ກອງປະຊຸມລັດຖະມົນຕີຕ່າງປະເທດອາຊຽນແບບວົງແຄບ ແມ່ນກອງປະຊຸມຄັ້ງທໍາອິດ ຈັດຂຶ້ນພາຍໃຕ້ການເປັນປະທານອາຊຽນຂອງ ມາເລເຊຍ ປີ 2025 ພາຍໃຕ້ຄໍາຂວັນ “ການມີສ່ວນຮ່ວມຢ່າງທົ່ວເຖິງ ແລະ ຍືນຍົງ (Inclusivity and Sustainability)”.
ໃນກອງປະຊຸມ, ມາເລເຊຍໄດ້ແຈ້ງ ກ່ຽວກັບ ບຸລິມະສິດ ແລະ ພາຍໃຕ້ການເປັນປະທານອາຊຽນຂອງ ມາເລເຊຍ ໃນປີ 2025 ຊຶ່ງເນັ້ນໃສ່ການພັດທະນາແບບຍືນຍົງ ໂດຍພ້ອມກັນກ້າວໄປ ແລະ ໜ້າວຽກອື່ນໆ ທີ່ສືບຕໍ່ການເປັນປະທານອາຊຽນຂອງ ສປປ ລາວ ໃນປີຜ່ານມາ. ພາຍໃຕ້ປະຊາຄົມການເມືອງ-ຄວາມໝັ້ນຄົງ, ອາຊຽນຈະເນັ້ນໃສ່ ການສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງ ໃນພາກພື້ນ; ສົ່ງເສີມການສ້າງປະຊາຄົມອາຊຽນ; ສົ່ງເສີມອາຊຽນ ເປັນກອງກໍາລັງທີ່ມີປະສິດທິພາບ ໃນການສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນຂົງເຂດອິນໂດ-ປາຊີຟິກ ແລະ ນອກພາກພື້ນ; ສົ່ງເສີມຄວາມອາດສາມາດທາງດ້ານສະຖາບັນ ແລະ ຄວາມມີປະສິດທິພາບຂອງອາຊຽນ ແລະ ເພີ່ມທະວີຄວາມພະຍາຍາມໃນການສ້າງປະຊາຄົມອາຊຽນ ທີ່ຖືເອົາປະຊາຊົນເປັນແກນກາງຢ່າງແທ້ຈິງ. ສໍາລັບປະຊາຄົມເສດຖະກິດ, ອາຊຽນ ຈະເນັ້ນໃສ່ ການສົ່ງເສີມການຄ້າ ແລະ ການລົງທຶນ; ກຳນົດທິດທາງ ທີ່ມີສ່ວນຮ່ວມຢ່າງທົ່ວເຖິງ ແລະ ຍືນຍົງ; ສົ່ງເສີມການເຊື່ອມໂຍງ ແລະ ເຊື່ອມຈອດດ້ານເສດຖະກິດ; ແລະ ສ້າງຄວາມເຂັ້ມແຂງດ້ານ ດີຈີຕອນຂອງອາຊຽນ. ສໍາລັບປະຊາຄົມວັດທະນະທຳ-ສັງຄົມ, ອາຊຽນ ຈະເນັ້ນໃສ່ ສ້າງຄຸນຄ່າດ້ານວັດທະນະທຳ ແລະ ມໍລະດົກ; ສົ່ງເສີມວຽກງານປັນຍາປະດິດ, ການຫັນເປັນດີຈິີຕອນ ແລະ ສົ່ງເສີມໜ້າວຽກທີ່ກ່ຽວກັບການຟື້ນຟູສະພາບດິນຟ້າອາກາດ ແລະ ໂລກ; ຂໍ້ລິເລີ່ມດ້ານສາທາລະນາສຸກ ເພື່ອຄວາມສົມບູນພູນສຸກຂອງອາຊຽນ; ສົ່ງເສີມທ່າແຮງຂອງ ຊາວໜຸ່ມ ແລະ ກິລາ ເພື່ອຮັດແໜ້ນການພັດທະນາ, ຄວາມສາມັກຄີ ແລະ ຄຸນນະພາບ; ແລະ ສົ່ງເສີມມາດຕະການດ້ານສະພາບດິນຟ້າອາກາດເພື່ອເປັນຜູ້ນໍາພາ, ເປັນຄູ່ຮ່ວມ ແລະ ເປັນເຈົ້າການ. ກອງປະຊຸມໄດ້ເຫັນດີຕໍ່ບັນດາບຸລິມະສິດ ສຳລັບປີ 2025 ພາຍໃຕ້ການເປັນປະທານອາຊຽນຂອງມາເລເຊຍ.
ກອງປະຊຸມ ຍັງໄດ້ຮັບຊາບຄວາມຄືບໜ້າການຈັດຕັ້ງປະຕິບັດຜົນຂອງກອງປະຊຸມສຸດຍອດອາຊຽນຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈັດຂຶ້ນໃນເດືອນ ຕຸລາ 2024 ທີ່ ນະຄອນຫຼວງວຽງຈັນ, ພາຍໃຕ້ການເປັນປະທານອາຊຽນຂອງ ສປປ ລາວ ແລະ ຊຸກຍູ້ໃຫ້ສືບຕໍ່ຈັດຕັ້ງປະຕິບັດຜົນກອງປະຊຸມສຸດຍອດດັ່ງກ່າວໃຫ້ມີປະສິດທິຜົນ.
ກອງປະຊຸມ ໄດ້ເນັ້ນຢ້ຳວ່າ 2025 ເປັນປີສໍາຄັນ ເພາະເປັນປີສຸດທ້າຍຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດຂອງທັງສາມເສົາຄໍ້າປະຊາຄົມໃຫ້ສໍາເລັດຕາມເປົ້າໝາຍ ແລະ ສ້າງບັນດາແຜນຍຸດທະສາດເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ເພື່ອໃຫ້ຜູ້ນໍາອາຊຽນ ຮັບຮອງເອົາໃນກອງປະຊຸມສຸດຍອດອາຊຽນ ຄັ້ງທີ 46 ທີ່ຈະໄດ້ຈັດຂຶ້ນໃນເດືອນ ພຶດສະພາ 2025.
ນອກນີ້, ກອງປະຊຸມ ຍັງໄດ້ປຶກສາຫາລືກ່ຽວກັບການຮ່ວມມື ລະຫວ່າງອາຊຽນກັບພາຍນອກ ແລະ ໄດ້ເນັ້ນຄວາມສຳຄັນຂອງການຮັດແໜ້ນຄວາມເປັນເອກະພາບ ແລະ ຄວາມເປັນແກນກາງຂອງອາຊຽນ ໃນການພົວພັນກັບຄູ່ຄວາມຮ່ວມມືພາຍນອກ ໂດຍຜ່ານບັນດາກົນໄກທີ່ອາຊຽນເປັນຜູ້ນໍາພາ. ພ້ອມນີ້, ກອງປະຊຸມ ຍັງໄດ້ແລກປ່ຽນທັດສະນະ ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
(ຂ່າວ-ພາບ: ກຕທ)
ຄໍາເຫັນ