 |
ທ່ານ ນາງ ບົວຄຳ ດວງປັນຍາ ກ່າວວ່າ: ການທັດສະນະສຶກສາຄັ້ງນີ້ ຈັດຂຶ້ນພາຍໃຕ້ຫົວຂໍ້ “ການທ່ອງທ່ຽວແບບອະນຸລັກໂດຍຊຸມຊົນມີສ່ວນຮ່ວມ” ມີເປົ້າໝາຍໃຫ້ນັກຂ່າວ ໄດ້ສຶກສາຮູບແບບການພັດທະນາທີ່ສົມດຸນລະຫວ່າງເສດຖະກິດ-ສັງຄົມ ແລະ ສິ່ງແວດລ້ອມ ພ້ອມນຳບົດຮຽນທີ່ໄດ້ໄປປະຍຸກໃຊ້ໃນການຜະລິດຂ່າວ ແລະ ສື່ສານການພັດທະນາສີຂຽວ ແລະ ຮຽນຮູ້ການຄຸ້ມຄອງສິ່ງແວດລ້ອມ, ການພັດທະນາຊຸມຊົນ ແລະ ບົດບາດຂອງຊາວບ້ານໃນການຮ່ວມບໍລິຫານຊັບພະຍາກອນທ້ອງຖິ່ນ ເພື່ອນຳຂໍ້ມູນໄປສ້າງສັນຜົນງານຂ່າວ ແລະ ສື່ສານເລື່ອງການພັດທະນາສີຂຽວໄດ້ຢ່າງຖືກຕ້ອງ.
ການທັດສະນະສຶກສາຄັ້ງນີ້, ໄດ້ແບ່ງເປັນ 2 ກຸ່ມ ແລະ ໄດ້ລົງທັດສະນະສຶກສາ ໃນ 6 ຈຸດສຳຄັນເປັນຕົ້ນ: ການຢ້ຽມຢາມຮ້ານອາຫານໂພສີ ທ່າລັ່ງ ທີ່ເປັນຕົວຢ່າງການສ້າງອາຊີບໃຫ້ຊຸມຊົນ, ທັດສະນະສຶກສາຄອບຄົວຕົວແບບຜະລິດປາແຫ້ງ ທີ່ນຳປາຈາກອ່າງເກັບນ້ຳມາແປຮູບເພີ່ມມູນຄ່າ, ຢ້ຽມຢາມໂຮງຮຽນມັດທະຍົມຕອນຕົ້ນອຸດົມສຸກ ຮຽນຮູ້ກ່ຽວກັບການພັດທະນາການສຶກສາໃນເຂດຈັດສັນ
ໃໝ່, ສຶກສາຮູບແບບການບໍລິຫານຂອງສະຫະກອນສິນເຊື່ອ ແລະ ເງິນຝາກປະຢັດນາກາຍ ທີ່ຊ່ວຍສົ່ງເສີມການອອມເງິນ ແລະ ສ້າງຄວາມເຂັ້ມແຂງທາງເສດຖະກິດໃຫ້ຊຸມຊົນ. ນອກຈາກນັ້ນ ຍັງໄດ້ເຂົ້າຢ້ຽມຊົມອຸທິຍານແຫ່ງຊາດນາກາຍ - ນໍ້າເທີນ, ສູນຢ້ຽມຢາມຊົມນ້ຳເທີນ 2 ແລະ ເຮືອນຈັກຜະລິດໄຟຟ້າ ເພື່ອຮັບຟັງການນຳສະເໜີກ່ຽວກັບປະຫວັດໂຄງການ, ຂະບວນການຜະລິດໄຟຟ້າ ແລະ ແນວທາງການພັດທະນາສັງຄົມ-ສິ່ງແວດລ້ອມ ຄວບຄູ່ກັບການດຳເນີນໂຄງການ.
ການທັດສະນະໃນຄັ້ງນີ້ ໄດ້ຈັດຂຶ້ນໃນວັນທີ 7-8 ກໍລະກົດ 2026, ຊຶ່ງເປັນກິດຈະກຳໜຶ່ງຂອງແຜນການຝຶກອົບຮົມສື່ມວນຊົນ ໄລຍະ II ຂອງໂຄງການ GAMCIL ໂດຍມີຈຸດປະສົງເສີມສ້າງຄວາມຮູ້ ແລະ ປະສົບການໃຫ້ນັກຂ່າວ ເພື່ອຖ່າຍທອດຂໍ້ມູນກ່ຽວກັບການອະນຸລັກສິ່ງແວດລ້ອມ, ການພັດທະນາຊຸມຊົນ ແລະ ການທ່ອງທ່ຽວຢ່າງຍືນຍົງ ໃຫ້ເຂົ້າເຖິງປະຊາຊົນ ຢ່າງກວ້າງຂວາງ.
ຂ່າວ: ສ.ພະຈັນ ແລະ ພາບ: ວັດທະນາ (ບໍລິສັດໄຟຟ້າ ນ້ຳເທີນ 2)
ຄໍາເຫັນ