂອງຕົນເພື່ອໄຊຊະນະຂອງພາລະກິດປະຕິວັດ, ເພິ່ນເປັນນັກຮົບປະຕິວັດຜູ້ຮັກຊາດຮຸ່ນທໍາອິດ ທີ່ຍາມໃດກໍຕໍ່ສູ້ເພື່ອອຸດົມການປະຕິວັດອັນສູງສົ່ງ ເພື່ອຄວາມເປັນເອກະລາດ, ຄວາມວັດທະນາຖາວອນຂອງປະເທດຊາດ, ທຸກໄລຍະຂອງການປະຕິວັດ ປະທານ ສຸພານຸວົງ ເປັນຜູ້ໜຶ່ງໃນບັນດາການນໍາສູງສຸດ ໄດ້ສຸມສະຕິປັນຍາ ແລະ ເຫື່ອແຮງ ຂອງຕົນເພື່ອຊີ້ນໍາ-ນໍາພາ ຂະບວນການປະຕິວັດລາວ, ເປັນບຸກຄົນສໍາຄັນໃນການເຕົ້າໂຮມຄວາມສາມັກຄີທົ່ວປວງຊົນທັງຊາດ ຕີຕ້ານທຸກກົນອຸບາຍ ຂອງສັດຕູຍາດເອົາໄຊຊະນະອັນຍິ່ງໃຫຍ່ມາໃຫ້ແກ່ປະເທດ, ແມ່ນການນໍາຜູ້ໜຶ່ງທີ່ມີບົດບາດພົ້ນເດັ່ນໃນພາລະກິດປະຕິວັດປົດປ່ອຍຊາດ ແລະ ສ້າງສາພັດທະນາປະເທດຊາດ, ເປັນຜູ້ນໍາທີ່ມີຄວາມຕື່ນຕົວເສຍສະຫຼະຜົນປະໂຫຍດສ່ວນຕົວ ເພື່ອຜົນປະໂຫຍດລວມ ຂອງ ປະເທດຊາດ ແລະ ປະຊາຊົນບັນດາຊົນເຜົ່າ, ທັງເປັນແກ່ນສານ ແລະ ໃຈກາງເຕົ້າໂຮມຄວາມສາມັກຄີປະຊາຊົນບັນດາເຜົ່າ, ບັນດາຊັ້ນຄົນ, ສາສະໜາ ແລະ ເພດໄວ, ເຂົ້າໃນແນວໂຮມປົດປ່ອຍຊາດ ແລະ ສ້າງສາພັດທະນາປະເທດຊາດ, ທັງໄດ້ອຸທິດສະຕິປັນຍາ, ຫົວຄິດປະດິດສ້າງ ແລະ ກຳລັງວັງຊາ ຂອງຕົນ ເພື່ອພາລະກິດປະຕິວັດ ແຕ່ຕົ້ນຕະຫຼອດປາຍ, ປະທານ ສຸພານຸວົງ ເປັນແວ່ນແຍງອັນໃສແຈ້ງ ແຫ່ງມານະຈິດ ປະຕິວັດ ຢ່າງສຸດກົກສຸດປາຍ ບໍ່ວ່າແຕ່ສະໄໝສົງຄາມ ກໍຄືຍາມສັນຕິພາບ, ຊື່ສຽງຜົນງານ ແລະ ຄຸນງາມຄວາມດີຂອງເພິ່ນ ໄດ້ຈາລຶກໄວ້ໃນປະຫວັດສາດຂອງຊາດລາວ ແລະ ຍືນຍົງຢູ່ໃນພາລະກິດປະຕິວັດຂອງຊາດລາວຕະຫຼອດໄປ.
ທ່ານ ພົນໂທ ວົງຄໍາ ພົມມະກອນ ໄດ້ກ່າວເຖິງຄວາມໝາຍສໍາຄັນ ຂອງສາຍພົວພັນ ມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ວັນເຊັນສົນທິສັນຍາມິດຕະພາບ ລາວ-ຫວຽດນາມ ຄົບຮອບ 49 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 64 ປີ. ເພື່ອໃຫ້ບັນດາຜູ້ເຂົ້າຮ່ວມເຂົ້າໃຈ ແລະ ເພື່ອເພີ່ມພູນຄູນສ້າງສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ນັບມື້ຈະເລີນງອກງາມຍິ່ໆຂຶ້ນ.
ຂ່າວ: ຍຸພິນທອງ
ຄໍາເຫັນ