 |
ໃນການເຊັນບົດບັນທຶກຄວາມເຂົ້່າໃຈໃນຄັ້ງນີ້ ທັງສອງຝ່າຍເຫັນດີເປັນເອກະພາບນໍາກັນວ່າ: ພະແນກໂຍທາທິການ ແລະ ຂົນສົ່ງ ມີຄວາມມຸ້ງຫວັງໃນການພັດທະນາພື້ນຖານໂຄງລ່າງ ທີ່ເປັນພື້ນຖານອັນສໍາຄັນ ໃຫ້ແກ່ການຊຸກຍູ້ ພັດທະນາເສດຖະກິດ ແລະ ສັງຄົມ, ກໍ່ຄືການຂະຫຍາຍຕາໜ່າງຄົມມະນາຄົມ-ຂົນສົ່ງ ເຊື່ອມຕໍ່ ລະຫວ່າງ ເຂດແຄວ້ນ ກັບ ເຂດແຄວ້ນ, ຂົງເຂດກັບພາກພື້ນ ເພື່ອສົ່ງເສີມການຄ້າ, ການບໍລິການ ແລະ ການລົງທຶນພາຍໃນປະເທດ ກັບ ປະເທດໃກ້ຄຽງ ເພື່ອຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ບໍລິສັດ ມີຄວາມສົນໃຈໃນການດໍາເນີນການລົງທຶນພັດທະນາ ໂຄງການ ຟື້ນຟູ ແລະ ບູລະນະຮັກສາ ທາງຫຼວງ ແຫ່ງຊາດ ເລກ16B ເລີ່ມແຕ່ ເຂດບ້ານ ຊຽງຫຼວງ (ກມ 58+300) ຫາ ຊາຍແດນ ລາວ-ຫວຽດນາມ (ກມ 123+300), ເມືອງດາກຈຶງ ມີລວງຍາວ 65 ກມ ໃນຮູບແບບປະສົມປະສານ ລະຫວ່າງ ສັນຍາແບບມອບເໝົາ ທີ່ອີງຕາມຜົນໄດ້ຮັບຂອງວຽກ ຫຼື Output and Performance Based Road Contract (OPBRC) ແລະ ເກັບເງິນຄ່າບໍລິການຜ່ານທາງສາທາລະນະ ແລະ ເກັບເງິນຄ່າບໍລິການຜ່ານທາງສາທາລະນະ ຫຼື Public Road Toll Collection (PRTC), ໂດຍແມ່ນ ລັດຖະບານເປັນຜູ້ເກັບເງິນຄ່າຜ່ານທາງ.
ເຊິ່ງຈຸດປະສົງ ແລະເປົ້າໝາຍ: ພະແນກ ໂຍທາທິການ ແລະ ຂົນສົ່ງ ແຂວງ ເຊກອງ ອະນຸຍາດໃຫ້ ບໍລິສັດ ຜູ້ຮັບເໝົາ ດໍາເນີນການສໍາຫຼວດ ພື້ນທີ່ແລວທາງ ຕາມທາງຫຼວງແຫ່ງຊາດ16B ເລີ່ມແຕ່ ເຂດບ້ານຊຽງຫຼວງ (ກມ 58+300) ຫາ ຊາຍແດນ ລາວ-ຫວຽດນາມ (ກມ 123+300), ເມືອງດາກຈຶງ, ມີລວງຍາວ 65 ກມ, ການປະເມີນມູນຄ່າ ແລະ ຜົນປະໂຫຍດທີ່ຈະໄດ້ຮັບ, ໂດຍມີການອອກແບບເຕັກນິກວິສະວະກຳ ສໍາລັບການຟື້ນຟູ ແລະ ບູລະນະຮັກສາ ທາງຫຼວງແຫ່ງຊາດ ເລກ16B ໃຫ້ສາມາດຮັບນໍ້າໜັກໄດ້ 11 ໂຕນຕໍ່ເພົາ ຂຶ້ນໄປ ຊຶ່ງມີໄລຍະຟື້ນຟູ 3 ປີ ແລະ ບູລະນະຮັກສາ 7 ປີ.
ຈາກນັ້ນ ທັງສອງຝ່າຍກໍໄດ້ລົງນາມເຊັນສັຍາຮ່ວມກັນ ລະຫວ່າງ ອົງການປົກຄອງແຂວງເຊກອງ ຊຶ່ງຕາງໜ້າໂດຍ ທ່ານ ແກ້ວປະເສີດ ແກ້ວມະນີວົງ ຫົວໜ້າພະແນກໂຍທາທິການ ແລະຂົນສົ່ງແຂວງ ແລະ ທ່ານ ນາງ ຫົງພະຈັນ ສະໝິງວົງສາ ຮອງປະທານສະຫະບໍລິສັດ ລາວບໍລິການ ຈໍາກັດຜູ້ດຽວ ໂດຍຊ່ອງໜ້າການນໍາແຂວງ ແລະພະຍານທັງສອງຝ່າຍເປັນສັກຂີພິຍານ.ຂ່າວ:ພຸດທະສອນ
ຄໍາເຫັນ