ຂ່າວສານຫວຽດນາມລາຍງານ, ຫວ່າງບໍ່ດົນມານີ້ສື່ມວນຊົນ ເຢຍລະມັນ ລາຍງານວ່າ:ລັດຖະບານໄດ້ຫຼຸດການຄາດຄະເນແລະ ຍອມຮັບວ່າເສດຖະກິດໃຫຍ່ທີ່ສຸດຂອງເອີຣົບຈະຫຼຸດລົງເປັນປີທີ 2 ຕິດຕໍ່ກັນ, ຍ້ອນບໍ່ມີຄວາມຫວັງວ່າການບໍລິໂພກຈະຊຸກຍູ້ການຟື້ນຕົວຂອງເສດຖະກິດ.

ຂ່າວລະບຸວ່າ: ອີງຕາມຂໍ້ມູນໃນໜັງສືພິມ Sueddeutsche, ກະຊວງເສດຖະກິດ ເຢຍລະມັນ ຄາດຄະເນວ່າເສດຖະກິດແຫ່ງຊາດຈະຫຼຸດລົງ 0.2% ໃນປີ 2024, ຫຼຸດລົງຢ່າງຫຼວງຫຼາຍເມື່ອທຽບກັບການຄາດຄະເນທີ່ຜ່ານມາຂອງການເຕີບໂຕໃນລະດັບ 0.3%. ຄວາມຄາດຫວັງວ່າການຫຼຸດຜ່ອນອັດຕາເງິນເຟີ້ ແລະ ການຫຼຸດອັດຕາດອກເບ້ຍຄັ້ງທໍາອິດຂອງທະນາຄານກາງເອີຣົບ (ECB) ຈະເຮັດໃຫ້ມີການຟື້ນຕົວໃນປີນີ້ຍັງເບິ່ງຄືວ່າຫ່າງໄກຫຼາຍໃນເດືອນທີ່ຜ່ານມາ ຍ້ອນວ່າຄວາມຕ້ອງການພາຍໃນ ແລະ ຕ່າງປະເທດຍັງອ່ອນແອ.

ບັນດາສະຖາບັນເສດຖະກິດແຖວໜ້າ ຂອງ ເຢຍລະມັນ ຍັງໄດ້ປັບຫຼຸດການຄາດຄະເນການເຕີບໂຕຂອງເສດຖະກິດເມື່ອບໍ່ດົນມານີ້ ແລະ ປັດຈຸບັນຄາດຄະເນວ່າເສດຖະກິດຈະຢຸດສະງັກ ຫຼື ຫຼຸດລົງ 0.1% ໃນປີນີ້.

ເຫດຜົນສ່ວນໜຶ່ງແມ່ນຍ້ອນວ່າເຢຍລະມັນ ຍັງປະເຊີນກັບສິ່ງທ້າທາຍດ້ານໂຄງສ້າງລວມທັງການແຂ່ງຂັນທີ່ເພີ່ມຂຶ້ນຈາກຈີນ, ການຂາດແຄນແຮງງານທີ່ມີທັກສະ ແລະ ການຫັນປ່ຽນສີຂຽວທີ່ສັບສົນ.

ເຖິງຢ່າງໃດກໍຕາມ, ລັດຖະບານ ເຢຍລະມັນ ຍັງຄົງມີຄວາມຫວັງໃນແງ່ດີກ່ຽວກັບທ່າອ່ຽງສໍາລັບປີ 2025. ອີງຕາມ Sueddeutsche, ປັດຈຸບັນກະຊວງເສດຖະກິດ ເຢຍລະມັນ ຄາດວ່າເສດຖະກິດຈະເຕີບໂຕ 1.1% ໃນປີ 2025, ເພີ່ມຂຶ້ນຈາກ 1% ໃນການຄາດຄະເນທີ່ຜ່ານມາ. ຮອດປີ 2026, ເສດຖະກິດຄາດວ່າຈະເຕີບໂຕ 1.6%.